Жылагъуэ

Iэпкълъэпкъыр зыхъумэр

ЦIыхум и иммунитетым елъытащ и узыншагъэр. Абы ущехъумэ уз зэрыцIалэ зэмылIэужьыгъуэхэм. Iэпкълъэпкъым щымыщу зы налъэ закъуэ зэрыпкърыхьэу, иммунитетыр «къызэщIонэри», хузэфIэкI къигъанэркъым хамэр иукIынымкIэ, игъэкIуэдынымкIэ. Сыт иммунитет жыхуэтIэжыр зищIысыр, дэнэ ар здэщыIэр, дауэ зэрылажьэр?

ЦIыхубзхэр ягъэгушхуэ

Урысей гвардием и управленэу КъБР-м щыIэм и унафэщI, полицэм и полковник Васильев Сергейрэ абы и къуэдзэхэмрэ  я лэжьакIуэ цIыхубзхэм я махуэшхуэмкIэ ехъуэхъуащ.    
- Си гум къыбгъэдэкIыу сынывохъуэхъу мы махуэ гуфIэгъуэ икIи гуапэмкIэ.  Фэращ  ди  Iуэхум щыдищIэгъэкуэныр, ехъулIэныгъэщIэхэм дыхуэзыгъэушыр. Къулыкъум адэкIи ехъулIэныгъэхэр щызыIэрывгъэхьэну, узыншагъэ быдэ фиIэу сыт щыгъуи фыкъэзыухъуреихь  Iыхьлыхэм  я IэфIыгъэр зыхэфщIэну си гуапэщ, - жиIащ Васильев Сергей.  

Галстук

Ди зэманым цIыхухъу фэилъхьэгъуэхэм ящIыгъуу къагъэсэбэп галстукыр. Дапщэщу пIэрэ ар зыдалъхьэн щрагъэжьар, сыту пIэрэ щхьэусыгъуэ хуэхъуар? Галстукым тхыдэ гъэщIэгъуэн иIэщ, къызэрыщIэкIымкIэ.
Дуней псом щыцIэрыIуэ франджы тхакIуэ Оноре де Бальзак 1827 гъэм къыдигъэкIа «Искусство ношения галстука» тхылъым щытотхыхь ар щыгъыным и гуэдзэн пэтми, абы фэилъхьэгъуэм и теплъэр куэд дыдэкIэ зэрелъытар. «ЕкIуу къыхэха галстукыр дыхуфIым хуэдэщи, фэилъхьэгъуэр егъэдахэ; галстукым уеплъмэ, ар зыдэлъым теухуауэ куэд къыпхуэщIэнущ…», - жеIэ.

Кавказ Ищхъэрэм щоужьэрэкI

  «Кавказ.РФ»-м и пресс-IуэхущIапIэм иджыблагъэ къызэритамкIэ, Кавказ Ищхъэрэм и щIыналъэхэм зегъэужьынымкIэ щыIэ къэрал программэм 2023 гъэм зэфIагъэкIын хуейуэ къыщагъэлъэгъуа Iуэхугъуэхэр процент 99,9-кIэ ягъэзэщIащ. 20I4 гъэм щегъэжьауэ апхуэдэ бжыгъэхэм иджы япэу нэсыфауэ аращ. 
КИФЩI-м зегъэужьынымкIэ къэрал программэр Урысей Федерацэм и Правительствэм и унафэкIэ УФ-м Экономикэ зыужьыныгъэмкIэ и министерствэм егъэзащIэ. Псори зэхэту сом мелард I6,6-рэ нэгъабэ абы хуаутIыпщащ. 

ГъуэгупщIэхэр хуат

Урысейм и Социальнэ фондым и къудамэу Къэбэрдей-Балъкъэрым щыIэм иджыблагъэ къызэритамкIэ, льготэ зэхуэмыдэхэхэр зиIэ цIыху 550-м загъэхъужыну здэщыIа щIыпIэхэм зэрыкIуам-къызэрыкIуэжам текIуэда гъуэгупщIэхэр хуапшыныжащ. 
2023 гъэм къэралыр щхьэхуэу зыдэIэпыкъу цIыхухэм зыщагъэхъуж курортхэм, санаторэхэм зэрыкIуэну, къызэрыкIуэжыну билету 1834-рэ къащэхуащ, интернетыр къагъэсэбэпу. УФ-м и Социальнэ фондым и щIыпIэ къудамэм цIыхухэм гъуэгупщIэм трагъэкIуэдахэм щыщ яхуэпшыныжыным сом мелуани 10 хухихащ.

