Си гукъэкIыжхэм щыщщ…
Майм и 9 -р хуабэу нэху къекIащ. А махуэм и мыхьэнэр къызыгурыIуэ дунейм зигъэщIэрэщIащи, гулъытэншэу къыпхуэгъанэркъым. Сиреным и бостей нэхъ дахэ дыдэр щитIэгъауэ, нысащIэм хуэдэу къыпхуогуфIэ. Абы къыкIэрих «дыхумэр»-щэ?! Ауэ итIанэми, уэлбанэ хъуну фэ тетщ. Дыгъэр къыкъуэплъ пэтми, уэшхыр и чэзум йожьэри «тетIысхьэпIэм тесщ».
Сэри, сыт щыгъуи хуэдэу, сыхуэпIащIэу сыIущIащ а махуэм! Ар си дежкIэ мыхьэнэшхуэ зиIэ махуэщ! Адрей илъэсхэми хуэдэу, нэхъ жьыуэ сыкъэтэджри, хьэщIапIэ сызэрыкIуэным зыхуэзгъэхьэзыращ. Сэ нобэ сызэрыкIуэнур ящIэу къызэжьэнут си ныбжьэгъу лъапIэхэр. Си гур къилъэтыным хуэдэу къоуэ.
Уэрамым и кIэм сынэсри, сыкъэувыIащ. СызыхуэкIуэ щIыпIэм сынэсыным къэнэжар лъэбакъуэ зытIущт. Ауэ сыт щыгъуи хуэдэу, сыкъызыхуэкIуахэм сабгъэдыхьэным сытемыгушхуэу сыщытт. Жыжьэу уплъэмэ, плъагъурт зэгуэр мы си гъащIэр зыгъэщIэращIэу щыта цIыху Iэджэм я фэеплъу къэна мывэ сынхэр. Ахэрат сэ нобэ хьэщIапIэ сыкъызыхуэкIуар. Аращ дунейм и хабзэри, фIыуэ тлъагъухэр тIэщIокI. ЗэманкIэ ди гъащIэр ягъэщIэращIэу къытхотри, иужькIэ къуалэбзууэ мэлъэтэж.
Мывэ сынхэм чэзууэ сабгъэдохьэ. Мыбдежым щIэлъ цIыхухэм псалъэ дахэкIэ захузогъазэ, си Iуэхухэр зэрекIуэкIым сахутопсэлъыхь. Зы дакъикъэкIэ нэхъ пэгъунэгъу сахуэхъуащ игъащIэкIи сызыпэIэщIэну цIыхухэм. Ауэ, нэгъуэщI мыхъуми, я фэеплъ сынхэр зэрыслъагъум си гум жьыдэхугъуэ гуэр иритауэ, си нэпсхэри сымыубыдыжу сопсалъэ. Аргуэру гукъэкIыжхэм къуаргъ фIыцIэу сыкъауфэрэзыхьащи, кIуапIэ къызамыту сатхьэлэ. ГупсысэкIэ согъэзэж, игъащIэкIи сыздэкIуэжыну сыхуэмей зэманым…
…А мазэм нэмыцэр ди къуажэм къыдыхьа къудейт. Псори зэжьа хьэщIэ лъапIэу зыкъыщыхъужауэ, и бзаджагъэ Iэмалхэр дэнэкIи щрикъухьырт. Танкхэр, Iэщэхэр, кхъухьлъатэхэр тепщэ щыхъуат ди къуажэм. Гузэвэгъуэм и курыкупсэм къина цIыхухэм къахуэнэжыр зыти, дыкъэзыгъэщIам гущIэгъукIэ елъэIурт. Ауэ абыи дызэхимыхыжым хуэдэт.
А зэман бзаджэм сысабийуэ срихьэлIащ. Ауэ зауэм имычэзууэ балигъ ищIа адрей сабийхэми хуэдэу, сэ фIы дыдэу сщIэрт кхъухьлъатэ къэтлъэгъуамэ щIыунэм дыкIуэн зэрыхуейри, нэмыцэ сэлэтхэм я нэгу зыкъыщIэбгъахуэ зэрымыхъунури. МахуэщIэ къэкIуэнум дэ дыхиубыдэнрэ дыхимыубыдэнрэ дымыщIэу дыпсэурт.
