Ерыскъым егугъуу

Къэбэрдей-Балъкъэрым ерыскъым, ерыскъыхэкIым елэжь и IуэхущIапIэхэм 2024 гъэм и щIышылэ - накъыгъэ мазэхэм къриубыдэу псырэ псыхэкIыу къыщыщIагъэкIам хагъэхъуащ. А пIалъэм республикэм щагъэхьэзыра ерыскъымрэ ерыскъыхэкIхэмрэ я индексыр проценти 103,3-рэ хъуащ. 
Къапщытэж лъэхъэнэм ирихьэлIэу щIакхъуэрэ IэфIыкIэу къыщIагъэкIам я куэдагъым зэрызахъуэжа щыIэкъым, ауэ шатащхьэм проценти 2-кIэ, нэкулъ лIэужьыгъуэхэм процент 14,8-кIэ, кхъуеймрэ кхъуейлъалъэмрэ проценти 5,2-кIэ, хадэхэкI фIэIугъэхэм, пхъэщхьэмыщхьэу ягъэвам процент 17-кIэ хэхъуащ.
КъищынэмыщIауэ, ерыскъымрэ ерыскъыхэкIхэмрэ елэжь IэнатIэхэм къыщIагъэкI крахмалым процент 14-кIэ, комбикормым процент 61-кIэ хагъэхъуащ.
Абыхэм къадэкIуэу псымрэ псыхэкIхэмкIэ я промышленнэ индексыр проценти 173-м нэблэгъащ. Псалъэм папщIэ, нэгъабэ щыIа бжыгъэхэм елъытауэ мы гъэм сырэу къыщIагъэкIам процент 23-кIэ, псы IэфIым проценти 10,5-кIэ хагъэхъуащ. Нарзаныпсу ирагъэхъуар зэрыщытам хуэдэу къэнэжащ: литр ныкъуэ зэрыхуэ птулъкIэхэм ярыту мелуан 32,3-м нэблагъэ.
КъищынэмыщIауэ, дызэрыт илъэсым и япэ мазитхум спиртрэ аркъэуэ къыщIагъэкIам и куэдагъми хагъэхъуащ.
 

 

ХЬЭЩЫКЪУЕЙ Олег.
Поделиться: