Авиамоделистхэм я зэпеуэ

Мэлыжьыхьым и 15-17-хэм Нарткъалэ щекIуэкIащ №ЕКП12384 авиамоделхэмкIэ урысейпсо зэхьэзэхуэхэр. Абы хэтащ къэралым и щIыналъэ 12-м къикIа балигъхэри ныбжьыщIэхэри. Зэпеуэхэм фIы дыдэу зыкъыщIагъэлъэгъуащ Къэбэрдей-Балъкъэрым и авиамоделистхэм. 
Зэхьэзэхуэм щызыIэрагъэхьа ехъулIэныгъэхэм япкъ иткIэ балигъхэм я деж пашэныгъэр щиубыдащ Тулэ областым щыщ дунейпсо класс зиIэ спортым и мастер Яковлев Евгений. Абы и лъахэгъу спортым и мастерым и кандидат Евстигнеев Александр етIуанэщ. Ещанэ увыпIэр иубыдащ Ростов областым къикIа Грицаев Сергей. Къэбэрдей-Балъкъэрым и спортсменхэм ящыщу Сэхъурокъуэ Амир еханэщ, СатIушы Тамерлан ебланэщ. 
НыбжьыщIэхэм я зэхьэзэхуэм Сэхъурокъуэ Амир етIуанэ увыпIэр щиубыдащ икIи япэ спорт разрядым и мардэр игъэзэщIащ. Абы къыкIэлъокIуэ иджыри ди зы лъэпкъэгъу СатIушы Тамерлан. Евстигнеев Александр япэ увыпIэр зыIэригъэхьащ. 
Иджырей зэхьэзэхуэхэм къыдэкIуэу зэхэтащ авиамодель псынщIэ лIэужьыгъуэхэм я зэпеуэ. Абы япэ увыпIитыр щызыIэрагъэхьащ Забайкал крайм къикIахэу спортым и мастер Сущенкэ Русланрэ Дударев Станиславрэ. Къэбэрдей-Балъкъэрым щыщ спортым и мастер Хьэпэ Артур ещанэ увыпIэр иубыдащ. 
НыбжьыщIэхэм я деж пашэныгъэр щиубыдащ Смоленск областым щыщ Носков Василий. ЕтIуанэ хъуащ ди лъэпкъэгъу Джатокъуэ Джамболэт. Осетие Ищхъэрэ-Аланием къикIа Вартанян Давид ещанэщ.