Ухеймэ, улъэщщ

США къэралыгъуэшхуэм и тетхэм дуней псор щыхупIэ бзаджэм зэрыпэрашэр иджы псоми ди нэгум щIокI. НэхъапэIуэкIэ ящIар къызогъанэри, иужьрей илъэс тIощIым къриубыдэу, абыхэм лейуэ зэрахьар Iуэтэжыгъуейщ. ПцIы защIэкIэ цIыхухэр зэщIагъэхъаем зэрауштыжурэ, къэрал цIыкIу куэдым я псэукIэри экономикэри зэтракъутащ. 

Демократие нэпцIым и тепщэ

Америкэм зэи фейдэншэ зищIыркъым. Зыхуейуэ хъуар зыщIекъуэри, лъэныкъуэ зрегъэзыж. Ар хуейщ дуней псом и тепщэ зищIыну. КъызыкъуэгушхукIын мылъкурэ Iэщэрэ и куэдщи, къыпэувыр епIытI, цIыху дапщэ хэкIуэдами фIэмыIуэхуу. Абы и щыхьэтщ зэман ипэкIэ Афганистаным ирищIар. Демократие щиухуэну жиIэри, къэралыр зэхифыщIащ, цIыхухэр нэхъ тхьэмыщкIэж ищIащ. Хуэмеиж щыхъум, и дзэр иришыжащ. Хъарзынэу псэу Иракым Iэщэ шынагъуэ ещI жиIэщ, пцIы трилъхьэщ, ипщхьэри, цIыху мелуаным нэс щызэтриукIащ. Дуней псор къыщIэплъу, Хъусейн Сэддам щхьэпылъэ иригъэщIащ. ООН-м зы псалъэ жиIакъым абы теухуауэ. Ар зыщIар Урысейрауэ щытамэ, дуней псом щагъэвуунут, санкцэхэр къытракIутэу. А псор щIищIар Иракыр щIыдагъэкIэ къулейти аращ, нобэми а къэралым и къарур щIефыкI Америкэм. 
Совет Союзыр зыгъэлъэлъэжари США-рщ. Горбачев Михаил къыхуэгъэдэIуэну къилъытэри, дуней псор зыфIэлIыкIыу щыта къэралыгъуэшхуэм и лъэр щIихын щIидзащ. Америкэм и фIыгъэщ абы и ужь Ельцин Борис президенту зэрыхахар. Абы Урысейр зыхуишари дощIэ. Демократ нэпцIхэм къэрал мылъкур зэхуагуэшыжа нэужь, колхозхэр, заводхэр, фабрикэхэр зэтещэхат, цIыхухэр лэжьапIэншэ хъуат, лажьэхэми я улахуэр ирамыту къызэхэнат. 
Езым и жыIэм щIэт НАТО-р къигъэдаIуэри, Америкэр Югославиеми теуауэ щытащ. ИкIэм-икIэжым а къэралри цIыкIу-цIыкIуу игъэщэщэжащ. Абы къыкIэлъыкIуащ Ливиер. Мамыру псэу цIыхухэр хэкIуадэу, а къэралым зримыгъэужьын щхьэкIэ, абы и унафэщI Каддафи Муаммар уэрамым щрагъэукIауэ щытащ. Зэтракъута къэрал псоми езыхэм я телъхьэхэр трагъэувэжащ. 

