|
|
Календарь событий
21 мая 2026
21 мая, 2026 - 16:28
ПащIэ Бэчмырзэ и музей Нартан къуажэм дэтым зэхыхьэ дахэ накъыгъэм и 16-м щекIуэкIащ. Ар Музейхэм я махуэм, хабзэ зэрыхъуауэ, гъэ къэс ирагъэхьэлIэ.
Адыгэ литературэм и лъабжьэр зыгъэтIылъа, губзыгъэу, жьэнахуэу, усакIуэу дунейм тета лIы Iущыр ягу къагъэкIыжащ, абы и IуэхущIафэхэм ящыщхэм тепсэлъыхьащ къызэхуэсахэр.
21 мая, 2026 - 15:30
«Музейхэм я жэщ - 2026» урысейпсо Iуэхум ди щIыналъэри жыджэру хэтащ. КъБР-м и Лъэпкъ, СурэтыщI гъуазджэхэмкIэ музейхэм щекIуэкIащ зэIущIэ гъэщIэгъуэнхэр.
Хабзэ зэрыхъуауэ, иужьрей илъэсхэм ди къэралым щрагъэкIуэкI мы щэнхабзэ Iуэху щхьэпэр. Ар къыхэзылъхьахэм я мурадыр цIыху нэхъыбэ, псом хуэмыдэу ныбжьыщIэхэр, музейхэм кърашалIэу хуэсакъыу яхъумэ хъугъуэфIыгъуэхэм, щапхъэу къалъытэ цIыху цIэрыIуэхэм, лIыхъужьхэм я гъащIэм щагъэгъуэзэнырщ.
21 мая, 2026 - 12:30
 Къэрэшей-Шэрджэс Республикэм и телевиденэм и лэжьакIуэ Къардэн Заремэ, «Адыгэ псалъэ» газетыр къигъэсэбэпу, псалъэ гуапэ хужиIэну мурад ищIащ филологие щIэныгъэхэмкIэ кандидат, Къэрэшей-Шэрджэсым Гуманитар къэхутэныгъэхэмкIэ и институтым и щIэныгъэрылажьэ нэхъыжьу илъэс куэдкIэ щыта, Урысейм и Журналистхэм я зэгухьэныгъэм хэт, Телевиденэмрэ радиомрэ я отличник, КъШР-м щIыхь зиIэ и журналист Брат Хьэсин Сэхьид и къуэм.
21 мая, 2026 - 12:26
Нобэ хуэдэ щыгъуэ махуэм дигу къигъэкІын хуейщ Урысей пащтыхьыгъуэм къыдищIылIа, цIыхугъэм къимытIасэ зауэ гущІэгъуншэр тщыгъупщэ зэрымыхъунур, лажьэ зимыIэ цIыхухэм хьэзабу ирагъэшэчар.
ЦIыхум нэхъ гузэвэгъуэ дыдэу и щхьэ кърикІуэфынур – лъэпкъгъэкIуэд зауэр – Урыс пащтыхьыгъуэм къыдищIылIат: ди лъахэр тфIигъэкIуэдащ, ди лъэпкъэгъухэр минищэ бжыгъэкIэ зауэм хэкIуэдащ, цIыху мелуаным нэблагъэр я хэку ирахури, Уэсмэн пащтыхьыгъуэм къыщыщІидзащ.
21 мая, 2026 - 11:00
ЩIэныгъэлI цIэрыIуэ, профессор МэкIэтIей Абдулыхь Къасболэт и къуэр къыщалъхуа махуэм ирихьэлIэу фэеплъ зэIущIэ гукъинэж щрагъэкIуэкIащ Къэбэрдей-Балъкъэр къэрал университетым. Полимер материалхэм ятеухуа щIэныгъэм зэрызиужьыр, молекулярнэ зэгухьэныгъэ лъагэхэм ехьэлIауэ щIэныгъэ школ телъыджэ зэрызэфIэувар куэдкIэ и фIыщIэщ щIэныгъэлIым. Химико-биологие корпусым и пщIантIэм дэт фэеплъ мывэм деж щызэхуэсащ абы къихута щIэныгъэм нобэ пызыщэхэр: Математикэмрэ естественнэ щIэныгъэхэмкIэ институтым и егъэджакIуэхэмрэ студентхэмрэ.
21 мая, 2026 - 09:30
2000 - 2025 гъэхэм къриубыдэу Урысеймэкъумэшбанкым и ахъшэу сом мелард 845-рэ Кавказ Ищхъэрэм и щIыналъэхэм кредиту яритащ икIи, абы и фIыгъэкIэ, КИФЩI-м къыщыщIагъэкI языныкъуэ мэкъумэш продукцэхэм я куэдагъым хуэдэ 11-кIэ хагъэхъуащ.
ДызыхуэкIуэ илъэси 5 - 7-м Кавказ Ищхъэрэм иджыри щагъэзэщIэнущ инвестицэ пэхуэщIэу псори зэхэту сом меларди 160-рэ я уасэ. Проектхэр нэхъыбэу зыхуэунэтIар мэкъумэш къэкIыгъэхэмкIэ, Iэщ гъэхъунымкIэ, продукцэхэм елэжь IэнатIэхэмрэ ахэр гъэIэпхъуэным пыщIа IуэхущIапIэхэмрэ зегъэужьынырщ.
21 мая, 2026 - 09:00
Накъыгъэм и 21, махуэку
Кавказ зауэм хэкIуэда адыгэхэм я фэеплъ махуэщ
1864 гъэм илъэсищэм щIигъукIэ екIуэкIа Кавказ зауэр увыIащ.
2004 гъэм Налшык къалэм къыщызэIуахащ Кавказ зауэм хэкIуэда адыгэхэм я фэеплъ.
Дунейм и щытыкIэнур
«pogoda.yandex.ru» сайтым зэритымкIэ, республикэм уэшх къыщешхынущ. Хуабэр махуэм градус 19 – 21-рэ, жэщым градус 13 - 14 щыхъунущ.
Лъэпкъ Iущыгъэ:
Гурэ гурэ лъагъуэ зэхуаIэщ.
|
