Етухэр музейхэм щахъумэ

Подмосковье щыIэ «Этномир» зыгъэпсэхупIэр Урысейм щынэхъ ин дыдэщ. Абы и хъугъуэфIыгъуэхэм ящыщщ пасэрей етухэм я музей гъэщIэгъуэныр. НэхъапэIуэкIэ ди къэралым ету нэхъыбэ дыдэ щызэхуэхьэсауэ къалъытэрт Мстиславский Джон и уней музейуэ Ярославль щыIэм. «Музыка и время» музейм макъамэ Iэмэпсымэхэм нэмыщI, щIэлъщ ету 300-м щIигъу. ЕтIуанэт Переславль-Залесскэм щыIэ музейр – ету 250-рэ щахъумэ. Абы щIэлъхэр лIэужьыгъуэурэ зэхэгъэщхьэхукIащ: мафIэкIэ къагъэплъхэр, шыгуным къыхэщIыкIахэр, фIамыщI зэрылъхэр, бахъэкIэ лажьэхэр, спирт зракIэхэр, газ, электрическэ етухэр. Илъэс къэс абдеж щрагъэкIуэкI етум и махуэшхуэ. 
Етууэ щахъумэм и бжыгъэкIи гъэщIэгъуэнагъкIи абыхэм ефIэкIыжащ «Этномир» зыгъэпсэхупIэм хэт музейр. Ар 2014 гъэм зыгъэпсэхупIэм къыщызэIуахащ хьэпшып 300-м нэблагъэ щIэлъу. Иджы етухэм я бжыгъэр 600-м нэсащ. Абыхэм яхэтщ Толстой Лев и сурэтыр зытетри, хыджей теплъэр иIэу щIари, зи уасэр къыхэIущIыкIари, фIамыщIкIэ лажьэу щыта ету тIорысэ дыдэри, нэгъуэщI куэди. Музейм апхуэдиз хьэпшып зэрыщызэхуахьэсыфар я фIыгъэщ абы екIуалIэ зыплъыхьакIуэхэм. Куэдым музейм хуашащ я нэхъыжьхэм яхъума, я унэхэм къыщагъуэтыжа ету тIорысэхэр. 
Музейр щIэщыгъуэ ящохъу зыплъыхьакIуэхэм. Абы и лэжьакIуэхэм ящIэ етум теухуа хъыбар куэд пасэрей алыджхэмрэ ацтекхэмрэ ету зэрытрадзэу щытам, япэу ету къызэрагупсысам, нэгъуэщIхэми теухуауэ.