XXI лIэщIыгъуэм бзылъхугъэ IэщIагъэу фIэкIа къамылъытэхэр

ГъэсакIуэ. ЦIыхухъум мы IэщIагъэр зригъэгъуэтыну къезэгъыркъым, сабийхэр нэхъыбэу анэ гулъытэщ зыхуэныкъуэри. Гъэшхэн, хуэпэн, кIэлъыплъын, и чэзум гъэжеин – ахэр зыхуэщIэнур бзылъхугъэращ. ЦIыхубзым сабийхэм я щэхухэр зрегъэщIэф, егъасэ, зрегъэужь.. ГъэсакIуэм и нэIэ щIэт сабий гупыр цIыхухъур зыпэмылъэщын Iуэхуу къалъытэ.
Дэрбзэр. Щыгъын щад лэжьапIэм иужьрей лIэщIыгъуэм цIыхубз фIэкIа къыщIэмынэжам хуэдэщ. Набдзэгубдзаплъэу, тэмакъкIыхьу, бэшэчу узыпэрытын хуей IэщIагъэщ ар. Апхуэдэуи зэпымыууэ зызыужь дунейм лъэщIыхьэн папщIэ, дэрбзэрым и гупсысэр къулейуэ щытыпхъэщ, щIэр къигупсысу, жьыр къигъэщIэрэщIэжыфу.
 Стюардессэ. Ар и дахагъэкIи и псэлъэкIэкIи щапхъэу щытын хуейщ. Кхъухьлъатэм исхэм я шынагъуэншагъэм кIэлъыплъыныр абы къытохуэ. ЦIыхухъур мы IэнатIэми мащIэрэщ зэрыщыплъагъур.
Медицинэм и лэжьакIуэ нэхъыщIэ, курыт. Абы игъэзащIэ къалэным и мыхьэнэр ину къалъытэ. А IэщIагъэр е XI-нэ лIэщIыгъуэм къэунэхуащ. Къапщтэмэ, сымаджэхэм я узыншагъэм кIэлъыплъыныр дзыхь зыхуащIу щытар цIыхубзхэм я закъуэт. Ди зэманми лейуэ абы зыкIи зихъуэжакъым.
Библиотекэм и лэжьакIуэ. Тхылъхэм я уардэунэм нэхъыбэу щылажьэр цIыхубзхэращ. Лэжьыгъэ гугъукъым, ауэ улахуэри мащIэщ. Абы къыхэкIыу цIыхухъухэр мыбдежи щыкуэдкъым.
ФитнесымкIэ IэщIагъэлI. Ар зи IэщIагъэ хъыджэбзыр адрейхэм щапхъэ яхуохъу. Iэпкълъэпкъыр зэкIужу щытын зэрыхуейр и лэжьыгъэм щынэхъыщхьэщ, абы и деж къакIуэхэм я узыншагъэми зэран хуэмыхъуу Iуэхур зэриунэтIыным пылъын хуейщ. Жэуаплыныгъэ зыхэлъ лэжьыгъэщ. КъуэкIыпIэмкIэ къикIа йогэ лIэужьыгъуэми нэхъ дихьэхыр бзылъхугъэхэращ. Апхуэдэ цIыхубзым хищIыкIын хуейщ психологиеми философиеми.