Иджыпсту екIуэкIым теухуауэ

Украинэм щекIуэкIым и гугъу тщIымэ, фашистхэм я бэракъ фIыцIэжьыр къэзыIэтыжахэм я Iуэхур яхуэзыгъэдахэри США-рщ. Мы Iуэхур къызэрекIуэкIар сэ си щхьэкIэ си нэгу щIэкIащ. ЦIыхубэм президенту хаха Янукович Виктор лъэщыгъэкIэ традзри, Америкэм къызэщIигъэста хьэIуцыдзхэм лъэпкъ зэхэгъэжынкIэ ерыщ Порошенкэ Пётр трагъэуващ, езыхэм жаIэм зэрыфIэмыкIынур къагурыIуати. Аращ езыгъэжьар «Украинэм урысыбзэ щызекIуэу здэнукъым» къыхуеджэныгъэр. Къэралым насыпыншагъэу къыщежьа псори къызыхэкIар аращ. 
1964 гъэм Хрущёв Никитэ щыуагъэшхуэ ищIэу, Кърымыр Украинэм иритауэ щытащ. Тепщэныгъэр националистхэм щаубыдым, цIыхубэр арэзыуэ Урысейм гухьэжыну Iэ яIэтати, «Кърымыр дыдейщ» жаIэу хуежьащ. Америкэми а Iуэхур къадеIыгъ, тхыдэм зэрыхамыщIыкIым е псори ящIэу зэрабзыщIым къыхэкIыу. 
ЛНР, ДНР республикэхэри къызэрыунэхуамкIи къуаншэр Порошенкэщ. Луганск, Донецк областитIым щыпсэухэм я нэхъыбэр урысти, IэIэткIэ республикэ щхьэхуэ защIащ. Абы иужькIэ Минск щызэхуэса къэралиплIым абыхэм я унафэ къащта щхьэкIэ, Порошенкэ Iэ зытридза зэгурыIуэныгъэр игъэпэжакъым. РеспубликитIыр къарукIэ къаубыдыжыну хуежьауэ, илъэсий хъуауэ лъыгъажэ йокIуэкI. ООН-м зэрихьэлу, лей зытехьэ цIыхубэм къащхьэщыжын дэнэ къэна, дзэхупс зыIуригъэлъэдауэ, зыри имыщIэу фэ зытрегъауэ. Европэм и зы лIыщхьи къэувакъым Луганскрэ Донецкрэ къащхьэщыжу. США-р я пашэу, Урысейм санкцэхэр къыхуагъэув. ЯлъэкIамэ, хагъэкIуэдэжыпэнт. Ауэ си гугъэщ ди къэралыр а санкцэхэм къелыну. 
 Инджылызым и премьер-министр Джонсон Борис Урысейм и экономикэр зэтрикъутэныр нэрыгъыу иубыдауэ, лъэкI къигъанэркъым. Америкэм и президент Байден Джои зэпэщIэувахэр нэхъыбэрэ зэзауэмэ, нэхъ къещтэри, увыIэгъуэ имыIэу Украинэм Iэщэ къыхурегъашэ. Ардыдэм тетщ Германием и канцлер Шольц Олафи. Урысейр зауэкIэ ирикъуащ, Европэми адрей къыпэщIэува къэралхэми ятеуэну и мурадкъым. Украинэми щIихьар къэралыр къиубыдын щхьэкIэкъым, ДНР-мрэ ЛНР-мрэ лей ирахыр къигъэувыIэу, цIыхухэр хуиту игъэпсэун папщIэщ. Зеленский Владимир президент хэхыныгъэм щытекIуэну къыщIэкIынтэкъым, Минск щызэращIылIа зэгурыIуэныгъэм тетыну цIыхубэр къимыгъэгугъатэмэ. АрщхьэкIэ ари пцIыIуэпцIышэу къыщIэкIащ. ЦIыхухэр къызэригъэгугъам щыщу зыри игъэпэжакъым. Дауи, ари къэзыгъэдэIуар Америкэращ. Инджылызри Iуэхум къыхыхьэри, украинхэр иджырей IэщэкIэ яузэдын, зэуэкIэщIэхэм хурагъэсэн щIадзащ. А псор зыхуэунэтIар зырт – Урысейм къизэрыхьу, и лъэр щIихынырт. Илъэсийм нэсыхункIэ а псор зышэча Урысейм нэгъуэщI Iэмал къыхуэнэжатэкъым. Мыбдежым ди Президентым ищIа унафэр икъукIэ сфIэзахуэщ. Ди дзэр зэратекIуэнуми шэч къытесхьэркъым. 

