Уэрэдыр зи псэм хэлъ

Зэрысабийрэ зыхилъхьэ щымыIэу макъамэр фIыуэ илъагъурти, микрофон папщIэу зыгуэр къищтэрт, гъуджэм бгъэдэувэрти, концерт иту къызыщигъэхъурт, уэрэджыIакIуэ цIэрыIуэхэм заригъэщхьу. Аруан районым хыхьэ Нарткъалэ и курыт еджапIэ №5-м иIа ансамблым хэтащ еханэ, ебланэ классхэм щыщIэсым.  Район, республикэ зэпеуэхэм а гупым япэ увыпIэхэр куэдрэ къыщихьащ. 

Школ нэужьым «Кабардинка» къэрал академическэ ансамблым зыщигъэсащ, лъэпкъ къафэхэм хуабжьу дахьэхырти. Транспорт IуэхущIапIэм щыIэ макъамэ ансамблым и унафэщIу а зэманым щыта, Ингуш, Осетие Ипщэ республикэхэм щIыхь зиIэ я артисткэ Кърым Иринэрэ Iэсиятрэ 1986 гъэм зэрыцIыхуащ. УэрэджыIакIуэхэм я республикэ зэпеуэ къэблагъэрт. Абы хэтыну зызыгъэхьэзыра уэрэджыIакIуэхэм ящыщ сымаджэ щыхъум, Иринэ абы и пIэкIэ Iэсият хигъэхьэри, япэ увыпIэр къыхуагъэфэщащ. Аращ и IэщIагъэм щIэдзапIэ хуэхъуари. 

Iэсият цIэрыIуэ зыщIа «Iэлъын цIыкIур» цIыхубэ уэрэдыр къызэрыIэрыхьам и хъыбарыр гъэщIэгъуэнщ. Къэрэшей-Шэрджэсым концерт щитыну кIуа «Кабардинка» гупым а уэрэдыжьыр зы къуажэ гуэрым щызэхахащ, и псалъэхэри къыздахьащ. Ар Iэсият къратащ къыщалъхуа махуэм и щIыхькIэ. «Iэлъын цIыкIур» радиом щригъэтха нэужь, Iэсият, зэрыжаIэщи, цIэрыIуэу нэху къекIат.

«Къэббалъкътелерадиом» и хор Мыз Борис зи унафэщIу щытам Аслъэн Iэсият илъэсипщIкIэ щылэжьащ. Макъамэм хуемыджами, Тхьэм къыбгъэдилъхьа зэфIэкIымрэ кърита макъымрэ къыщхьэпэжащ. КъардэнгъущI Зырамыку къыхуигъуэтыжа цIыхубэ уэрэдхэр фIэфIу игъэзащIэрт Iэсият. КъинэмыщIауэ, и насып къихьащ. Къэбэрдокъуэ Борис, Вэрокъуэ Валерэ, ЗэрэмыщIэ Заретэ, Къанкъул ФIыцIэ, АфэщIагъуэ Зое, Сокъур Ольгэ, Лосэн Тимур, Лий Аслъэн сымэ ядэлэжьэну. Абыхэм макъамэ зыщIалъхьа уэрэдхэр нобэми щIэщыгъуэщ. 

- Дунейпсо, Урысейпсо Арт комитетхэм я вице-президент Бейтыгъуэн Iэуес ди лъэпкъэгъухэр щыпсэу Тыркумрэ Иорданиемрэ 1987 гъэм дыщишам,  гуапэу, хуабэу дызэрырагъэблэгъауэ щытар сигу къинэжащ. Си уэрэдхэр къызэхуэсахэм ягу зэрыдыхьэр, зэрапэгъунэгъур я нэгум къищырт. Зэи сщыгъупщэркъым ди щIыналъэм теухуауэ згъэзэщIахэм хэхэсхэм я нэпс къазэрыфIригъэкIуар, - игу къегъэкIыж Iэсият. 

- Зи ныбжь хэкIуэта зы бзылъхугъэ къызбгъэдыхьэри концерт нэужьым къызэупщIащ зы зэман гуэр зэпызгъэууэ уэрэд щIыжызмыIар къызыхэкIамкIэ. Унагъуэм теухуа щхьэусыгъуэ гуэркIэ пIалъэкIэ утыку сызэримыхьар щыжысIэм, аргуэру къыщIигъужащ: «Уэрэд жумыIэну, Алыхьым къыббгъэдилъхьа зэфIэкIымкIэ цIыхухэм уадэмыгуэшэну, укъызыхуигъэщIар бгъэпщкIуну апхуэдэ хуитыныгъэ уэ уиIэкъым». Нэхъыжьым и псалъэхэм абдежым куэдым срагъэгупсысащ. Гукъинэжщ Москва, Санкт-Петербург къалэхэм, Абхъаз, Адыгэ республикэхэм щыста концертхэр. Сочэ къалэм гъуазджэхэмкIэ щекIуэкIа Олимпиадэри щIэщыгъуэ хъуат. А фестивалым и дыщэ медалымрэ щIыхь тхылъымрэ къысхуагъэфэщащ. «Дыщэ микрофон» саугъэтри лъапIэщ си дежкIэ..

Аслъэн Iэсият лирикэ уэрэдхэр нэхъ пэгъунэгъущ. Гурэ псэкIэ уэрэдыр зыхимыщIэмэ,  хужыIэнукъым, утыку хуихьэнукъым. 

- Си гъащIэр къыгуэхыпIэ имыIэу зэпха макъамэр си дежкIэ сызэрыбауэ хьэуащ. Утыкушхуэм и IэфIыр зэгуэр зыхэзыщIа цIыхур абы пэIэщIэу псэуфынукъым. Узэрысабийрэ фIыуэ плъэгъуа, удэзыхьэха IэщIагъэм ущыпэрытым и деж абы нэхъыфI щыIэкъым. ЦIыхубэм си уэрэдхэр ягу зэрыдыхьэм гукъыдэжрэ гупсэхугъуэу къызитыр къэIуэтэгъуейщ.