ГурагъэIуащ

Ди анэм къиIуэтэжа хъыбархэм щыщщ
 

Адэ пасэм щыгъуэ ди жылэм дэсащ зы щхьэлтет, быдэрэ быдэу, гущIэгъуншэрэ-гущIэгъуншэу.
Зэгуэрым, щхьэлтетыр IуэхукIэ хамэ къуажэ кIуауэ къэту, мафIэ къыщIэнэри щхьэлыр исащ. Ар щалъагъум, къуажэдэсхэр зэхуэсщ, зэчэнджэщри унафэ ящIащ, и гъащIэм езыр зыми дэмыIэпыкъуа, гущIэгъуншэу щыт пэтми, апхуэдэ гуауэр зэуэ жрамыIэу хуэм-хуэмурэ гурагъэIуэну.
ТIэ, щхьэлтетыр къыщыкIуэжыну махуэр ящIэрти, лIыжь цIыкIу гуэр прагъэжьащ жылэ унафэр игъэзэщIэну. Къуажэм пэмыжыжьащэу зэхуэзащ а тIур.
- Сэлам алейкум, щхьэлтет лъапIэ! – жеIэ лIыжь цIыкIум. – Сытхэр щыхъыбар уздэщыIамкIэ?
- Уалейкум сэлам! Хъерщ…
- Уэлэхьа-а хьэзим, щхьэлтет лъапIэ, абыкIэ хъерми, сэ сыкъыздикIамкIэ Iуэхур щымыщIагъуэ!
- Сыт къэхъуар?
- Къэхъуагъэшхуи щыIэкъым, - жи лIыжь цIыкIум. – Уи щхьэл бжэIупэм Iутрейуэ щыта хьэмаскIэжь цIыкIур лIащ. Хуабжьу жылэм ди жагъуэ хъуащ ар. ТхьэмыщкIэр дахэ дыдэт икIи узыншэт.
- ТIэ, узыншэмэ, щхьэ лIа?
- Шыл куэдыIуэ ишхри зэгуиудащ.
- Дэнэт апхуэдиз шыл къыздрихар?
- Уи шыбзыжьыр лIати, зытриукIэжу ишхащ.
- Сыту пIэрэт си шыбзыжьым къыщыщIар? Ар щIалэт икIи бланэт.
- Мыбланэу щытамэ, лIэрэт! Аращ тхьэмыщкIэр зытекIуэдэжари. Псы зэрыдаш бошкIэр зэрыт гум щIащIэри…
- Зы псы бошкIэ кърыдаш щхьэкIэ, зэгуэдыну щыта шытэкъым ар!
- Зы псы бошкIэ, жи! Зы псы бошкIэ абы кърыдрашар! Нэху щыхукIэ ирамыгъэтIысэхыу, кърахуэкIащ.
- Iэу, сытыт апхуэдизыпскIэ ящIар?
- МафIэс тIэкIу къэхъуати, ирагъэункIыфIащ.
- Сыт мафIэс? – къэскIащ щхьэлтетыр.
- Уи щхьэлым деж щыта гуэщыжь тIэкIур пщIэжыртэкъэ? Бел сыт хуэдэхэр зыщIэплъхьэу щытаращ жыхуэсIэр?
- Зэпыту кIуэ гуэщыжьыр, армырами, згъэсыжынут ар. Ауэ щхьэлым пэжыжьэтэкъыми, дзыхь сымыщIурэ нобэр къэсащ.
- Пэжыжьэтэкъым, жи, пэгъунэгъубзэт, уэлэхьи, билэхьи, талэхьи, ари пэгъунэгъубзэ! Армырамэ, апхуэдэ тхьэмыщкIагъэ къэхъурэт?!
- Сыт хуэдэ тхьэмыщкIагъэ? – къэкIиящ щхьэлтетыр хъийм икIауэ.
- МафIэр щхьэлми щIидзащ, - жи лIыжь цIыкIум, - щIидзэри…
- ВгъэункIыфIакъэ-тIэ? – мэкIий щхьэлтетыр и макъ къызэрихькIэ.
- ДгъэункIыфIынут, ауэ, дыпэмылъэщу, щыщ къэмынэу исри ежьэжащ!
- Зыри, зыри, къэмынэуи? – IурыуфIыцIыкIащ щхьэлтетыр.
- Дауэ зыри къызэрымынар? Жылэ псори зрикъун яжьэ къэнащ!
- Сыт-тIэ, белэмбешэм, ар занщIэу щIыжумыIар?
- ЖытIакъэ занщIэу, уи лIыщIэм жетIат, сыт жетIэкIэ? 
- АтIэ?!
- ЗэрыжетIэххэу, уи дыщэ гъэпщкIуар къищтэщ, уи щхьэгъусэр зыщIигъури бзэхащ!
Ар щызэхихым, щхьэлтетыр къызэфIэмэхащ.
 

 

Къэзан Хьэмзэт.
Поделиться: