Къуалэбзум къахохъуэж

Урысейм и щIэныгъэлIхэм къызэрахутамкIэ, Къэбэрдей - Балъкъэрым щыбагъуэу хуежьащ дыкъэзыухъуреихь дунейм мащIэу фIэкIа узыщримыхьэлIэж къуршыбгъэхэр.
Абы къежьапIэ хуэхъуауэ къалъытэ «Къуршыбгъэхэм унапIэ яхуэхъуа мэзхэр дывгъэхъумэ» къэрал проектыр ди щIыналъэм купщIафIэу щагъэзэщIэн зэрыщIадзар. ИпэкIи дытепсэлъыхьат а IуэхуфIым и къежьапIэм - Урысейм и WWF - мрэ Тембот Аслъэнбий и цIэр зезыхьэ бгылъэ щIыпIэхэм я экологиемкIэ институтымрэ зэгъусэу 2020 гъэм ар яублауэ щытащ. ИлъэситIым нэсауэ къуалэбзухэм теухуауэ ирагъэкIуэкI къэхутэныгъэхэр IэужьыфIэу къыщIэкIащ - бэгъуэжу хуежьащ зэман ипэкIэ нэрылъагъуу зи бжыгъэм хэщIа къуршыбгъэхэр.
- Май, Прохладнэ, Тэрч, Лашкута мэз IуэхущIапIэхэм, Тэрч и тафэхэм иджыблагъэ щедгъэкIуэкIа иужьрей къэпщытэныгъэхэм къызэрагъэлъэгъуамкIэ, куэд хъужащ бгъэ кIапэхур. Апхуэдэу щIыпIэ зыбжанэм къашыргъэхэм, бгъэ фIыцIэхэм я абгъуэхэр къыщыдгъуэтащ. ЗэрыгурыIуэгъуэщи, бгъэхэм абгъуэ щащIыр шырхэр къыщрашыну яфIэшынагъуэншэ, шхынри хуиту щагъуэт щIыпIэхэрщ. Къэбэрдей -Балъкъэрым и къуршылъэ щIыпIэхэр апхуэдэ щытыкIэм сыткIи къозэгъ. КъищынэмыщIауэ, щIыуэпсыр щыкъабзэщ, - жиIащ Урысейм и WWF IэнатIэм и Iуэху щIапIэу «Урысей Кавказ» экорегионым щыIэ икIи зи гугъу тщIа проектхэм я узэщIакIуэ Мнацеканов Роман. Мыпхуэдэ лэжьыгъэ купщIафIэхэр щрагъэкIуэкI ди гъунэгъу Осетие Ищхъэрэ - Аланием и къуршылъэ, мэзылъэ щIыпIэхэми.