КъегъэлакIуэхэм я фIыщIэкIэ

Накъыгъэм и 23-м Iуащхьэмахуэ бгым къэлъыхъуэныгъэ-къегъэлыныгъэ лэжьыгъэ гугъухэр щрагъэкIуэкIащ, дэIэпыкъуэгъу хуейуэ къэлъэIуа зыплъыхьакIуиплIыр къешэхыжыным пыщIауэ.

А гугъуехьыр кърикIуат дунейм и щытыкIэр зэрызэIыхьам - жьышхуэ къепщэрт, щIыIэр градус 30-м нэс ехат.

ЗыплъыхьакIуэхэм ядэIэпыкъуну ежьащ МЧС-м и къегъэлакIуэ 11. Дунейм и щытыкIэм гугъу къищIырт туристхэр къэлъыхъуэныр. КъегъэлакIуэхэр метр 4800 лъагагъым нэса нэужь зылъыхъуэхэм телефонкIэ зыпамыщIэжыф хъуащ. Абдежым унафэ къыщащтащ къэлъыхъуэныгъэхэм IэщIагъэлI, техникэ нэхъыбэ къыхашэну икIи цIыху 14 зыхэт етIуанэ гупыр ежьащ.

Метр 5300 лъагагъым деж гупитIри щызэхуэзэжри, зыплъыхьакIуэхэр бгым кърашэхыжын щIадзащ. Махуэм сыхьэт 13-м ирихьэлIэу лэжьыгъэр зэфIэкIащ, турист гупыр Азау тафэм къагъэсыжащ, ахэр медицинэ дэIэпыкъуныгъэ хуэныкъуэтэкъым.

 - Дунейм и щытыкIэр гугъу дыдэу щытами, гупыр Iуэхум пэлъэщащ. Бгылъэм зыIэзыбжьэу щытыкIэм зэрызыщихъуэжым егъэлеяуэ гугъу ещI къегъэлакIуэ гупым я лэжьыгъэр. Мыпхуэдэ щытыкIэм деж щIэгъэкъуэнышхуэщ я IэщIагъэм зэрыхуэIэижьымрэ я зэкъуэтыныгъэмрэ. КъегъэлакIуэ Iэзэхэм лэжьыгъэр екIуу зэфIахащ, туристиплIым я гъащIэм ущIытегузэвыхьын щыIэеъым, - жиIащ Урысей МЧС-м и Iуащхьэмахуэ къегъэлакIуэ гупым и унафэщI Гулиев Абдуллэхь.

Iуэхум хэтащ Урысей МЧС-м и къегъэлакIуэ 25-рэ, техникэу щы, - къет Урысей МЧС-м и Управленэ нэхъыщхьэу КъБР-м щыIэм и пресс-IуэхущIапIэм.