Календарь событий

Ди лъэпкъэгъуу дунейм тет псоми зэ­дэдгъэлъапIэ Адыгэ тхыбзэм и махуэр зытещIыхьар ди анэдэлъхубзэр хъумэнырщ, абы зегъэу­жьы­нырщ, щIэблэхэм гъащIэ гъуэ­мылэу къахуэгъэ­нэнырщ. 

Бзэр лъэпкъым и псэщ, бзэр лъэпкъым и ­дамэщ, жаIэ. 

Лъэпкъ мащIэ псоми я зэхуэдэ гуныкъуэгъуэщ нобэкIэ анэдэлъхубзэр хъумэн хуейуэ дызэрыува ­щы­тыкIэр. Глобализацэм дэкIуэд бзэмрэ щэнхабзэмрэ зыIэщIэдмыгъэкIыпэн папщIэ жылагъуэ зэгухьэныгъэхэми къэрал унафэщIхэми лэжьыгъэшхуэ ирагъэкIуэкI. Абыхэм ящыщщ анэ­дэлъхубзэр ­хъумэнымрэ зегъэу­жьы­нымрэ теу­хуауэ къэрал куэдым я лыкIуэ хэту иджыблагъэ Мейкъуапэ ­къалэм щрагъэкIуэкIа зэIущIэр. 

Зи щхьэ пщIэ хуэзы­щIыж дэтхэнэри, ар цIыху щхьэхуэу, лъэп­къыу е къэралу щрет, йогу­гъу икIи гулъы­тэш­хуэ хуещI къыщIэхъуэ щIэблэм гъэсэныгъэ тэ­мэм етыным, цIыкIухэм я псэр къабзагъэм, щIэ­ныгъэм хуэгъэушыным, а анэдэлъхубзэр яIуры­лъу, зыщыщ лъэпкъым и хабзэхэмрэ щэнхаб­зэм­рэ щыгъуазэу, ахэр зыхуэбгъадэ хъун щы­мы­Iэ фIыгъуэу зэры­щы­тыр хьэкъыу япхы­кIауэ къэгъэтэджыным. 

Къэхъун къуажэм дэт курыт еджапIэ №2-м иджыблагъэ зэIущIэ щхьэпэ щекIуэкIащ. 7-11-нэ классхэм щIэс еджа­кIуэхэр хуагъэзащ тхакIуэ, журналист, ЩIэныгъэхэмкIэ Дунейпсо Адыгэ академием хэт, корреспондент Фырэ-Къаныкъуэ Анфисэ, тхыдэ щIэныгъэхэмкIэ магистр, адыгэм и пасэрей щэнхабзэмрэ гъуазджэхэмкIэ щIэныгъэлI Гувэжокъуэ ДжэбрэIил, адыгэ уэ­рэдыжьхэр зэхуэзыхьэсыж, зыгъэзащIэ Тэхъу Мухьэмэд, УФ-м и альпинист, Iуащхьэмахуэ 139-рэ дэкIа Шыбзыхъуэ Казбек сымэ.