Налшык къэрал мыхьэнэ зиIэ курортщ

ЦIыхухэм я узыншагъэр щызэфIагъэувэжу, щызыкIэлъагъэплъу къэрал мыхьэнэ зиIэ курорт щIыналъэхэм ехьэлIауэ Урысей Федерацэм и Правительствэм зэхигъэува спискэм Налшык къалэ хагъэхьащ.

Абы хэтщ апхуэдэ щIыпIэу 55-рэ икIи ахэр УФ-м Узыншагъэр хъумэнымкIэ и министерствэм и нэIэ щIэтынущ. Абы хэмыхуа адрей курортхэр псори зыхуей-зыхуэфIхэмкIэ къызэзыгъэпэщынур узыншагъэр хъумэнымкIэ щIыналъэхэм щыIэ министерствэхэрщ. 
«Федеральнэ мыхьэнэ зиIэ курортхэр УФ-м Узыншагъэр хъумэнымкIэ и министерствэм и лэжьыгъэм хиубыдэнущ, мыдрейхэр щIыналъэхэм къахуэнэжынущ. Апхуэдэу щыхъукIи, къэрал мыхьэнэ зиIэхэм нэгъуэщI курортхэри хыхьэфынущ. Ауэ ар къыщыхъунур абыхэм я щытыкIэхэмрэ цIыхухэм хуащIэ Iуэхутхьэбзэхэмрэ я фIагъыр зыхуэдэр къапщыта нэужьщ», - дыкъыщоджэ УФ-м и Правительствэм и пресс-IуэхущIапIэм абы ехьэлIауэ зэбгригъэха хъыбарым. 
Апхуэдэуи, Налшык къалэм нэмыщI, абы хэхуащ Кавказ Ищхъэрэм и курорт щIыпIэу 12. Абы хохьэ Ставрополь крайм и ЕсэнтIыгу, Железноводск, Нартсанэ, Псыхуабэ къалэхэр, Осетие Ищхъэрэ – Аланием и Зарамаг, Кармадон, Тамиск, Тиб, Урсдон, Владикавказ къалэм я турист, курорт щIыпIэхэр, Къэрэшей-Шэрджэсым и Тебердамрэ Шэшэным и Серноводск-Кавказскэмрэ.
Абыхэм яхэтщ Краснодар крайм и курорт къалэхэу Анапэ, Сочэ, Геленджик, Архипо-Осиповкэ, Жанхъуэт, Дивноморск, Кабардинкэ, Криницэ-Беттэ, Прасковейкэ, Кърымым и Алупкэ, Алуштэ, Гурзуф, Кореиз-Мисхор, Ливадие, Ореандэ, Симеиз, Ялтэ къалэхэр. 
2023 гъэм шыщхьэуIум къащтауэ щыта «ЩIыуэпсым и хущхъуэхэмрэ цIыхум и узыншагъэр щызэфIагъэувэж, абы щыкIэлъыплъ щIыпIэхэмрэ курортхэмрэ я IуэхукIэ» Федеральнэ законым иджыблагъэ ирагъэгъуэта зэхъуэкIыныгъэхэм ипкъ иткIэ зэхагъэуващ иджырей списокыр.