Лэжьыгъэм кърикIуар къапщытэж

«Стены без наркотиков» фIащауэ Налшык къалэм 2019 гъэм и гъатхэпэ-бадзэуэгъуэ мазэхэм щрагъэкIуэкIащ наркотикхэмрэ акъылыр зыгъэутхъуэ пкъыгъуэхэмрэ зэращэ Iэмалхэм зэрапэщIэт Iуэху. А пIалъэм къриубыдэу псэупIэ, IуэхущIапIэ унэхэм я блынхэм трагъэкъэбзыкIащ наркотикхэр зыщэхэм я телефонхэмрэ сайтхэмрэ.

Налшык къалэ администрацэм щытепсэлъыхьащ щIалэгъуалэр наркотикым пэIэщIэ щIыным епха Iуэхухэм. Абы хэтащ КБР-м щыIэ МВД-м Наркотикхэр зэрызэрагъэкIуэкIым кIэлъыплъынымкIэ и управленэм (УНК), Налшык къалэ щIыпIэ администрацэм ЕгъэджэныгъэмкIэ и департаментым, КъБР-м Узыншагъэр хъумэнымкIэ и министерствэм я лIыкIуэхэр, «Урысейпсо цIыхубэ фронт»-м хэтхэр, КъБР-м и Iэтащхьэм Сабийм и хуитыныгъэхэмкIэ дэлажьэ уполномоченнэм и лэжьыгъэр къызэгъэпэщынымкIэ и IэщIагъэлIхэр, жылагъуэ зэгухьэныгъэхэм ящыщхэр, КъБР-м щыIэ МВД-м и Жылагъуэ советым хэт Мэкъушэ Русланрэ Урысей МВД-м Налшык къалэмкIэ и къудамэм и деж щыIэ Жылагъуэ советым и секретарь Тхьэщыгугъ Эллэрэ.
ИрагъэкIуэкIа Iуэхум кърикIуахэм къызэхуэсахэр щыгъуазэ ищIащ КъБР-м и ОНФ-м и эксперт Васин Влад. Абы къызэрыхигъэщамкIэ, Iуэхум хэтащ цIыхуи 300-м щIигъу. Къалэм и дэтхэнэ школми пэгъунэгъуу къагъуэтащ наркотикхэр зыщэхэм я телефон, сайт 50-м нэблагъэ, псори зэхэту 1500-м щIигъу. А псори лэчым щIрагъэхъумащ. ЗэIущIэм щыжаIащ мы лэжьыгъэм зэрыпащэнур.
 КъБР-м щыIэ МВД-м и УНК-м и оперуполномоченнэ нэхъыжь, полицэм и подполковник Давыдовэ Иринэ тепсэлъыхьащ хуит ямыщI пкъыгъуэхэр зэрагъэхьэзыр щIыкIэр Интернетыр къагъэсэбэпу зыгъэлъагъуэхэм я Iуэхур къызэпаудыным теухуауэ ирагъэкIуэкI лэжьыгъэм. - 2018 гъэм апхуэдэ сайт 96-рэ, мы гъэм 35-рэ къыщIэдгъэщащ,- жиIащ абы.
Республикэ УНК-м и лэжьакIуэхэм къыщIагъэщащ интернет-тыкуэным и операторыр ящIыгъуу наркотикхэкIхэр гъэтIылъыпIэ щэхухэр къагъэсэбэпу зыщэ щIэпхъаджащIэхэр. Абыхэм ятеухуа уголовнэ Iуэху къаIэтащ УФ-м и УК-м и 228-нэ статьям и 3-нэ Iыхьэм ипкъ иткIэ.
Интернетыр къагъэсэбэпу наркотикхэкIхэм щIалэгъуалэр тезыгъэгушхуэ цIыхуитI административнэ жэуапым ирашэлIащ.
КъаIэта Iуэхум теухуауэ къэпсэлъахэщ Налшык къалэ щIыпIэ администрцэм ЕгъэджэныгъэмкIэ и департаментым и къудамэм и унафэщI Тхьэгъэпсо Светланэ, Наркологие диспансерым и дохутыр-психиатр-нарколог Нагорная Татьянэ, ОНФ-м и IэщIагъэлI Мэкъуауэ Ислъам сымэ. Ахэр зэпкърыхауэ тепсэлъыхьащ Налшык къалэм дэт еджапIэхэм наркоманием, токсикоманием, фадэм япэщIэтыным ехьэлIауэ щрагъэкIуэкI лэжьыгъэм кърикIуахэм, къыхагъэщащ наркотикхэм теухуа рекламэхэр зыщIхэм яхь тезырыр гъэткIиин зэрыхуеймрэ щIалэгъуалэм наркологыр къебгъэплъыным пыщIа гугъуехьхэмрэ.