ЦIыхухэм япэ дэIэпыкъуныгъэхэр щыхуащIэ медицинэ IуэхущIапIэхэр къэгъэщIэрэщIэжынымкIэ программэр республикэм жыджэру щагъэзащIэ. Абы ипкъ иткIэ щIыналъэхэм щыIэ апхуэдэ IэнатIэхэм щрагъэкIуэкI лэжьыгъэм зыщигъэгъуэзащ КъБР-м узыншагъэр хъумэнымкIэ и министр Къалэбатэ Рустам.
Мы илъэсым а программэм хыхьэу узыншагъэр хъумэнымкIэ IэнатIэм и IуэхущIапIэу 7 яухуэ, 15-м зэгъэпэщыжыныгъэ лэжьыгъэхэр щрагъэкIуэкI.
Шэджэм районым хыхьэ Звезднэ жылагъуэм метр зэбгъузэнатIи 112-рэ хъууэ, иджырей жыпхъэщIэхэм иту амбулаторие щаухуэ. Иджыпсту жылэм дэт медицинэ IуэхущIапIэр псэупIэ унэм и япэ къатым хэту аращ икIи цIыхухэм зыхуэныкъуэ дэIэпыкъуныгъэхэр фIагъ пылъу яIэрыхьэнымкIэ щытыкIэ тэмэмхэр яIэу щыткъым. Псори зэхэту а IэнатIэм къепхащ цIыху 1627-рэ.
УхуэныгъэщIэр медицинэм къигъэув жыпхъэщIэхэм тетынущ. Дохутырхэр зыщIэс, цIыхухэм медицинэ Iуэхутхьэбзэхэр щыхуащIэну пэшхэр, махуэ стационарыр IэнатIэм щылажьэхэми абы къекIуалIэхэми я тыншыпIэм хуэщIауэ зэкIэлъагъэкIуащ. Мы зэманым ирихьэлIэу унэм и блынхэр дращIеящ, инженер коммуникацэхэр зэфIагъэхьащ, ухуакIуэхэр иужь ихьащ унэ блыныр, пэш кIуэцIхэр зыхуей хуэгъэзэным, унащхьэр телъхьэным. Ахэр зэфIэкIмэ, IуэхущIапIэм къегъэщIылIа щIыналъэри зэIузэпэщ ящIэнущ. Бадзэуэгъуэм и кIэм ирихьэлIэу псори хьэзыр ящIыну я мурадщ. Апхуэдэу министрым зригъэлъэгъуащ Кэнжэ, Белэ Речкэ къуажэхэм щаухуэ амбулаториехэри. Абыхэм я ухуэныгъэр 2025 гъэм зэфIэкIынущ.
Къалэбатэ Рустам арэзы къищIащ Щхьэлыкъуэ, Яныкъуей, Красноармейскэ, Терскэ, Арыкъ, Хьэмидей къуажэхэм, Май, Тэрч къалэхэм дэт медицинэ IуэхущIапIэхэм зэгъэпэщыжыныгъэхэр зэрыщрагъэкIуэкIым. Министрым пщэрылъ ящищIащ цIыхухэм псынщIэу зыхуэныкъуэ медицинэ дэIэпыкъуныгъэхэр къазэрыIэрыхьэным хуэщIауэ ухуэныгъэхэр ирагъэкIуэкIыну, чэзум щыпэплъэ плIанэпэр тыншыпIэм хуэщIауэ къызэрагъэпэщыну.
2030 гъэм и кIэ пщIондэ республикэм сыт и лъэныкъуэкIи зыхуей хуэзэу щаухуэну, щызэрагъэпэщыжыну медицинэ IуэхущIапIэхэр 50 мэхъу. Абы къищынэмыщIауэ, щIыналъэм и поликлиникэхэр зыхуэныкъуэ IэмэпсымэхэмкIэ, медицинэ транспортхэмкIэ ирагъэкъужынущ. Апхуэдэ щIыкIэкIэ а зэманым ирихьэлIэу Къэбэрдей-Балъкъэр Республикэм цIыхухэм япэ медицинэ дэIэпыкъуныгъэхэр щыхуащIэ и IуэхущIапIэ псори сыт и лъэныкъуэкIи зэпэщу щытынущ.
