Календарь событий

Урысей Федерацэм ММА-мкIэ пашэныгъэр къыщыхьыным хуэунэтIа зэхьэзэхуэ Выборг къалэм щекIуэкIащ. Абы хэтащ Къэбэрдей-Балъкъэрым и Май щIыналъэм и спортсмен ныбжьыщIэхэр икIи ехъулIэныгъэхэр яIэу къагъэзэжащ.

Налшык, Совет Союзым и ЛIыхъужь Калюжный Николай и цIэр зезыхьэ ебланэ курыт еджапIэм къыщызэIуахащ абы щеджа щIалэхэу дзэ къулыкъум пэрыту зи псэ зытахэм я фэеплъ пхъэбгъухэр. Сирием щекIуэкIа зауэм къулыкъу щызыщIэу хэкIуэда Сокъур Эдуард, Украинэм щекIуэкI дзэ Iуэху хэхам зи псэр щызыта Щэрмэт Владислав, ЦIыпIынэ Анзор, Ирыгу Рустам, Унэгъэс Тембот сымэ я фэеплъыр яхъумэнущ еджапIэм и бжэр пщэдджыжь къэс къызэIузых егъэджакIуэхэмрэ еджакIуэхэмрэ. 

КъБР-м и Музыкэ театрым и дирижёр, ГъуазджэхэмкIэ Кавказ Ищхъэрэ къэрал институтым и егъэджакIуэ, лъэпкъыбэ зэпеуэхэм я лауреат Лэкъун Азэмэт макъамэм зэфIэкI щиIэщ.

Шэрджэсыбзэр бджа нэужь, дунейм нэхъыбэу къыщагъэсэбэп адрей бзэхэр тынш дыдэу къыпщыхъуну къалъытэ. АрщхьэкIэ анэдэлъхубзэр сабийм Iурылъын щIыхуейм и мыхьэнэр, ди жагъуэ зэрыхъунщи, ди зэманым адэ-анэ куэдым къагурыIуэркъым. Хэти къелъытэ абы урипсэлъэф къудеймэ ирикъуну. Адыгэбзэм и зыужьыкIэм тегузэвыхьу, уеблэмэ тхакIуэ-усакIуэхэри тотхыхь: «Насып иIэжкъым лъэпкъым бзэр фIэкIуэдмэ», - жеIэ Къагъырмэс Борис, «КIуэдыжмэ си адыгэбзэр, хэкIынущ си адыгэпсэр» - зэхелъхьэ Мыкъуэжь Анатолэ. 

Анэдэлъхубзэр зи Iэпэгъухэм ямыщIэнкIэ Iэмал иIэкъым бзэр ефIэкIуэн папщIэ зэдзэкIыгъэхэм мыхьэнэшхуэ зэраIэм. ХамэбзэкIэ дунейм щыцIэрыIуэ хъуа тхыгъэхэм сыт хуэдизу акъылыр ямытхьэкъуми, «адыгэпсэ къаIукIа» нэужь, ахэр гум пэгъунэгъу мэхъу, зи бзэр зыщIэм и гупсысэм лъагъуэщIэ къыхузэIуех, анэдэлъхубзэр упсэуху гугъэтыс Iэмэпсымэу узэриIэр къуигъэщIэжу. Апхуэдэ хъугъуэфIыгъуэхэм язу адыгэ литературэм егъафIэ куржы усакIуэ Руставели Шота и IэдакъэщIэкI «Къаплъэныфэ зыщыгъ зекIуэлыр», усакIуэ гъуэзэджэ Тхьэгъэзит Зубер зэридзэкIар.

Нальшык дэт модельнэ библиотекэ №10-м кърагъэблэгъащ Хэку зауэшхуэм и ветеран Абросимов Кузьмарэ Украинэм щекIуэкI дзэ Iуэху хэхам хэт Шевчук Германрэ. Мы Iуэхум хэтащ Налшык къалэ администрацэм и унафэщIым и къуэдзэ Атмурзаевэ Земфирэ, библиотекэм и лэжьакIуэхэр, къалэдэс ныбжьыщIэхэр. 
Хэку зауэшхуэр зи нэгу щIэкIа нэхъыжьыр щIэблэм яхутепсэлъыхьащ зауэ гъуэгур зэрылIыгъэщIапIэм, Хэкур зыхъумэр къикIуэт зэрымыхъум, хэкупсэу ущытыным и мыхьэнэм. ШколакIуэхэр куэдым иригъэгупсысащ хуахуагъэрэ гуауэрэ къызыхэщ хъыбархэм, ахэр къазэрыщыхъуамкIи я хьэщIэ лъапIэм дэгуэшахэщ.

Урысей МВД-м и Прохладнэ къудамэм щекIуэкIащ къызэднэкIа 2024 гъэм я лэжьыгъэм кърикIуахэр къыщызэщIакъуэжа зэIущIэ. Абы хэтащ Къэрал кIуэцI IуэхухэмкIэ министру КъБР-м щыIэ, полицэм и генерал-майор Крючков Вячеслав. 
ЗэIущIэм щаубзыхуащ къудамэм къегъэщIылIа IэнатIэхэм я лэжьыгъэр зэраунэтIынур, хэплъащ нэхъыщхьэу я нэIэ зытетыпхъэхэм: мылъкум ехьэлIа щIэпхъаджагъэхэр къыщIэгъэщыныр, гъуэгу-транспорт къэхъукъащIэхэр гъэмэщIэныр, лэжьакIуэхэр къыхэхынымкIэ ирагъэкIуэкI Iуэхухэм.