ПщафIэ, шеф-кондитер IэкIуэлъакIуэ Бэбыгуей Фаридэ и Iэзагъэм щыхигъэхъуащ икIи и зэфIэкI щигъэлъэгъуащ Москва, Новосибирск, Казань, Италием, Франджым, Швейцарием, Испанием, Германием, нэгъуэщI щIыпIэхэм.
Налшык и «Оазис» тыкуэным щIакхъуэ, шей дефэхэкIхэр щагъэхьэзыр и къудамэм и лэжьакIуэ, пщафIэ Iэзэ Уэршыкъуэ Руслан пасэу, иджыри курыт еджапIэм щIэсу, пщащэр IэщIагъэм дригъэхьэхат (ар Фаридэ и анэ дэлъхущ). Япэ классым щIэсу арат Фаридэ Руслан хуэдэу пщафIэ Iэзэ хъуну зэрехъуапсэр и анэм щыжриIам. 9-нэ классым къыщIэкIыу абы хуеджэну мурад щищIым, анэр арэзы техъуащ. Дзэлыкъуэкъуажэ и курыт еджапIэ №2-м и 9-нэ классыр къиуха нэужь, Пятигорск къалэм и сату-технологие техникумым 2012 гъэм щIэтIысхьащ технолог IэщIагъэм хуеджэну.
ЕтIуанэ курсым щыщIэсым, Фаридэ зэпеуэхэм япэ увыпIэхэр къыщызыхь студент жыджэру зыкъигъэлъэгъуат. Кондитер цIэрыIуэ Сучковэ Еленэ я техникумым кърагъэблагъэри, шоколад кIэнфетхэр зэрагъэхьэзырым теухуа мастер-классхэр махуитхукIэ итащ. Италием щекIуэкIыну зэпеуэм я студентитI ягъэкIуэну Сучковэм къащыхуигъэлъагъуэм, техникумым и студентхэм щыщу абы хэтынухэр къыщыхахым, Фаридэ ящыщт япэ ирагъэщахэм. Зэхьэзэхуэм мазитIкIэ зыхуагъэхьэзыращ. Къэрали 10-м (Японие, Франджы, Италие, Филиппины, Урысей, Финляндие, Мексикэ, н.) щIигъу зыхэта зэпеуэм япэ увыпIитхур къыщызыхьахэм яхэхуат Фаридэ.
- Зэпеуэр гугъуми, сэркIэ щIэщыгъуэт. Абы зэхьэзэхуэ куэд къыкIэлъыкIуащ. 2015 гъэм Владикавказ щекIуэкIа зэпеуэм япэ увыпIэр къыщыщысхьым, Iуэхум нэхъри сытригъэгушхуащ, - жеIэ Фаридэ. – Иужьым, Казань, Новосибирск къыщызэрагъэпэща зэхьэзэхуэхэм сагъакIуэри, абыхэми си зэфIэкI щызгъэлъэгъуащ. СыщыIащ Китайми.
Владикавказ практикэ щагъэкIуам, кондитер IуэхухэмкIэ международнэ IэщIагъэлI-эксперт нэхъыщхьэ Леленковэ Еленэ зригъэцIыхуащ Фаридэ. Абы Фаридэ иригъэблэгъащ Москва щекIуэкIыну международнэ чемпионатым техникумым и цIэкIэ хэтыну икIи зэхьэзэхуэм пашэ щыхъуащ. Абы япэ щыхъуащ икIи Хьэрып Эмират Зэгуэтхэм, Абу-Даби, щекIуэкIыну международнэ чемпионатым ягъэкIуэну яубзыхуащ. Зэпеуэм зыхуигъэхьэзырыну Москва ягъэкIуащ, Сучковэ Еленэ и деж. ИкIи абы и унафэм щIэт Шоколад школым щылэжьэну щригъэблагъэм, арэзы хъуащ. Абы ирихьэлIэу Фаридэ техникумыр къиухати, и щIэныгъэм адэкIэ пищэн хуейт, еджапIэм и цIэкIэ мыхъумэ, а зэхьэзэхуэм уэр-уэру ухэт хъуртэкъыми. Москва технологиемрэ управлениемкIэ къэрал университетым, Разумовскэм и цIэр зезыхьэм, «Технология продукции и организации общественного питания» и факультетым щIэтIысхьащ. Абу-Даби щекIуэкIыну чемпионатым а еджапIэм и цIэкIэ зэрызыкъыщигъэлъэгъуэнур абы и унафэщIхэм къыщащIэм, дауи, гуапэ ящыхъуат.
