|
|
Календарь событий
03 мая 2024
3 мая, 2024 - 17:48
Къэрэшей-Шэрджэсым и Лъэпкъ Зэхуэсым и депутату щыта, самбэмкIэ дуней псом и чемпион Къуныжь Мухьэмэд и фэеплъ зэхьэзэхуэ иджыблагъэ Черкесск къалэм щекIуэкIащ. Ар къызэрыхах зэпеуэу щытащ икIи абы хэтащ Кавказ Ищхъэрэмрэ Урысей Ипщэмрэ я бэнакIуэу 200-м нэблагъэ, я ныбжькIэ илъэс 16-м щIимыгъуауэ.
Къэбэрдей-Балъкъэрым и цIэкIэ зэхьэзэхуэм щыбэна Къудей Беслъэн килограмм 49-рэ хъухэм я деж дыщэ медаль къыщихьащ. Абы зымащIэкIэ къакIэрыхуащ Джэданэ Къантемыррэ (кг 46-рэ), Къанщауэ Темырланрэ (кг 53-рэ). Абыхэм зэхьэзэхуэм и домбеякъ медалхэр зыIэрагъэхьащ.
3 мая, 2024 - 16:51
Мэлыжьыхьым и 18 - 19-хэм Урысей МВД-м и Краснодар университетым и Ставрополь къудамэм щекIуэкIащ Урысей МВД-м и щIыналъэ органхэм балигъ мыхъуахэм я IуэхухэмкIэ я IэнатIэхэмрэ хабзэм ебэкъуа балигъ мыхъуахэр пIалъэкIэ щаIыгъ я центрхэмрэ я лэжьакIуэхэр «И IэщIагъэкIэ нэхъыфI» цIэм щыщIэбэна урысейпсо зэхьэзэхуэм и етIуанэ Iыхьэр.
Абы хэтащ Кавказ Ищхъэрэ федеральнэ округым къэрал кIуэцI IухухэмкIэ и щIыналъэи 7-м щыщу япэ Iыхьэм щытекIуахэр.
3 мая, 2024 - 16:00
ЗыгъэпсэхуакIуэхэр Къэбэрдей-Балъкъэрым къокIуэ и гуэл щхъуантIэхэр, псыкъелъэ цIэрыIуэхэр зрагъэлъагъуну, аузхэм къыщакIухьыну, псы хущхъуэ ирафыну, Iуащхьэмахуэ Iуплъэну, дэкIыну.
ЩIыналъэм иIэщ щIыпIэ телъыджэхэри, лъэпкъхэм я тхыдэр зи напщIэ телъ чэщанэхэри, Iуащхьэхэри, пасэрей жылэхэри. Иджыблагъэ интернетым дыщрихьэлIащ Къэбэрдей-Балъкъэрым и щIыуэпс хъугъуэфIыгъуэхэм ящыщу Iэмал имыIэу зэгъэлъагъун хуейуэ «Комсомольская правда» къыдэкIыгъуэм игъэбелджыла ди щIыпIэ дахэу 40-м.
3 мая, 2024 - 15:27
Космонавтикэм и махуэм и щIыхькIэ Минводы къалэм футболымкIэ зэхьэзэхуэ иджыблагъэ щрагъэкIуэкIащ. Абы хэтащ Социалист Лэжьыгъэм и ЛIыхъужь Щауэ Iэхьед и цIэр зэрихьэу Бахъсэн къалэм дэт спорт еджапIэм и гъэсэнхэр икIи ехъулIэныгъэхэр яIэу къагъэзэжащ.
3 мая, 2024 - 15:00
ЩIымахуэ шылэм и кум мылым утемыхьэ, жыхуаIэ зэманыр икIат. Вагъуэбэр щIым зэрыхыхьэжрэ адыгэхэм я хьэщIа Уэсгуащэ и ежьэжыгъуэр къэсат. ХьэщIапIэрынэр зэрыемыкIур абы ищIэрти, зимыгъэгувэмэ, нэхъыфIу къилъытащ. Гъуэгу техьэжын ипэ Уэсгуащэм мурад ещI мэзым кIуэну. Абы фIэфIт щIэх-щIэхыурэ щIымахуэ мэзым зыщиплъыхьын, уэсбзууплъымрэ цIыжьдадэмрэ я уэрэд жьгъырухэм щIэдэIун. А цIыкIухэм я фIыгъэкIэ щIымахуэ мэзыр даущынши зэшыгъуи Уэсгуащэ къыщыхъуртэкъым. Уаем щымышынэ а бзухэр Уэсгуащэм и ныбжьэгъут.