Ди жагъуэгъухэм ялъэкIынур мащIэщ

Америкэм пэувыфу иджыпсту щыIэр Урысеймрэ Китаймрэ я закъуэщ. СанкцэкIэ ирагъэкIуэтыну къэралым иужь къихьами, абыхэм ялъэкIынур мащIэщ. Ди Урысейр къапщтэмэ, щIы и куэдщ, хъугъуэфIыгъуэу имыIэ щыIэкъым, гъавэхэкIкIи лыхэкIкIи и щхьэ хуэпIыжынущ. Абы Штат Зэгуэтхэри Европэм и къэралыгъуэхэри нэхъри къегъэлыб. США-м и щIэпхъаджагъэхэм щыщу сэтей къэхъуащ Украинэм биолабораторие зэрыщагъэлажьэри. Абы вирус шынагъуэхэр щагъэхьэзырын щIадзащ. Хуабжьу щхьэрыуа Украинэм и гугъэщ Америкэм фIыуэ къилъагъуу, и гур къыщIэузу. Украинэм и унафэщIхэм нобэми къагурыIуакъым ар къызэрагъэсэбэпыр. АпхуэдизкIэ Америкэм къыкъуогушхукIри, дэпсэлъейхэу, Урысейм кIэрымылъ кIэралъхьэу апхуэдэхэщ. Я мурадыр ЛНР-мрэ ДНР-мрэ къаубыдыжынрати, Урысейм япэ зригъэщри, я гуращэ фIейхэр къахузэпиудащ. Абыхэм я гупсысэр жыжьэ зэрынэмысым и щыхьэтщ Урысейм зыри жимыIэу и лъэпкъэгъухэр зэрыримыгъэукIынур къазэрыгурымыIуар. 
 Иджыпсту екIуэкI хъыбарыбэ зауэм хуэдэ игъащIэм щыIакъым. Илъэсий хъуауэ бэлыхь мащIэ яшэча зи гугъу тщIа республикитIым я цIыхухэм? Сабии балигъи щIыунэм щыпсэуауэ аращ. Хуиту мыбауэу, зы шхын IэфI ямышхыу, дунейм къытехьэн шынэу я зэманыр яхьащ. Украинэм и лIыщхьэхэм ахэр цIыхуу зэи къалъытакъым. XXI лIэщIыгъуэм апхуэдэ лъэпкъ зэхэгъэж зэрыщыIэр щхьэм къитIасэркъым. НАТО-м и дзэхэр Украинэм къимыгъакIуэми, Iэщэрэ ахъшэкIэ зыкъыщIегъакъуэ, Iуэхур зэтриуIэфIэным и пIэкIэ. МыувыIэжыххэр Байденрэ Джонсонрэщ. Мыдрей европэ тепщэхэми ялъэкI къагъанэркъым зауэр кIыхь ящIын щхьэкIэ. Урысейм и гуращэр зыщ – Украинэм ис урысхэр фашист къэунэхужахэм къаIэщIигъэкIыжу, я бзэкIэ псалъэу хуиту игъэпсэуну. Аращ ди къэралым и цIыхубэм мы IуэхумкIэ къищта унафэхэр Путин Владимир щIыдаIыгъыр. 
Къэралым хуащIа тхьэрыIуэм хуэпэжу зауэ IэнатIэм пэрыт ди сэлэтхэм лIыхъужьыгъэшхуэ къагъэлъагъуэ. Жагъуэ зэрыхъущи, хэкIуадэхэри щыIэщ. Абыхэм лъы щIракIутыр Урысейр зэрызахуэр, абы текIуэныгъэ къимыхьу зэрымыхъунур къагуроIуэри аращ. 
 

 

НЫБЭЖЬ Мышэ, Болэтей Адыгэ Хасэм и тхьэмадэ.
Поделиться: