ТАСС-м и къудамэщIэ къызэIуах

Пятигорск лэжьэн щыщIидзащ «ТАСС Кавказ» щIыналъэ хъыба­р­егъащIэ центрым. Абы и хэщIапIэм щекIуэкIа зэIущIэ гуапэм хэтащ ­Урысей Федерацэм и Президентым и полномочнэ лIыкIуэу КИФЩI-м щыIэ Чайкэ Юрий, КъБР-м и Iэтащхьэ КIуэкIуэ Казбек, ТАСС хъыбар­егъащIэ агентствэм и унафэщI Кондрашов Андрей. ЗэIущIэр щекIуэкIым ТАСС-м Москва, Санкт-Петербург, Екатеринбург, Новосибирск нэ­хъапэкIэ къыщызэIуиха пресс-центрхэм телелъэмыжкIэ зэпащIащ. 

«Мыр ТАСС-м иужьрей илъэси­пщIым къызэIуиха япэ щIыналъэ хъыбарегъащIэ центрышхуэщ. Кавказым щекIуэкIыну инвестицэ фо-рум иным ипэ къихуэу лэжьэн щIыдодзэ. Ар ­щIыналъэ хъыбарегъащIэ центрми ТАСС-м и корреспондент куэдми зэ­гъусэу къагъэлъэгъуэжыну япэ фо­руму щытынущ. Пресс-цент­рыр зэпы­мыууэ лэжьэнущ. Респуб­ликихми Став­рополь крайми сытым ­дежи Iэмал яIэнущ дакъикъэ къэс я мурадхэмрэ зыужьыныгъэхэмрэ теу­хуа хъыбархэр къатыну», - жиIащ ­ Кондрашов Андрей.
«Дэ нобэ догъэлъапIэ Кавказ Ищхъэрэм и гъащIэм дежкIэ мыхьэнэшхуэ зиIэ Iуэхугъуэ - «ТАСС Кавказ» хъыбарегъащIэ центрыр къызэрызэIуа­хыр. Дэ шэч къытетхьэркъым Кавказ Ищхъэрэм щекIуэкI Iуэхугъуэ псори псынщIэу икIи пэжу къэгъэлъэгъуэжа зэрыхъунум. ЦентрыщIэр щIыналъэ­хэм я мызакъуэу, къэралым дежкIи дэ­Iэпыкъуэгъушхуэ хъунущ», - жиIащ Чайкэ Юрий.
КъудамэщIэм и унафэщIу щытынущ ТАСС-м и корреспондентхэу Кавказ Ищхъэрэм и щIыналъэхэм щыIэхэм я лэжьыгъэр зи нэIэм щIэту щыта На­джибалаев Низами. ЦентрыщIэм и ­къалэнхэм хыхьэнущ Кавказ Ищхъэ­рэм и унэтIыныгъэ зэхуэмыдэхэм ще­кIуэкI Iуэхугъуэхэр къэгъэлъэгъуэ­жы­ныр, къулыкъущIапIэхэм, жылагъуэ ­зэгухьэныгъэхэм, предприятэ, IуэхущIапIэ зэмылIэужьыгъуэхэм, хъы­ба­р­егъащIэ IэнатIэ пэрытхэм ядэ­лэжьэныр.
«ТАСС хъыбарегъащIэ агентствэр ­Iэзагъышхуэ хэлъу, пэжым тету, псынщIэу къэралым щекIуэкI Iуэхухэр къэзыгъэлъэгъуэж IуэхущIапIэ. Ди къэ­ралыр, Кавказ Ищхъэрэр зыIууа Iуэхугъуэхэм хуэфэщэну япэщIэты­нымкIэ апхуэдэ Iуэху бгъэдыхьэкIэр дызыхуэ­ныкъуэщ. ХъыбарегъащIэ цент­рыщIэр къызэрызэIуахар а Iуэху­хэм дыпэджэ­жынымкIэ Iэмал хъар­зынэщ», - жиIащ КIуэкIуэ Казбек.
Республикэм и Iэтащхьэм ТАСС-м и унафэщIым фIыщIэ хуищIащ мыхьэнэшхуэ зиIэ апхуэдэ унафэ къы­зэрищтамкIэ икIи лэжьакIуэ гупым ­ехъуэхъуащ адэкIэ ехъулIэныгъэхэр яIэну.