ЗэбгъащIэр IэщIагъэщ

         Тэрч районым хыхьэ Курп Ипщэ къуажэм щыщ ТIымыжь Заур щIэныгъэ нэхъыщхьэ зригъэгъуэта нэужь, 20I2 гъэм лэжьэн щIидзащ «Метро» сату IуэхущIапIэм и оператору.

         Мыгувэу егупсысу щIедзэ Iуэху гуэр къызэригъэпэщын зэрыхуейм икIи и сабиигъуэмкIэ йоплъэкIыж.

         - Си адэр механизатору «Ислъэмей» колхозым щылэжьащ. Школым сызэрыщIэс лъандэрэ щIым телэжьыхьыным, къапщтэмэ, мэкъумэш Iуэхухэм абы сыдригъэхьэхат. Техникэм и лэжьэкIэр, зэрызэпкърылъыр, Iуэхум и щэху псори сэзыгъэлъэгъуар си адэращ. Абы и фIыгъэщ си IуэхущIапIэ зэфIэзгъэувэныр къызэрызэхъулIар, - жеIэ Заур.

         2015 гъэм ТIымыжьым МэкъумэшыщIэ-фермер IэнатIэ къызэригъэпэщащ. ГъущIыкIэ папщIэу унагъуэ пщIантIэм комбайнитI къыдэнауэ дэтти, и адэр къыдэIэпыкъури, Заур ахэр иригъэжьэжащ. Уеблэмэ лэжьэн зэрыщIидзари а тIуращ. ЩIалэм зэрыжиIэмкIэ, гъавэ Iухыжыгъуэхэм губгъуэм япэу къыщилэжьар IэщIагъэ зэрызригъэгъуэтыным хуигъэтIылъауэ щытащ.

         - Иужьым щIы гектар 60 бэджэнду къасщтэри, гъавэрэ джэш лIэужьыгъуэхэмрэ тесщIэн щIэздзащ. Япэ илъэсым зы гектарым нартыхуу центнер 80 къытетхащ, соеу - центнер 30, сэхурану - центнер 25-рэ. КъыкIэлъыкIуэ гъэм мэкъумэш техникэхэр зэзгъэпэщащ: зы комбайн, тракторитI, автомобиль цIыкIурэ хьэлъэзешэу зырыз, - дыщегъэгъуазэ Заур.

         ТIымыжьыр 201I5 гъэм Урысейм и АККОР-м хагъэхьащ икIи 20I8 гъэм иригъэкIуэкIа лэжьыгъэр къалъытэри, IуэхущIапIэм и ЩIыхь тхылъыр къыхуагъэфэщащ.

         2019 гъэм и гъатхэпэм щIалэр хэтащ къуажэдэс щIалэгъуалэм я урысейпсо зэгухьэныгъэм Дагъыстэн Республикэм щиIэ къудамэм иригъэкIуэкIа зэхьэзэхуэм икIи япэ увыпIэр абы къыщихьащ.

         Апхуэдэуи ТIымыжьыр пашэ щыхъуащ КИФЩI-м и «Фермер щIалэщIэ» зэхьэзэхуэм «IэнатIэ цIыкIу» и лIэужьыгъуэм (20I9 гъэм). Абдежи саугъэт лъапIэ - мотоблок - къыщратащ.

         - Сыт хуэдэ лэжьыгъэ ирехъуи, ар пфIэфIу, уи гум къыдыхьэу щытмэ, абы и гугъуехьхэри къохьэлъэкIынукъым. Ди Iуэхум нэхъ гугъуу хэлъым и гугъу пщIымэ, ар жэуаплыныгъэшхуэ зэрытхьырщ, сыту жыпIэмэ ди щIы Iыхьэхэм къищынэмыщIа, къуажэдэсхэм яйхэри зыдохьэ, - жеIэ щIалэм. – ЗэрыгурыIуэгъуэщи, IэнатIэ Iутыр мащIэщ, абы къыхэкIыу зыщыгугъыр щIым къытрах гъавэ закъуэрщ. Я мылъкур зыхалъхьэу хъер гуэр къыпэкIуэну цIыхухэр илъэс псом зыпэплъэр мэкъумэшращи, зэрытхузэфIэкIкIэ дадоIэпыкъу, вэным деж къыщыщIэдзауэ Iухыжыгъуэри хэту. Мы IэщIагъэр къызэрыхэсхам сыхущIегъуэжыркъым, уеблэмэ нэхъыфIыжу зэрызыдужьыным, цIыхухэм сэбэп нэхъ сазэрыхуэхъуным сыхущIэкъуу аращ.

          Заур и къуэш нэхъыщIэ Залыми комбайным иролажьэ, техникэр зыхуей хуэгъэзэн хуей хъуми защIегъакъуэ. КъищынэмыщIауэ, ТIымыжьым зэщIигъэуIуа бригадэм хэтщ тракторхэмрэ комбайнхэмрэ зезыгъакIуэхэу Шэрыхъу Арсен, Махъсидэ Iэуес, Iэпщэ Хьэжмурат сымэ.

         ТIымыжьым и IэнатIэм епхауэ мурад куэд иIэщ икIи щогугъ ахэр къехъулIэну. Къуажэдэсхэм я псэукIэр егъэфIэкIуэнри и плъапIэхэм ящыщ зыщ. «Сыхуейт машинно-трактор станц (МТС) къызэзгъэпэщу гъатхэ-бжьыхьэ лэжьэгъуэхэм мэкъумэшым ехьэлIа Iуэхутхьэбзэхэр къуажэдэсым яхузэфIэгъэкIыныр зэтезублэну», - дыщIегъу абы.

 

БАГЪЭТЫР Луизэ.
Поделиться: