IэщIагъэхэм щыхурагъаджэ IуэхущIапIэхэм я зэфIэкIым хохъуэ

«Егъэджэныгъэ» лъэпкъ проектым ипкъ иткIэ республикэм и еджапIэу 3-м федеральнэ грантхэр иратащ, псори зэхэту сом мелуан 68,5-рэ хъууэ. Абы и хьэкъкIэ а еджапIэхэм къыщызэIуахащ IэщIагъэхэм зыщыхуагъасэ иджырей лъэщапIэу 15. Грантхэм я хьэкъкIэ зи Iуэхур езыгъэфIэкIуахэм ящыщщ «Къэбэрдей-Балъкъэр автомобиль-гъуэгу колледж», «Къэбэрдей-Балъкъэр гуманитар-техническэ колледж», «УхуакIуэ» Къэбэрдей-Балъкъэр колледж» еджапIэхэр.

Дэтхэнэ еджапIэми иджырей Iэмэпсымэхэмрэ техникэмкIэ къызэгъэпэща лъэщапIэу тху щылажьэу хуежьащ. Абыхэм IэщIагъэм щыхуагъасэ автомашинэхэм я кузовхэр, автомобиль псынщIэхэр зэзыгъэпэщыжхэр, автомобилхэр зылэхэр, хьэлъэзешэ техникэр зезыхьэхэр, хьэлъэхэр автомобилкIэ зыгъэIэпхъуэхэр, бизнесым папщIэ программэхэр зыгъэхьэзырхэр, псэупIэ унэхэм я инженер инфраструктурэр зезыхьэхэмрэ унэхэр зыгъэплъхэмрэ, апхуэдэу ухуэныгъэм ехьэлIа IэщIагъэ зэмылIэужьыгъуэхэр зэзыгъэгъуэтхэр.
IэщIагъэлIхэр гъэхьэзырынымкIэ центрхэр къыщызэIуахым хэтащ КъБР-м и Правительствэм и УнафэщIым и къуэдзэ Хъубий Марат, КъБР-м бжыгъэхэр зи лъабжьэ зыужьыныгъэмкIэ и министр Ащхъуэт Ислъам, КъБР-м цIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министрым и къалэнхэр зыгъэзащIэ Къумыкъу Iэуес, IэщIагъэ щрагъэгъуэт еджапIэхэм я унафэщIхэр, лэжьапIэ зытхэр.