Лъы хуэныкъуэхэм папщIэ

Урысей гвардием и управленэу КъБР-м щыIэм и СОБР-м и лэжьакIуэхэм даIыгъащ «Зы гум къыбгъэдэкIыу адрейм хуэкIуэу» акцэр икIи хуэныкъуэхэм папщIэ лъы ятащ. 
 Лъы щыхаш республикэ станцым екIуэлIащ Урысей гвардием щылажьэхэм ящыщу цIыхуи I0, апхуэдэуи къэралым щIыхь зиIэ и донор, щIыналъэ управленэм и ветеранхэм я советым и тхьэмадэ, полицэм и полковникыу къулыкъум къыхэкIыжа Хужьокъуэ Руслан ящIыгъуу.  

Суд приставхэм я чемпионатым

Урысей Федерацэм и Суд приставхэм я къэрал къулыкъущIапIэм и управленэу КъБР-м щыIэм и лэжьакIуэхэу Хьэкъул Ибрэхьимрэ Гъуэтыж Темыркъанрэ зэуэкIэ спорт лIэужьыгъуэ зэхэтхэмкIэ иджыблагъэ екIуэкIа республикэ зэхьэзэхуэм япэ увыпIэр къыщахьащ. Иджы абыхэм Iэмал яIэ хъуащ УФ-м и ФСПП-м и чемпионатым и кIэух зэпеуэм хэтыну. 
Къыхэдгъэщынщи, зэхьэзэхуэхэр Олимп мардэхэм тету ирагъэкIуэкIащ – хагъэщIар занщIэу хэкIыу. Я хьэлъагъ елъытауэ спортсменхэр гупийуэ гуэшауэ щытащ. 

Китайм дэлэжьэну я мурадщ

Къэбэрдей-Балъкъэрым и Правительствэм иджыблагъэ къыщрагъэблэгъащ Китайм жыг хадэм къыщагъэсэбэп техникэхэр къыщыщIэзыгъэкI  «SHANDONG NUOMAN ENGINEERING MACHINERY CO.,LTD» заводым и лIыкIуэ Ван Ченг.

Къалэр дадийр гъатхэм и нэщэнэщ

Гъатхэм и нэщэнэ дахэхэм ящыщщ къалэр дадий зэмыфэгъухэм нэр ягъэгуфIэ зэрыхъур. Ди къэралым хабзэ щыхъуащ гъатхэпэм и 8-м бзылъхугъэхэм а гъэгъа дахэхэр ирату. Ахэр зэмыфэгъущ, щхьэж фIэфIыр къыхихыу. АтIэ къалэр дадийхэм я теплъэр зэрыдахэм хуэдэу, езым я хьэл яхэлъыжщ, тхыди яIэщ. Удз гъэгъам нэхъри нэIуасэ зыхуэпщIыну гъэщIэгъуэнщ.

Къалэр дадий лъэпкъыгъуэу мини 10-м нэблагъэ щыIэщ.

ЛIэужьыгъуэщIэ къэбгъэкIыным илъэс 20 хуэдиз токIуадэ.

Дунейм псом къалэр дадийр къыщалъытэ гухэлъым, насыпым, гуапагъэм, псэхугъэм я нэщэнэу.

Адыгэбзэм и къежьапIэр

Адыгэ лъэпкъым и бзэм, хабзэм, тхыдэм и къежьапIэр къэтIэщIыным  яужь иту, тхакIуэ Мэржэхъу Мухьэмэд хамэ къэрал зыбжанэм къыщыщIидзащ. Адыгэм и псэм, и дунейм, и философием и купщIэр къыщыунэхуа щIыпIэмрэ зэманымрэ къилъыхъуэу, абы зэгъэпщэныгъэкIэ къихутащ Индием и литературэбзэу къалъытэ санскритымрэ адыгэбзэмрэ зы лъабжьэ яIэу. Мухьэмэд иригъэкIуэкIа лэжьыгъэмкIэ  къыбгуригъэIуэну хэтщ адыгэбзэм нэхърэ нэхъыжь зэрыщымыIэр, уеблэмэ дунейм лъэпкъыу тетыр къызытепщIыкIыжахэр абы ирипсалъэу щытауэ хуегъэфащэ.

Страницы

Подписка на RSS - Жылагъуэ