Илъэсым и кIэм яухынущ

КъБР-м и Iэтащхьэ КIуэкIуэ Казбек ба­дзэуэгъуэм и 11-м иригъэкIуэкIащ ухуэныгъэ нэхъ инхэр зэрызэфIагъэкIыну щIыкIэм епха зэIущIэ. Абыхэм яхэтщ лышхыр зыпкърытхэм щеIэзэ диспансерыр, Творческэ щIалэ­гъуалэм я уардэунэр, Бахъсэн псы къыдэ­шыпIэр. 

«Мы Iуэхухэр дгъэзэщIэну Iэмал къы­дэзытар ди Президент Путин Владимир зэры­зы­къытщIигъакъуэрщ, - щетх КIуэкIуэ Казбек и телеграм-каналым. - А гъулъытэр щызыхыдо­щIэ проект щхьэхуэхэми къэралым и фейдэ зыхэлъ адрей унафэхэми». 
Лышх зыпкърытхэм щеIэзэ диспансерыр «Узыншагъэр хъумэн» лъэпкъ проектым ипкъ иткIэ яухуэ. Ар сымаджэхэм щеIэзэ IуэхущIа­пIэ нэхъ ин дыдэу республикэм итынущ. Ухуэ­ныгъэм и Iыхьэ псоми лэжьыгъэ щокIуэкI, IэщIагъэлIхэм жьы зекIуапIэхэр, инженер комму­никацэхэр зэрагъэзахуэ, щIыщIагъ къатым псыIагъэ мыкIуэн хуэдэу ящI. «ДэIэпыкъуэгъу псынщIэхэр» здэщытыну щIыпIэри ягъэхьэзыр. Лышхыр зэфыкIхэм щеIэзэ диспансерыр ­жэщми махуэми зэпыу имыIэу лэжьэнущ, абы хэ­тынущ поликлиникэрэ радиологическэ къу­дамэрэ. Ухуэныгъэ лэжьыгъэхэр 2025 гъэм и дыгъэгъазэм яухынущ. 
Творческэ щIалэгъуалэм я уардэунэр дызэ­рыт илъэсым и кIэм яухынущ. ИджыпстукIэ унэм и IуплъапIэм, пэшышхуэм хэт зыкъэгъэлъэгъуапIэм йолэжь, инженер коммуникацэхэр, жьы зекIуа­пIэ­хэр зэтраухуэ, зыгъэхуабэ, мафIэс къэмыгъэ­хъуным пыщIа пунктхэр, насос станцыр ящI. Ухуэныгъэр гугъухэм хабжэ, абы къуапих иIэнущ, Iыхьищу зэхэтщ. Мыбы сценитI иIэнущ, зым спектаклхэр щагъэуву, адрейм концертхэмрэ гъэлъэгъуэныгъэхэмрэ щрагъэкIуэкIыу, пса­лъэм папщIэ, симфониемкIэ оркестрым ейхэр. 
Лэжьыгъэхэр щокIуэкI Бахъсэн псы къы­щIэшыпIэу километр 79-рэ зи кIыхьагъми. Иджы­псту ухуэныгъэ лэжьыгъэхэр щызэфIах Зеикъуэ къуажэм - абы километр 13-м щаукъуэдий бжьамийхэр. 
ЦIыхухэм я дежкIэ а псом мыхьэнэшхуэ яIэщ. Псы къыщIэшыпIэр Бахъсэн районым хиубыдэ къуажиблым пхыкIынущ, республикэм щыщу цIыху мини 100-м псы къабзэ ягъуэтынущ.