«Узыншагъэр хъумэн» лъэпкъ проектым хыхьэ, цIыхухэм япэ дэIэпыкъуныгъэхэр щрат медицинэ IуэхущIапIэхэр къэгъэщIэрэщIэжын программэмкIэ республикэм лэжьыгъэ щхьэпэ куэд щызэфIагъэкI. Абы ипкъ иткIэ щIыналъэм и жылэхэм щаухуащ медицинэ IуэхущIапIэхэр икIи апхуэдэ IэнатIэ куэдым зэгъэпэщыжыныгъэ лэжьыгъэхэр щрагъэкIуэкIащ. А Iуэхум иджыри жыджэру къыпащэ.
Прохладнэ районым хыхьэ Красносельскэ къуажэм дэт амбулаторэм и унэр 1967 гъэм яухуауэ щытащ. Зи хэщIапIэр метр зэбгъузэнатIэ 215,2-рэ хъу, цIыху мини 2-м щIигъу зэкIуалIэ IуэхущIапIэм и унэр жьы дыдэ хъуат, къызэтещэхэнкIэ шынагъуэ щыIэт. Абы къыхэкIыу унафэ ящIащ унэр ирахыу, абы и пIэм амбулаториещIэ кърагъэувэну.
Лэжьыгъэр псынщIэу ирагъэжьащ. Унэм и лъабжьэр ягъэтIылъащ, и блынхэр дращIеящ. IуэхущIапIэщIэм хухахащ метр зэбгъузэнатIэ 352-рэ хъу щIыналъэ, махуэ лэжьэгъуэм къриубыдэу абы Iуэхутхьэбзэхэр щыхуащIэфынущ цIыху 50-м.
Амбулаториер абы щылажьэхэми къекIуалIэхэми я тыншыпIэм хуэщIауэ щытынущ. Абы хэтынущ унэтIыныгъэ зэхуэмыдэхэмкIэ лажьэ дохутырхэм я пэшхэр, сымаджэхэм Iуэхутхьэбзэхэр щыхуащIэну къудамэр, гъуэлъыпIэ 25-рэ щIэту махуэ стационар. Ухуэныгъэр медицинэ IэнатIэхэр зыхуей хуэзэу къызэгъэпэщынымкIэ щыIэ жыпхъэщIэхэм тету ирагъэкIуэкI. Лэжьыгъэр 2025 гъэм и кIэм ирихьэлIэу зэфIагъэкIыну я мурадщ.
1968 гъэм Яныкъуей жылэм дащIыхьауэ щыта амбулаторием нэхъапэкIэ зэрагъэпэщыжауэ щытакъым, абы и щытыкIэм Iэмал къаритыртэкъым цIыхухэм фIагъ лъагэ зиIэ медицинэ Iуэхутхьэбзэхэр хуащIэну. Иджы куэд мыщIэу къуажэдэсхэм я узыншагъэр зыхуей хуэзэу щызэтрагъэувэжыфынущ щIэуэ зэрагъэпэщыжа IуэхущIапIэм.
Лэжьыгъэм и нэхъыбэр зэфIэкIащ, пэшхэр зэхагъэщхьэхукIащ, унэр зэрагъэхуэбэну Iэмэпсымэхэр ягъэуващ, мы зэманым и кIуэцIыр зэрахьэ. Зэпэщ ящI амбулаторием хэтынущ терапевтыр, сабийхэм, цIыхубзхэм якIэлъыплъ, дзэ дохутырхэр щылэжьэну пэшхэр, гъуэлъыпIитI зыщIэтын махуэ стационарыр.
Яныкъуейм и амбулаториер зэрагъэпэщыжыху, къуажэдэсхэм зыхуэныкъуэ медицинэ дэIэпыкъуныгъэхэр къыщрат гъунэгъу къуажэм – Каменкэ дэт медицинэ IуэхущIапIэм. Зыхуей хуагъэзэжа амбулаторием и бжэхэр мы илъэсым и кIэм къызэIуихыжынущ.
Налшык къалэм Мусукаевым и цIэр зезыхьэ и уэрамым тет сабий поликлиникэри япэ дэIэпыкъуныгъэхэр щрат медицинэ IуэхущIапIэхэр къэгъэщIэрэщIэжын программэмкIэ зэрагъэпэщыж. Апхуэдэу щытми, IэнатIэм и лэжьыгъэр зэпыуакъым. Лэжьыгъэр IыхьитIу зэщхьэщыхауэ ирагъэкIуэкI. Поликлиникэм и зы къудамэм иращIэн хуейхэр щызэфIэкIащ, ухуакIуэхэм абы и адрей Iыхьэр зэгъэпэщыжын щIадзащ. Апхуэдэу я мурадщ унэм къыгуащIыхьыжу нэхъ ин ящIыну. Абы и фIыгъэкIэ сымаджэхэр къеуз елъытакIэ щызэщхьэщагъэкI фильтр-бокс яIэнущ, къищынэмыщIауэ, IуэхущIапIэм къекIуалIэхэм зыщатIэщIын, сабийхэр къызэрырашэкI гу цIыкIухэр щагъэувын щIыпIэ хэхаи иIэнущ.
Мы IуэхущIапIэм медицинэ Iуэхутхьэбзэхэр яхуещIэ сабий мини 7-м, мыбдеж абыхэм щагъуэт япэ медико-санитар, пIэщIэгъуэкIэ самаджэр зыхуэныкъуэ дэIэпыкъуныгъэхэр, апхуэдэуи узыфэ зэхуэмыдэхэр зыпкърытхэм щоIэзэ.
