ЕджакIуэхэмрэ щIэныгъэ, жылагъуэ IуэхущIапIэхэм Iут щIалэгъуалэмрэ папщIэ къызэрагъэпэщ «Си хабзэубзыху жэрдэм» зэхьэзэхуэм кърикIуахэр дыгъуасэ КъБР-м и Парламентым къыщызэщIакъуэжащ.
Зэхуэсым хэтащ республикэм и хабзэубзыху орган нэхъыщхьэм и УнафэщIым и къуэдзэ Къардэн Мурат, ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ комитетым и унафэщI Емуз Нинэ, ЩэнхабзэмкIэ, жылагъуэм зегъэужьынымрэ хъыбарегъащIэ политикэмкIэ комитетым и унафэщI Къумал Заурбэч, депутатхэр, КъБР-м и Парламентым и ЩIалэгъуалэ палатэм хэтхэр, курыт еджапIэхэм щIэсхэмрэ абыхэм я щIэныгъэ унафэщIхэмрэ.
ЗэIущIэр къыщызэIуихым, Емуз Нинэ къыхигъэщащ «Си хабзэубзыху жэрдэм» зэхьэзэхуэр мы гъэм епщыкIубгъуанэу зэрырагъэкIуэкIыр. 2024 гъэм абы щIалэгъуалэ 70-м нэблагъэ хэтащ, лэжьыгъэ 62-рэ зэпеуэм къыщагъэлъэгъуащ.
- Сыт щыгъуи хуэдэу, лэжьыгъэ нэхъыбэ къезыгъэхьар налшыкдэсхэрщ - псори зэхэту 36-рэ мэхъу. Ди гуапэщ республикэм и Тэрч, Прохладнэ, Дзэлыкъуэ, Май, Лэскэн районхэми зыкъамыгъанэу мы Iуэхум къызэрыхыхьари, - жиIащ Емузым. - Къыхэзгъэщыну сыхуейт зэхьэзэхуэм хуагъэхьэзыр хабзэ жэрдэмхэм я фIагъымрэ мыхьэнэмри зэрыхэхъуар. АдэкIи дыхуейщ мы Iуэхур едгъэфIэкIуэну, щIалэгъуалэ нэхъыбэ къыхэтшэну.
«Си хабзэубзыху жэрдэм» зэпеуэр -секци 9-кIэ гуэшауэ щытащ, социальнэ, щIалэгъуалэ, экономикэ, мэкъумэш политикэм, егъэджэныгъэм, къэрал ухуэкIэмрэ цIыхухэм я хуитыныгъэхэмрэ, зыхъумэжыныгъэмрэ шынагъуэншагъэмрэ, спортымрэ туризмэмрэ, бюджет, налог хабзэхэм ятещIыхьауэ. Лэжьыгъэ нэхъыфIу 26-рэ ягъэбелджылащ: япэ увыпIэр 12-м хуагъэфэщащ, етIуанэр - 11-м, ещанэр - 8-м. Емуз Нинэ зэрыжиIамкIэ, зэхьэзэхуэр зэрырагъэкIуэкI щIыкIэм зэхъуэкIыныгъэ халъхьэнущ - ятха лэжьыгъэм щытепсэлъыхьыж Iыхьэ хэту ящIынущ.
Зэхуэсым цIыху зыбжанэм я лэжьыгъэхэм я презентацэ щагъэлъэгъуащ. КъБР-м и Парламентым и ЩIалэгъуалэ палатэм хэт Мэшыкъуэ Астемыр зытепсэлъыхьа лэжьыгъэр теухуат «Коммунальнэ Iуэхутхьэбзэхэмрэ зыщIэс пэшхэмрэ щIат уасэм и Iыхьэ цIыху щхьэхуэхэм етыжыным теухуауэ» КъБР-м и Законым, «КъБР-м щыпсэу цIыху гуэрхэм къэралым зэрызащIигъакъуэм и IуэхукIэ» КъБР-м и Законым, «КъБР-м и хабзэ щхьэхуэхэм зэхъуэкIыныгъэхэр хэлъхьэным ехьэлIауэ» республикэ законым и проектым. КъБКъУ-м и Медицинэ колледжым и студент Мэрзей Рустам игъэхьэзырат узыншагъэм теухуауэ цIыхухэм ящIэн хуей Iуэхугъуэхэм зэрыщагъэгъуазэ Iэмалхэр егъэфIэкIуэным, Май районым и щIыпIэ администрацэм дэлажьэ щIалэгъуалэ советым хэт Тищенкэ Анастасие утыку кърихьащ муниципальнэ щIыналъэхэм я комиссэхэм я Iуэху убзыхукIэм зэрызиужьыным, Къамлыкъуэ къуажэм и курыт школым и 9-нэ классым щеджэ Къанкъул Элинэ тетхыхьащ ебгъуанэ класс къэзыуххэм экзамен щаткIэ гугъуехь зыIууэхэмрэ абыхэм я хэкIыпIэхэмрэ, КъБР-м и Парламентым и ЩIалэгъуалэ палатэм хэт КIузэмыщ Алимрэ КъБР-м и къэрал, жылагъуэ IэнатIэ Iутхэм лэжьыгъэмкIэ я инспектор нэхъыщхьэ Соблыр Теймуразрэ я тхыгъэр теухуат зи щхьэ хуэлэжьэжхэм ехьэлIа зэгурыIуэныгъэхэр хабзэ и лъэныкъуэкIэ зэрызэрагъэзахуэ Iэмалхэм дыщIагъупхъэхэм.
ЩIалэгъуалэм я лэжьыгъэхэм едэIуа нэужь, зэпеуэм текIуэныгъэ къыщызыхьахэмрэ абыхэм я щIэныгъэ лэжьакIуэхэмрэ щIыхь тхылъхэмрэ саугъэтхэмрэ иратащ.
Къардэн Мурат къызэхуэсахэм щехъуэхъум, къыхигъэщащ зэпеуэм хэтыну хуейхэр гъэ къэс нэхъыбэ зэрыхъур, къызэгъэпэщакIуэхэри я Iуэху бгъэдыхьэкIэр ирагъэфIэкIуэным зэрыхущIэкъур. Абы къызэгъэпэщакIуэ гупми ныбжьыщIэхэр зыгъэхьэзыра щIэныгъэ унафэщIхэми фIыщIэ яхуищIащ, иджыри ехъулIэныгъэ куэд яIэну зэригуапэр дыщIигъуащ.
- Мы Iуэхур фи япэ лъэбакъуэу аращи, политикэ хъуми гъащIэм нэгъуэщI и лъэныкъуэу щытми, иджыри ехъулIэныгъэшхуэхэр къызэрыдэкIуэнур фи фIэщ фщIы, зэрызывужьыным сыт щыгъуи иужь фит», - яжриIащ щIалэгъуалэм Къумал Заурбэч.
БАГЪЭТЫР Луизэ.