- Ди гупым хэт цIыхуихым илъэскIэ зыхуэдгъэхьэзыращ чемпионатым. Франджым, Швейцарием, Испанием я шеф-кондитерхэм я деж зыщыдгъэсащ. КъищынэмыщIауэ, гупым хэтхэр мызэ-мытIэу дэр-дэру дызэхьэзэхуащ, зэпеуэм зыхуэдгъэхьэзыру.
Чемпионатым зы илъэс ныкъуэ иIэжу Фаридэ мурад ищIащ зэхьэзэхуэм хэмытыну. Абы пищащ Сучковэ Еленэ и Шоколад школым щылэжьэным. Москва 2016 гъэм щекIуэкIа Modern Bakery международнэ чемпионатым «Лучший кондитер – декорирование тортов» унэтIыныгъэм япэ увыпIэр къыщихьащ икIи Цюрих щыIэ Richmont школым щеджэну хуит зыщI сертификатыр тыгъэ къыхуащIащ. А гъэ дыдэм и гъэмахуэм абы кIуэри и щIэныгъэм щыхигъэхъуащ зы тхьэмахуэкIэ. Зэхьэзэхуэм и къызэгъэпэщакIуэхэм нобэр къыздэсым фIыщIэ яхуещI, и зэфIэкIым зригъэужьынымкIэ IэмалыфI къызэрыратамрэ IэфIыкIэхэм я гъэхьэзырыкIэм и щэху куэд къызэрыщищIамрэ папщIэ. Италием 2017 гъэм щекIуэкIа «Королева выпечки» зэпеуэми кондитер-шоколатье сертификатыр къыщихьащ. Абы щигъэхьэзыра IэфIыкIэм зы метррэ сантиметр 20-рэ и лъагагът. И закъуэуи гупым хэтуи Фаридэ плIэнейрэ и зэфIэкI щигъэлъэгъуащ Италием IэфIыкIэхэм теухуауэ щекIуэкIа чемпионатхэм. Германием и «Кулинарный поединок» зэхьэзэхуэми абы тIэунейрэ етIуанэ увыпIэр къыщихьащ. Ещанэу абы щыхэтам, 2020 гъэм, и лэжьыгъэм дыщэ саугъэтыр къыщыхуагъэфэщащ.
Бэбыгуейм Москва и къэрал техникэ университетым, Разумовскэм и цIэр зезыхьэм и бакалавриатыр къиухри, ардыдэм и магистратурэм и щIэныгъэм щыпищащ. Иужьым, Урысей биотехнологие университетым щIэтIысхьэжри, магистратурэр абы къыщиухыжауэ, иджы а еджапIэм хьэщIэщ, хьэрычэт IуэхухэмкIэ и кафедрэм и ассистенту, эксперту щолажьэ, ехъулIэныгъэфIхэр иIэу. Иджы Фаридэ студентхэр международнэ чемпионатхэм хуегъэхьэзыр. И хъуэпсапIэ нэхъыщхьэр - Къэбэрдей-Балъкъэрым къигъэзэжу ди щIыналъэм щылэжьэнырщ, и уней хьэрычэт IуэхущIапIэ къыщызэIуихыну.
- Кондитерхэм IэфIыкIэ яфIэмыфIу жыхуаIэр пэжкъым. Си щхьэкIэ сфIэфI дыдэщ, езгъэлейкъым ахъумэ, - жеIэ Фаридэ. – Шоколадыр апхуэдэу сфIэфIыщэкъым, ауэ пхъэщхьэмыщхьэхэкI зыхэлъ тортхэр зыхэслъхьэ щыIэкъым. Апхуэдэхэм я фIагъыр къэспщытэныр си лэжьыгъэм хохьэри, зэрезмыгъэлеиным сыхущIокъу. IэфI сигу къыщихьэкIэ, фошыгъур зэрызгъэмэщIэным е пхъэщхьэмыщхьэ гъэгъуакIэ ар зэрызэсхъуэкIыным сыпылъщ.
Зи мурадхэм ерыщу хуэкIуэ, зи зэфIэкIым хэзыгъахъуэ хъыджэбз жыджэрым адэкIи ехъулIэныгъэхэр иIэну ди гуапэщ!
