Сирием щекIуэкIа зауэм и лъэхъэнэм Хэкум къэIэпхъуэжауэ щытащ илъэс тIощIрэ пщIырэкIэ дзэм хэта ПщыхьэщIэ Джумхьэ. И сабиигъуэм и анэм едаIуэурэ уэрэдыжь куэд зи гум къина дадэм и уэрэд жыIэкIэри гуакIуэщ, абыхэм ятеухуа уэрэдхэм я тхыдэри егъэлеяуэ гъэщIэгъуэнщ.
Джумхьэ Iурылъыр «адыгэбзэжьщ»: ар нобэрей литературэбзэ къэпсэлъыкIэ пхъашэм теткъым: тенджызыр тен[г’]ыз-щ, кIэрахъуэр [кI]эрахъуэщ [чI]эрахъуэ-къым, чэсейр [к’]эсейщ. Макъ къипсэлъхэм хуэдэу щабэщ Джумхьэ и хьэлри, цIыху тынш декIуэкIыгъуафIэщ. «Уэрэд дыщэ пхъуантэкIэ» узэджэну хуэфащэ тхьэмадэм Хэкум ирахауи езыр щалъхуа Хъэнасир къуажэм щаусауи адыгэбзэм и хъугъуэфIыгъуэ куэд ехъумэ:
- Сэ си адэшхуэр ПщыхьэщIэхэ ящыщщ, и цIэр ТIытIущ, Къулъкъужын икIащ. Аращ Хъэнасир нэкIуар. Си адэм илъэситху и ныбжьт мыбы щикIахэм, и цIэр Хьэлийт. Си нанэр, си анэм и анэр, уэрэджыIакIуэу щытащ адыгэ уэрэдыжьхэр ищIэу, пшынауэу. Абы си анэм зыкъом иригъэщIащ. Илъэсищэ - илъэситху чэму - псэуащ си анэр. КъызжиIэрт: мыхэр зэгъащIэ, къыпщхьэпэжынщ. Схъумащ иджыри къэс.
«Мы уэрэдыр гъуэгум щызэхалъхьауэ аращ. Дэ дызэрикIрэ илъэсищэрэ илъэсиблрэ мэхъу. Абы щыгъуэм яуса уэрэдщ мыр», - хужиIащ Джумхьэ адэкIэ къакIуэ уэрэдыжьым. Абы и псалъэхэм нэгъуэщIыпIэ дыщрихьэлIакъым. И макъамэр щIэту дедэIуэну Iэмал къыдэзыта тхьэмадэми фIыщIэшхуэ худощI:
Уорына ринэми уорына ринэми
Уорына ринэми Хэкум докIыж мыгъуи.
Мо тенджызыжь мыгъуэм
Кхъухьхэр щызэрожэрэ
Щауей Хьэжыжь мыгъуэм
Iуфэр къежыхь мыгъуи.
Уорына ринэми уорына ринэми
Уорына ринэми Хэкум докIыж мыгъуи.
Пщыунэ Гъазий мыгъуэр
ЗэрыпщэкIыхь мыгъуи,
Гъуэгуанэ кIыхь мыгъуэм
Дытеува мыгъуи.
Уорына ринэми уорына ринэми
Уорына ринэми Хэкум докIыж мыгъуи.
ЩIыбагъ балийхэри къызэтолъалъэрэ
Ди нэпс цIыкIуитI мыгъуэр
КъытфIолъэлъэх мыгъуи .
Уорына ринэми уорына ринэми
Уорына ринэми Хэкум докIыж мыгъуи.
Кхъужь-мыIэрысэхэри къызэдогъагъэрэ
Сабийм дахэплъэмэ ди гъын къагъакIуэ мыгъуи.
Уорына ринэми уорына ринэми
Уорына ринэми Хэкум докIыж мыгъуи.
Чэсей хъар хужь мыгъуэр
ЩIыфэм хогъуащэрэ
Дызэхэгъуэща мыгъуэу
ДыкъэкIуа хъуа мыгъуи.
Уорына ринэми уорына ринэми
Уорына ринэми Хэкум докIыж мыгъуи.
Чэсей хъар фIыцIэ мыгъуэм
ЩIыфэр къыреIэрэ,
Ди гум къеIа мыгъуэр
Ди Iыхьлы тIэкIу мыгъуэрщ.
Уорына ринэми уорына ринэми
Уорына ринэми Хэкум докIыж мыгъуи.
Истамбыл гъуэгури фи накIуэкъакIуэщи
Анзорхэ я къуэ мыгъуэр
Уэркъ къагъэделэ мыгъуи.
Уорына ринэми уорына ринэми
Уорына ринэми Хэкум докIыж мыгъуи.
Мо мафIэгужь мыгъуэм
ЩIым дрешыжь мыгъуи,
Марискэстаникэми*
ДыщызэхокIыж мыгъуи.
*Марискэстаникэ – Марьинскэ станицэ, мафIэгу тедзапIэ.