Япэу зауэм дэкIахэм ящыщт си адэри. Дэ махуэ къэс дежьэрт абы теухуа хъыбар гуэр, ауэ псори щэхут, сыт и Iуэхуми тщIэртэкъым.
Нэмыцэр къуажэм къыдыхьэри махуэ бжыгъэ нэхъ дэмыкIауэ, я унафэм емыдэIуауэ къалъытэ гъэрхэр къуажэ амбарым щIаубыдащ. МэжэщIэлIагъэмрэ уIэгъэхэмрэ къарууншэ ящIа цIыхухэм лъыр къапыжт, ерагъкIэ зэфIэт къудейт. Ауэ бийм и гур абыхэм ящIэгъуртэкъым, уеблэмэ куэд мыщIэу ахэр къыщIашу яукIыну ягъэхъыбарт. Къуажэм дэс цIыхухэр Iэмал гуэр ягъуэтыху шхын е псы а амбарым яхьырт.
Апхуэдэу, махуэ гуэрым си анэнэпIэсым мэжаджэ куэду игъэжьащ. Амбарым щаIыгъ гъэрхэм деж ар схуэхьынкIэ къыщызэупщIым, ауи сымыгупсысэу арэзы сыхъуащ. Псыхьэ срикIуэу пэгун цIыкIуитI сиIэти, мэжаджэр абыхэм ярыз сощIри, псыхьэ сыкIуэ хуэдэу сожьэ. Сэ сызыхуейр зыт: нэмыцэ хъумакIуэхэм гу къыслъамытэу саблэкIыу, мэжаджэр зыхуэсхьахэм естыну. Амбарым и блынхэм язым гъуанэшхуэ иIэт, уи Iэр дэхуэу. АбыкIэ мэжаджэ хуабэхэр псынщIэу дызодзри, сыпIащIэу къыIузогъэзыкIыж. Ауэ, абы ирихьэлIэу, нэмыцэ хъумакIуэхэм язым гу къыслъетэ. Си гур къемыуэжым хуэдэу сышынащ. Бий гущIэгъуншэри, и нэхэм губжьыр къыщIихыу, къызобгъэрыкIуэ. Сэ сегупсысырт: фIэгуэныхь сыхъунщ, «мыр сабийщ» жиIэнщи, си гугъу ищIынкъым. Ауэ сызыщыгугъа цIыхугъэр абы зищIысыр ищIэртэкъыми, фоч лъэдакъэмкIэ къызоуэ. Сэ сыкъотэджыж, сыщIэпхъуэжыну сыхэтщ, ауэ ар къыскIэщIохьэри аргуэру къызоуэ. Си лъэгуажьэри си нэкIури тетхъуащ. Лъымрэ нэпсымрэ зыхэлъэдэжауэ зыри сагъэлъагъуркъым. ИтIанэми сыкъотэджыж… Сигу къеуэр зыт: мы сэлэтым иджыпсту сиукIмэ, папэ къыщыкIуэжкIэ слъагъужынукъым…
ЦIыхум и фэм куэд дохуэ, куэди хуошэч. Аращ, армырмэ, дауэ сэ зэрысхузэфIэкIар си псэр унэм нэсхьэсыжыну?! А махуэм лъэбакъуэ дапщэ щысчами ноби сощIэжыр...
Зауэ гущIэгъуншэ! Сыту цIыху куэд уи хэщIапIэм щыбгъэпщкIурэ! Насыпым, гуфIэгъуэм щIэхъуэпс щIалэхэр бодыгъури, игъащIэкIи уи деж къыщыбогъанэ. Я дамэм телъ вагъуэ цIыкIухэм хуэдэу, сэлэт бжыгъэншэхэр уафэм къоувэжри, зэгуэр мамырыгъэм къыхана цIыхухэм къахуоплъых. Ауэ вагъуэхэр щIыIэщ, къытхэмытыж цIыхухэм я пIэми иувэфынукъым…
