Сом минищэм нэблагъэ IэщIагъэкIащ

Урысей МВД-м Аруан район щиIэ къудамэм накъыгъэм и 3I-м зыхуигъэзащ Аруан къуажэм щыщ цIыхубзым. Щхьэусыгъуэр къызэрагъэпцIарт.

         ЦIыхубзым зэрыжиIамкIэ, абы егъэхьэзырыф инфографикэ. Махуэ зыбжанэ ипэкIэ абы къыIэрыхьащ имыцIыху бзылъхугъэм къыбгъэдэкI хъыбар, тыкуэнхэм ехьэлIа логотипу тIум елэжьыну. ИужькIэ, хуищIа лэжьыгъэр игу ирихьри, ахъшэ тIэкIу къритащ икIи цIыхубзым къыхуигъэлъэгъуащ интернет-сайтхэм папщIэ лототипхэр игъэхьэзырыну. Арэзы хъуати, къэлъэIуам къытрикъузэри, абы къыхуигъэлъэгъуа интернет-платформэм езым и кабинет къыщызэIуихащ.

         Къэпсэлъам дзыхь хуищIри, цIыхубзым абы къыхуигъэлъэгъуа счётхэм махуэ зыбжанэкIэ ахъшэ игъэхьащ, езым и кабинетым илъ мылъкум хригъалъхьэ хуэдэурэ. Псори зэхэту абы иутIыпщащ сом 92 488-рэ. АдэкIэ ищIэн хуейм щIэупщIэн щыхъум, зыкъызыпыщIам и телефон номерыр зэхуищIри, зэхуатха псори иригъэкIыжащ.

Урысей МВД-м Аруан районым щиIэ къудамэм уголовнэ Iуэху къиIэтащ.

 Полицэм фыкъыхуреджэ:

         ПсынщIэу ахъшэ къывагъэлэжьыну жаIэу интернеткIэ къыфхуэзыгъэлъагъуэхэм дзыхь яхуэвмыщI.

Къэпсалъэрэ лэжьыгъэ къыфхуагъэлъагъуэмэ, абы къыдэкIуэу брокер счёт къызэIуфхыну е фэ езым фи кабинет къызэвгъэпэщыну къывжаIэмэ, нэхъыщхьэращи - фемыпIэщIэкI. Апхуэдэу къывэпсэлъа нэужь, фихьэ брокерым е компанием и сайтым, ар зыхуэдэр зэвгъащIэ. Компаниер Центробанкым и реестрым къыщывгъуэт. Регуляторым и сайтым псори илъщ. ПощткIэ е мессенджерхэмкIэ къыфхуагъэхьхэмкIэ счёт къызэIувмых. Шэч къызытефхьэ сыт хуэдэ къыфхуагъэлъагъуэхэми зыпыIувдз.

                                                                                                                                     ДЫГУЛЫБГЪУ Жантинэ.