Къэбэрдей-Балъкъэрым и «Гордость Кавказа» сабий-ныбжьыщIэ IуэрыIуатэ-къэфакIуэ ансамблым Гран-при саугъэтыр къыщихьащ Сочэ къалэм иджыблагъэ щекIуэкIа «Весеннее скерцо» урысейпсо фестиваль-зэпеуэм.
Жанатаевэ Ирэнэ зи художественнэ унафэщI, Кавказ псор зэрыгушхуэ ансамблым и фIэщыгъэр зэрагъэпэжым и щыхьэту, артист ныбжьыщIэхэм ягъэлъэгъуа лъэпкъ къафэхэр къэпщытакIуэхэм ягу дыхьащ икIи адрейхэм ефIэкIыу къалъытэри саугъэт нэхъыщхьэр къыхуагъэфэщащ.
КъыжыIапхъэщ, «Территория талантов» ассамблеем гъатхэпэм и кIэм Сочэ къалэм къыщызэригъэпэща «Новый формат» дунейпсо зэпеуэ-фестивалми ансамблыр пашэ зэрыщыхъуар. Гупым абы щигъэлъэгъуащ къафэ зэмылIэужьыгъуэхэр. КъищынэмыщIауэ, ансамблым и бэрэбэнауэхэм я зэфIэкIми гу къылъатащ.
Зэпеуэм и къэпщытакIуэ гупым хэтащ Москва и Щэнхабзэ къэрал институтым цIыхубэ къафэхэмкIэ и кафедрэм и унафэщI, профессор, режиссёр, УФ-м щэнхабзэмкIэ щIыхь зиIэ и лэжьакIуэ Деревягин Юрэ, Урысейм, Швейцарием, Америкэм и Штат Зэгуэтхэм я театр утхэм эстрадэ къафэхэмрэ цирк проектхэмрэ щызыгъэхьэзыр, Москва гъуазджэхэмкIэ и колледжым джазымкIэ и егъэджакIуэ Лутошкинэ Светланэ, УФ-м щэнхабзэмкIэ щIыхь зиIэ и лэжьакIуэ, егъэджакIуэ, иджырей къафэхэмкIэ дунейпсо фестивалхэм я къэпщытакIуэ гупхэм я унафэщI Зиминэ Ольгэ, «Кроме слов» театрым и артист Чернышевэ Вероникэ сымэ.
«Гордость Кавказа» ансамблыр 2012 гъэм Магомедов Юсуп къызэригъэпэщащ, Кавказ Ищхъэрэм и лъэпкъ къафэхэр хъума хъун, нэгъуэщI щIыпIэхэм щыпсэухэр абыхэм щагъэгъуэзэн папщIэ. Гупым Кавказым и къафэхэм къадэкIуэу, урыс цIыхубэ, нэгъуэщI лъэпкъ къафэхэри ягъэзащIэ. Ансамблым и гъэсэнхэм яхэтщ адыгэ, балъкъэр, урыс, дагъыстэн, куржы, мышкъыш, шэшэн, осетин, абхъаз, ермэлы, журт, нэгъуэщI лъэпкъхэм щыщ ныбжьыщIэхэр.
Ансамблым и къэфакIуэхэм удихьэхыу зыкъыщагъэлъэгъуащ 2018 гъэм Москва Останкином и «Королевский» концерт залым щекIуэкIа «Корни» дунейпсо фестивалым. Абы гукъинэжу щагъэлъэгъуащ авар пщащэ къафэр.
Къызэрызэрагъэпэщрэ куэд мыщIами, ансамблым зэпеуэхэмрэ фестивалхэмрэ ехъулIэныгъэхэр, щIыхьыцIэхэр мызэ-мытIэу къыщихьащ. Апхуэдэщ «ЦIыхубэ къафэ нэхъыфI», «ЦIыхубэ къэфакIуэ нэхъыфI» унэтIыныгъэхэм зыбжанэрэ пашэ зэрыщыхъуар. Ди республикэм и махуэшхуэхэр зыгъэдахэ къэфакIуэхэр нэгъуэщI щIыналъэхэм къыщызэрагъэпэщ концертхэм, зэпеуэхэм, хьэгъуэлIыгъуэхэм ирагъэблагъэ икIи Кавказ щэнхабзэр, къафэ гъуазджэр екIуу утыку щагъэлъагъуэ. Гупыр щыIащ Москва, Санкт-Петербург, Сочэ, Урысейм и нэгъуэщI къалэхэм, Тыркум, Болгарием, Марокко, Кипрым, нэгъуэщI щIыпIэхэми. Ансамблым фIыщIэ, щIыхь тхылъхэр, дипломхэр къыхуагъэфэщащ.