3 мая, 2024 - 14:24
Iустаз Гуащокъуэ Абдулбакъий нэхъыбэм зэрацIыхур дин ущиякIуэущ. Ауэ ущиякIуэм прозэуи усэуи литературэм и хъугъуэфыгъуэхэм хыубжэфыну зэдзэкIыгъэ къызэрымыкIуэхэр иIэщ. Апхуэдэхэм я зы щапхъэ фи пащхьэ ныдолъхьэ.
Хъалифэхэм ящыщ гуэрым Мысырым (Египет) усакIуэхэр иригъэблэгъат. Зы щIалэжь, и дамэм кхъуэщын кумбыгъэ тету, псы къригъэхъуэну кIуэрэ пэт, мо усакIуэ гупым яхуозэ. Захегъэпшахъуэри, я гъусэу макIуэ. Къеблэгъахэр хъалифэм егъэлеяуэ къигъэхьэщIэу здэщысхэм, мо лIы щыгъыныджэ бэлэбанэу кхъуэщын кумбыгъэ зыIыгъым тохуэ и нэр. ЙоупщI:
3 мая, 2024 - 13:22
3-нэ Iыхьэ
Жэщ ныкъуэ хъуат. Хъуами, Зерэ жейкъым, сэри щхьэгъубжэм къыдэплъ мазэм и нур къащхъуэм си нэхэр тедияуэ, сыщылъщ. Сызэгупсысыр зыт – дауэ къела а псом Пэрыс тхьэмыщкIэ. ГъэщIэгъуэнщ ар делэ дыдэ зэрымыхъуар. Сыту сыцIыху гущIэгъуншэ! И нэр исщIу зымахуэ жесIащ, делэщыр нэгъуэщIыпIэкIэщ, жысIэри. ТхьэмыщкIэ!
- НтIэ, сымаджэщым ?
- Мышхэ-емыфэрэ икIи мыжейуэ къанэри, къарууншэ дыдэ хъуати, мэлIапэ щIалэр, жаIэри, и адэ-анэм къыщIагъэгъуэлъхьащ. Иджыри шхэкъым ар, хущхъуэкIэ и гъащIэ махэ хъуар яIыгъыу аращ, - а псалъэхэмкIэ Зерэ жейм хилъэфэжащ.
3 мая, 2024 - 13:15
Ислъам щIэныгъэлIышхуэ Гъэзэлий Iэбу Хьэмид «Дин щIэныгъэхэр къэгъэпсэужын» тхылъ цIэрыIуэм щытопсэлъыхь махуэ щхьэхуэхэм къадекIуэкI псапэ нэмэзхэм я щIыкIэр. Абыхэм я щапхъэщ мэрем махуэм хухэхар.
3 мая, 2024 - 13:00
Франджым и президент Макрон Эммануэль нахуэу жиIащ Атлантикэ ищхъэрэ блокым хэт къэралхэм я зауэлIхэр Украинэм ягъэкIуэн хуейуэ. Ауэ шынагъуэ дыдэ зыпылъ а лъэбакъуэхэр зэкIэ даIыгъакъым. ИтIани нэщэнэ щIагъуэкъым абы тепсэлъыхьу зэрыщIадза къудейр. Ауэ быдэу фIэщ щIыгъуейщ арыншами нэхъри зэкIэщIэкI, зэгурымыIуэж хъу «Европэ зэкъуэтыр» мыбдеж щызэкъуэувэну. Абы хыхьэ къэралхэм езыхэм дзыхь зыхуащIыжыркъым. Псалъэм и хьэтыркIэ, гугъущ франджыхэмрэ инджылызхэмрэ зызэхащIыкIауэ уи нэгу къыщIэбгъэхьэну. Англосакскэм укъызэрамыгъэпэжынур фIыуэ къагуроIуэ нэгъуэщIхэми.
