КъэпщытакIуэхэр журналистхэм яIуощIэ

«Кинокавказ-2024» IV Кавказ Ищхъэрэ щIалэгъуалэ кинофестивалым и къэпщытакIуэхэр IущIащ республикэм и хъыбарегъащIэ IэнатIэхэм я журналистхэм.

- Фестивалыр зэрырагъажьэрэ сыкIэлъоплъри, абы зэрызиужьыр, лэжьыгъэу къагъэхьхэр зэрырагъэфIакIуэр солъагъу, - жиIащ къэпщытакIуэ гупым и унафэщI, ВГИК-м и къудамэм и унафэщI, доцент Калинин Виталий. – Нэхъыщхьэращи, щIалэгъуалэм кино гъуазджэм щаIэ зэфIэкIыр къагъэнэIуэнымкIэ щхьэпэщ. Я лэжьыгъэхэр ягъэлъагъуэ къудей мыхъуу, IэщIагъэлI цIэрыIуэхэм я чэнджэщхэм едэIуэнуи Iэмал яIэщ. ЗэфIэкI зиIэ щIалэгъуалэм заужьынымкIэ ар уасэ зимыIэщ!

- Зэпеуэм къагъэхьа лэжьыгъэхэм нэхъыфIхэр къыщыхэтхым, лъэныкъуэ куэдкIэ Iуэхум дыбгъэдыхьащ. Фестивалым щэнхабзэ, гъэсэныгъэ мыхьэнэ иIэщ жыпIэмэ, ущыуэнукъым. Псом хуэмыдэу Iуэхум кIэлъыплъащ кинофестивалым екIуэлIа студентхэр икIи абы щагъэлъэгъуа лэжьыгъэхэм я фIагъыр къызэралъытэр зыхащIащ. Ар псом ди дежкIи мыхьэнэ зиIэщ, - жиIащ режиссёр, ГъуазджэхэмкIэ Кавказ Ищхъэрэ къэрал институтым режиссурэмкIэ и къудамэм и унафэщI, Къэбэрдей-Балъкъэр, Ингуш республикэхэм гъуазджэхэмкIэ щIыхь зиIэ я лэжьакIуэ Шэрджэс Мухьэмэд. - Лэжьыгъэ 400-м щыщу 300 япэщIыкIэ къыхэтхащ. Абыхэм дахэплъэжри, фестивалым щагъэлъэгъуэну 50 - 60 къыхэтхыжащ. 

- Художественнэ, документальнэ фильмхэр щытрахыу щыта Кавказ Ищхъэрэм и студиер къызэIутхыжыну ди мурадщ. Фестивалым щIалэгъуалэр хуэныкъуэщи, абы иджыри къыпащэну ди гуапэщ! - жиIащ УФ-ми КъБР-ми щIыхь зиIэ я артист, ЩоджэнцIыкIу Алий и цIэр зезыхьэ Къэбэрдей къэрал драмэ театрым и режиссёр нэхъыщхьэ, КъБР-м и Кинематографистхэм я зэгухьэныгъэм и унафэщI Шыбзыхъуэ Басир.

«Паровоз» студием анимацэ мультсериалхэмкIэ и художник, кинорежиссёр, сценограф Метельский Станислав жиIащ фестивалым щIалэгъуалэ нэхъыбэ къыхашэн, абы зрагъэубгъун зэрыхуейр.

КъэпщытакIуэ гупым хэтхэм зы жьэу къыхагъэщащ щIалэгъуалэр зэпсэлъэнымкIэ, зым адрейр тригъэгушхуэнымкIэ, зэчэнджэщынымкIэ кинофестивалым мыхьэнэшхуэ зэриIэр.