ДУНЕЙМ ЩЫХЪЫБАРХЭРНобэ ♦ЦIыхухэр зэхуэмыгъэдэным пэщIэтыным и дунейпсо махуэщ ♦Тутын емыфэным и дунейпсо махуэщ ♦ЛъакъуэрыгъажэкIэ къызэдэжэн спорт лIэужьыгъуэм и дунейпсо махуэщ. I868 гъэм Париж и Iэгъуэблагъэм дунейм щыяпэу щекIуэкIащ лъакъуэрыгъажэкIэ къызэдэжэнымкIэ зэхьэзэхуэ. ♦Урысей адвокатурэм и махуэщ ♦Урысейм и МВД-м балигъ мыхъуахэм я IуэхухэмкIэ и къудамэхэм я махуэщ ♦Тыркумэным щагъэлъапIэ я алэрыбгъум и махуэр ♦Къэзахъстаным ягу къыщагъэкIыж политикэ залымыгъэхэмрэ мэжэщIалIагъэмрэ яхьахэр ♦1223 гъэм урысхэмрэ тэтэр-монголыдзэмрэ Калкэ псым деж япэу щызэзэуащ. Урысыдзэхэр хагъэщIащ икIи икIуэтын хуей хъуащ. Урысейр зэзыпхъуа тэтэрхэм я бжьым лIэщIыгъуитIрэ ныкъуэм нэблагъэкIэ щIэтащ. ♦1708 гъэм Царское село жылэм (иджы Пушкин къалэм) и лъабжьэр ягъэтIылъащ. ♦1710 гъэм урыс азбукэщIэр, Пётр Езанэр зыхэлэжьыхьыжар, IуэхущIапIэ псоми къыщагъэсэбэпын хуейуэ унафэ къащтащ. ♦1879 гъэм дунейм щыяпэу Берлин къыщызэIуахащ электрокъарукIэ лажьэ мафIэгухэр зрикIуэну гъущI гъуэгур, Вернер фон Сименс зэпкърилъхьа апхуэдэ япэ мафIэгум и лэжьэкIэри а махуэ дыдэм ягъэлъэгъуауэ щытащ. ♦1891 гъэм Владивосток къыщрагъэжьащ Транссыбыр гъущI гъуэгур ухуэныр. ♦1911 гъэм «Титаник» кхъухь абрагъуэр япэу псым техьащ. А зэманым дунейм щынэхъ ин дыдэу къалъыта кхъухьыр зэраутIыпщым яфIэтелъыджэу кIэлъыплъат цIыху мини I00-м щIигъу. Зы илъэс нэхъ дэмыкIыу, I9I2 гъэм мэлыжьыхьым и I5-м, и япэ рейсыр щигъэзащIэм мыл абрагъуэм жьэхэуэри, Атлантикэ хым щыщIилъэфауэ щытащ ар. ♦1918 гъэм Совет Урысейм ЦIыхубэм щIэныгъэ етынымкIэ и комиссариатым унафэ къищтащ щIалэ цIыкIухэмрэ хъыджэбз цIыкIухэмрэ зэгъусэу егъэджэным теухуауэ. ♦1942 гъэм дыхьэпIи дэкIыпIи имыIэу бийм къиухъуреихьа Ленинград къалэм футбол щызэдэджэгуащ «Динамо», «ЛМЗ» (Ленинград гъущIхэкIхэр къыщыщIагъэкIыу дэт завод) командэхэр. ♦1946 гъэм Лондон и Хитроу аэропортыр къызэIуахащ. ♦1961 гъэм хэIущIыIу ящIащ Инджылызым къыхэкIыу Африкэ Ипщэ Республикэ щхьэхуит къызэрыунэхуам теухуа хъыбарыр. ♦1990 гъэм къызэрагъэпэщащ Урысейпсо жылагъуэ зэгухьэныгъэр – «Урысейм и ЩIалэгъуалэм я зэгухьэныгъэр». ♦2002 гъэм Япониемрэ Корее Ипщэмрэ къыщызэIуахащ дунейм футболымкIэ и I7-нэ чемпионатыр. Ар а къэралхэм я стадионхэм щекIуэкIащ накъыгъэм и 3I – мэкъуауэгъуэм и 30-хэм. ♦1899 гъэм къалъхуащ совет тхакIуэ цIэрыIуэ, РСФСР-м гъуазджэхэмкIэ щIыхь зиIэ и лэжьакIуэ, Лениным, Сталиным, СССР-м я Къэрал саугъэтхэр зыхуагъэфэща, Социалист Лэжьыгъэм и ЛIыхъужь Леонов Леонид. ♦1929 гъэм къалъхуащ совет дзэ къулыкъущIэ, контр-адмирал Тхьэгъапсэ Мэжид. ♦1930 гъэм къалъхуащ США-м щыщ актёр, режиссёр цIэрыIуэ, «Оскар» саугъэтыр плIэнейрэ зыхуагъэфэща Иствуд Клинт. ♦1933 гъэм къалъхуащ актёр, кинорежиссёр, РСФСР-м щIыхь зиIэ и артист Бурков Георгий. ♦1948 гъэм къалъхуащ философие щIэныгъэхэм я доктор, КъБКъУ-м и профессор, КъБР-м щIэныгъэмкIэ щIыхь зиIэ и лэжьакIуэ Шэвлокъуэ Вячеслав. ♦1950 гъэм къалъхуащ къэрал, жылагъуэ лэжьакIуэ, экономикэ щIэныгъэхэм я доктор, КъБР-м щIыхь зиIэ и экономист, КъБР-м и Парламентым, Жылагъуэ палатэм я УнафэщIу щыта Чеченов Ануар. ♦1955 гъэм къалъхуащ уэрэджыIакIуэ, композитор, УФ-м и цIыхубэ артист Кузьмин Владимир. ♦1960 гъэм къалъхуащ къэрал лэжьакIуэ, КъБР-м щIыхь зиIэ и дохутыр Къарэнашэ Iэминат. ♦1970 гъэм къалъхуащ Шэрджэс Адыгэ Хасэм и тхьэмадэ Аслъэн Алий. ♦1973 гъэм къалъхуащ урысей уэрэджыIакIуэ цIэрыIуэ, УФ-м щIыхь зиIэ и артисткэ Королёвэ Наташэ (и цIэ-унэцIэ дыдэр Порывай Натальещ). Дунейм и щытыкIэнур «pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 27 - 29-рэ, жэщым градус 18 - 20 щыхъунущ. Лъэпкъ Iущыгъэ: Дзей хуэщIэ фIыщIэ хэлъкъым.
Поделиться:
Читать также:
18.04.2024 - 16:13 →
НОБЭ
17.04.2024 - 11:48 →
Дунейпсо щIэиным и махуэ
17.04.2024 - 11:43 →
НОБЭ
16.04.2024 - 15:51 →
Вагъуищым я нэхъ цIыкIум
16.04.2024 - 11:18 →
Псалъэжьхэр
|