ГъуазджэхэмкIэ Кавказ Ищхъэрэ институтым иджыблагъэ щекIуэкIащ «5 веков органной музыки» фIэщыгъэм щIэт пшыхь гуапэ.
Ар къызэзыгъэпэщар ГъуазджэхэмкIэ институтыр ехъулIэныгъэ иIэу къэзыуха щIалэщIэ, Сафонов Василий и цIэр зэрихьэу Кисловодск дэт Кавказ Ищхъэрэ къэрал филармонием Органнэ макъамэмкIэ и къудамэм и унафэщI Къардэн Тимурщ.
Лъэхъэнэ зэхуэмыдэхэм псэуа цIыху телъыджэхэм ятха макъамэхэм щIигъэдэIуащ абы къызэхуэсахэр (пэшым щIэзу къекIуэлIат). Букстехуде Дитрих, Бах Иоганн, Мандельсон Феликс, XX лIэщIыгъуэм зи цIэ къыхэщхэу Таривердиев Микаэл, Янченкэ Олег сымэ я IэдакъэщIэкIхэм щыщ игъэзэщIащ щIалэм.
Пшыхьыр езыгъэкIуэкIа Санэ Эллэ макъамэ цIэрыIуэхэм я хъыбарыр жиIэжурэ, абыхэм зэман-зэманкIэ яIа щIэупщIэм теухуауэ къэпсэлъащ.
Къызэхуэсахэм органнэ макъамэр къызэрымыкIуэу ягу зэрырихьыр, зэрыдихьэхыпар къэлъагъугъуейтэкъым, уеблэмэ абыхэм я лъэIукIэ Къардэным къытригъэзэжурэ игъэзэщIащ Бах Иоганн и IэдакъэщIэкI цIэрыIуэхэм ящыщ.
Макъамэ телъыджэ къэзыгъэIу органым еуэфу ди щIыналъэм ис зырызхэм ящыщщ Къардэныр. 2019 гъэм абы ди республикэм япэу къыщызэригъэпэщауэ щытащ орган макъамэм и концерт.
Нэхъ гугъу дыдэу къалъытэ макъамэ Iэмэпсымэм щIалэр хуезыгъэсар Урысейм щIыхь зиIэ и артисткэ, Сафонов Василий и цIэр зэрихьэу Кисловодск дэт Кавказ Ищхъэрэ къэрал филармонием и генеральнэ директор - художественнэ унафэщI Бережная Светланэщ. Ар и зэфIэкIрэ IэзагъкIэ ди къэралым и мызакъуэу, хамэ щIыпIэхэми фIыуэ къыщацIыху. Тимур жеIэ апхуэдэ цIыхум и деж зэрыщеджар насыпышхуэу къызэрилъытэр.
Къардэным органыр къызэрищтари гъэщIэгъуэнщ. КъБР-м и къэрал филармонием илъэс куэдкIэ Iуэхуншэу щIэта (къэзыгъэсэбэпын, абы еуэфын яIэтэкъым) Iэмэпсымэм Тимур дихьэхри, пщыхьэщхьэ къэс кIуэурэ, ар зэрызэпкърылъыр езыр-езыру зэригъэщIауэ щытащ. ИужькIэ, программэ игъэхьэзырри, ГъуазджэхэмкIэ институтым «Органист» унэтIыныгъэмкIэ магистратурэм щIэтIысхьэжат. ИкIи къехъулIащ. Тимур илъэс къэс программэщIэ игъэхьэзырурэ концертхэр ет. Бережная Светланэ, УФ-м гъуазджэхэмкIэ щIыхь зиIэ и лэжьакIуэ Абдуллин Рубин, Австрием, Франджым, нэгъуэщI къэралхэми щыщ органист цIэрыIуэхэм концерт щаткIэ, Тимур дэIэпыкъуэгъуу ирагъэблагъэ.
Сыхьэтрэ ныкъуэм щIигъукIэ Къардэным игъэзэщIа макъамэ цIэрыIуэхэм композитор ХьэIупэ ДжэбрэIил итха зэрыхэтри уи гуапэ мыхъуу къанэркъым.
Дунейпсо зэпеуэ куэдым къыщыхэжаныкIа щIалэм и зэфIэкI, ехъулIэныгъэ нэхъыбэ хъуну дохъуэхъу!