Европэ зэхьэзэхуэм зыхуагъэхьэзыр

Урысейм бэнэкIэ хуитымкIэ пашэныгъэр къыщыхьыным хуэунэтIа зэхьэзэхуэ Шэшэным и Грознэ къалэм иджыблагъэ щекIуэкIащ. Абы щызэпеуащ къэралым и щIыналъэ куэдым я спортсмен лъэщу 500-м нэблагъэ, я ныбжькIэ илъэс 21-м щIимыгъуауэ.

Къэбэрдей-Балъкъэрым и щIыхьыр ихъумэу зэхьэзэхуэм хэта Джыджий Темырлан килограмм 92-рэ хъухэм я деж домбеякъ медалыр къыщихьащ, абы щIэбэну къыпэщIэта, Дагъыстэным и бэнакIуэ Гаджибатыров Гаджимурад хигъащIэри.

Апхуэдэ ехъулIэныгъэ зригъэгъуэтащ Щоджэн Ислъами. Ари щыбанэр килограмм 92-рэ хъухэм я дежщ. Ещанэ увыпIэм щхьэкIэ абы и ныкъуэкъуэгъуащ Осетие Ищхъэрэ – Аланием и бэнакIуэ Бацоев Руслан, ауэ мыбдежми ди щIалэр щынэхъ лъэщащ. ЗэIущIэм и бжыгъэр 10:2-уэ Ислъам текIуащ.

Ди командэм дэлажьэхэр Жолдащ Зэчырейрэ Хъубий Муратрэщ.

   Мы зэхьэзэхуэм и гугъу пщIымэ, абы щытекIуахэр дуней псом бэнэкIэ хуитымкIэ пашэныгъэр къыщыхьыным хуэунэтIауэ мы гъэм екIуэкIыну зэпеуэм хэтынущ, етIуанэ-ещанэ хъуахэр европей зэхьэзэхуэм кIуэнущ.