3 мая, 2024 - 12:26
Псы хущхъуэхэр хъумэнымрэ ахэр къыщыщIэж щIыпIэхэр зэIузэпэщ щIынымрэ ехьэлIа лэжьыгъэхэм пащэ.
Къэбэрдей-Балъкъэрым и Правительствэм гъэ кIуам унафэ къищтащ цIыхухэм я узыншагъэр егъэфIэкIуэнымкIэ, ди щIыналъэм турист нэхъыбэ къешэлIэнымкIэ мыхьэнэшхуэ зиIэ Джылы-Су аузыр сыт и лъэныкъуэкIи хъумэным теухуауэ. А щIыпIэм щIыуэпсым (псы къыщIэжыпIэхэм, хьэуам, щIым, мэзхэм) зэран хуэхъу лэжьыгъэ щрагъэкIуэкIынукъым, ихъуреягъыр хъупIэу къагъэсэбэп, Iэщ фермэхэр, псэупIэ унэхэр, кхъэхэр щаухуэ хъунукъым.
3 мая, 2024 - 11:18
Май щIыналъэм гъатхэ губгъуэ лэжьыгъэхэм щоужьэрэкI, -къитащ иджыблагъэ щIыпIэ администрацэм мэкъумэш-промышленнэ комплексымкIэ и управленэм. Дызэрыт илъэсым гъатхасэм абы щыхухахынущ гектар 10567-рэ.
НобэкIэ жылэхэр зыхасар къэдгъэлъагъуэмэ: сэхураныр гектар 410-м, зэнтхъыр – гектари 146-м, хьэр – гектар 350-м, гуэдзыр – гектар 60-м хагъэзэгъащ. Iэщым щхъуантIэу ирагъэшхыну къэкIыгъэхэм гектар 12836-рэ хухахащ.
3 мая, 2024 - 10:01
Куржы щIыналъэм щызекIуэ щIыпIэ фIэщыгъэ куэдым я лъабжьэр адыгэбзэм къызэрыщежьам икIи ахэр щызекIуэ Куржым и Iыхьэм адыгэхэр зэрисам топсэлъыхь куржы щIэныгъэлI Джанашиа Симон.
3 мая, 2024 - 09:58
УФ-м и еджакIуэхэм художественнэ гимнастикэмкIэ я урысейпсо спартакиадэм и 2-нэ Iыхьэр иджыблагъэ Астрэхъан къалэм щекIуэкIащ. Абы хэтащ Урысей Ипщэмрэ Кавказ Ищхъэрэмрэ я щIыналъэхэм я командэ 13, спортсменхэм я ныбжьыр илъэс 13 - 15-хэм къриубыдэу.
Къэбэрдей-Балъкъэрым и хъыджэбз цIыкIухэм я командэм гуп зэпеуэхэм етIуанэ увыпIэр къыщыхуагъэфэщащ. Абы хэтащ Балъкъыз Камилэ, Курдаевэ Элизэ, Мэкъуауэ Даянэ, Созаевэ Софие, Шыбзыхъуэ Сабинэ, Балэ Таисие, Караевэ Александрэ, Разореновэ Дианэ, Подливаевэ Елизаветэ, Чирковэ Виталие сымэ.
3 мая, 2024 - 09:08
Накъыгъэм и 3, мэрем
Печатыр зыми и унафэ щIэмытыным и дунейпсо махуэщ
Дыгъэм и дунейпсо махуэщ
1957 гъэм КПСС-м и ЦК-мрэ СССР-м и Министрхэм я Советымрэ унафэ къащтащ колхозхэр совхозу зэхъуэкIыным теухуауэ.
Дунейм и щытыкIэнур
«pogoda.yandex.ru» сайтым зэритымкIэ, республикэм уфауэ щыщытынущ. Хуабэр махуэм градус 14 - 16, жэщым градуси 6 щыхъунущ. ЩIым и малъхъэдис щытыкIэм балли 3-кIэ зихъуэжынущ.
|
