КъБР-м и гъуэгухэр къэралым дежкIи щапхъэщ

Урысей Федерацэм ГъуэгухэмкIэ и федеральнэ агентствэм хэтхэмрэ Кавказ Ищхъэрэ, Ипщэ федеральнэ щIыналъэхэм я автомобиль зекIуапIэхэр зыхуей хуэгъэзэнымкIэ щыщыIэ IуэхущIапIэхэм я унафэщIхэмрэ, бадзэуэгъуэм и 10 – 11-хэм къриубыдэу, Къэбэрдей-Балъкъэрым и гъуэгущIэхэм ящыщ зыбжанэр къаплъыхьынущ, абы къыдэкIуэу Урысейм и федеральнэ гъуэгу IэнатIэм и зи чэзу зэхуэсри ди хэгъэгум щрагъэкIуэкIынущ. 
Автомобиль зекIуапIэщIэхэр зрагъэлъагъу къудей мыхъуу, зэхэзекIуэм щызэIущIэхэр апхуэдэуи тепсэлъыхьынущ къэралым гъуэгухэм яхуэгъэзауэ алъандэрэ къыщрахьэжьа пэхуэщIэхэм я Iыхьэ къыхэхахэр зыхагъэувэ лъэпкъ проектыщIэ зэхагъэува зэрыхъунуми. 
Нэхъри дгъэбелджылымэ, а щIыкIэм тету къыхалъхьэну проектыщIэмкIэ къызэщIрагъэубыдэнущ гъуэгуухуэ IэнатIэм и федеральнэ проектхэм, «ГъуэгуфI шынагъуэншэхэр» лъэпкъ проектыр гъэзэщIэнымрэ автомобиль зекIуапIэхэр шынагъуэншэу щыгъэтынымкIэ IэмалыщIэу къэунэхуахэм, апхуэдэуи КъБР-м гъуэгухэр щегъэфIэкIуэнымкIэ щалэжьар зыхуэдэр къыщыгъэлъэгъуа дэфтэрхэм ящыщ гуэрхэри. 
Iуэхур къезыхьэжьамрэ дэзыIыгъхэмрэ я гугъу тщIымэ, ахэр УФ-м ТранспортымкIэ, КъэралкIуэцI IуэхухэмкIэ и министерствэхэм я лIыкIуэхэрщ, Урысей Федерацэм ГъуэгухэмкIэ и федеральнэ агентствэм щIыналъэхэм щиIэ и къудамэхэм я унафэщIхэрщ, КъБР-м и Iэтащхьэрщ, жылагъуэ советым хэтхэрщ. 
Зи гугъу тщIы махуитIым къриубыдэу, хьэщIэхэм ирагъэлъагъунущ УФ-м мыхьэнэ нэхъ щызиIэ и автомобиль зекIуапIэхэм халъытэу, ди республикэм къыщыунэхуа гъуэгущIэу Арщыданрэ Александровскэ станицэмрэ зэпызыщIэр, Шэджэм и псыхъуащхьэхэм щыIэ щIыпIэ дахэхэм уахуэзышэ Шэджэм ЕтIуанэ – Булунгу автомобиль зекIуапIэр, Налшык къалэ округым къуэкIыпIэ лъэныкъуэмкIэ «Восточный» зыфIаща и хьэблэщIэмрэ сымаджэщхэр здэщыIэмрэ уабгъэдэзышэ Щоджэным и цIэр зезыхьэ уэрамыр.