Iуащхьэмахуэ я къарур щагъэунэхуну

2024 гъэм фокIадэм и 17-м, япэм зэи щымыIауэ, Къэбэрдей-Балъкъэрым щекIуэкIынущ триатлон спорт лIэужьыгъуэмкIэ «Iуащхьэмахуэ и цIыху» зэхьэзэхуэр.

         Зэпеуэм хэтыну спортсменхэр лIэужьыгъуищкIэ зэхьэзэхуэнущ: псым есынымкIэ, лъакъуэрыгъажэмкIэ, бгым дэжеинымкIэ. ЗэIущIэхэм гъэщIэгъуэну хэлъыр зы спорт лIэужьыгъуэм адрейм къыпищэурэ, зэрахъуэкIыурэ зэпеуэр щекIуэкIкIэ, щIыпIэхэр нэхъ лъагэ хъууэрэ зэрыкIуэнурщ, и кIэм  нэсын папщIэ, псори зэхэту километри 6,5-рэ лъагагъкIэ дэкIуеин хуей хъунущ.

         «Зы махуэм къриубыдэу ирагъэкIуэкI мыпхуэдэ къызэдэжэхэм ящыщу иджырей зэпеуэр дуней псом щынэхъ гугъуу щытынущ икIи ахэр щызэхэт щIыпIэхэм я лъагагъымкIи дыдейр япэ итынущ. Дунейпсо рекорд яхуэгъэувынри зыхуэIуа щыIэкъым.

         Дыдейхэм нэмыщI зэхьэзэхуэм хэтынущ хамэ къэралхэм я спортсменхэри, псори зэгъусэу 80. Абы ящыщу 50-р щхьэзакъуэхэщ, 30-р командэхэм хэтынущ. Псалъэм къыдэкIуэу, зэхьэзэхуэр ягъэбжьыфIэнущ Урысей Федерацэмрэ Европэмрэ я чемпионхэу Брюханков Андрейрэ Романенковэ Евгениерэ», - жиIащ КъБР-м ТриатлонымкIэ и федерацэм и унафэщI Iэпщэ Руслан.

         Гугъэ тщIынщ зэпеуэм хэтыну спортсменхэм я зэфIэкIыр нэсу абы къыщагъэлъэгъуэфыну, Iуащхьэмахуэ лъапи триатлонымкIэ дунейпсо рекорд щагъэувыну.

                                                                  АЛБЭРДЫКЪУЭ Iэмин.