КъБР-м ЩIалэгъуалэм я IуэхухэмкIэ и министерствэм иужьрей илъэс зытIум жэрдэм гъэщIэгъуэнхэр утыку кърехьэ. КъулыкъущIапIэм зришэлIащ далэр IуэхукIэ зыгъэнщI щIалэгъуалэ хъарзынэ, я жэрдэмхэм щIыналъэ щIэблэр зэкъуигъэувэу, лъэпкъ щIэжри къаригъэIэту. Апхуэдэщ, псалъэм и хьэтыркIэ, ныбжьыщIэхэр я анэдэлъхубзэкIэ щызэпрагъауэ нэгузыужь зэхьэзэхуэхэр, дыкъэзыухъуреихь дунеймрэ щIыуэпсымрэ хъумэным хуэунэтIа пэхуэщIэхэр, ЕтIуанэ дунейпсо зауэм хэтахэм я кхъащхьэхэр къахутэжурэ щызэфIагъэувэж Iуэхугъуэхэр, нэгъуэщI куэдри. Ахэр къанэ щымыIэу щIалэгъуалэр узэщIыным хуэунэтIащ, я псэкупсэ зэхэщIыкIым зегъэубгъуным хуэгъэпсащ.
Мызыгъуэгум къулыкъущIапIэм къыхилъхьа жэрдэмым и мыхьэнэри нэхъ цIыкIукъым. Абы егъэхьэзыр «Дэ дытекIуэнущ!» зауэ-тхыдэ пэхуэщIэр. КъБР-м щIалэгъуалэм я IуэхухэмкI и министр Лу Азэмэт зэрыжиIамкIэ, шыщхьэуIу мазэм и 22 - 24-хэм ирагъэкIуэкIыну зытраухуа Iуэхугъуэшхуэр и купщIэкIэ гъэлъэгъуэныгъэу щытынущ. Звезднэ жылагъуэм къыщызэрагъэпэщ а гъэлъэгъуэныгъэм утыкум къыщрахьэнущ ЕтIуанэ дунейпсо зауэм тращIыкIыжа теплъэгъуэхэр.
«ЩIэх-щIэхыурэ къытедгъэзэжурэ ЕтIуанэ дунейпсо зауэм, пыухыкIауэ жыпIэмэ, Хэку зауэшхуэм и гугъу дощI. Ар икIи гурыIуэгъуэ хуэдэщ. Ди цIыхубэм лъапсэрыхыр къахуихьу иужьрейуэ и нэгу щIэкIа зауэшхуэр аращ. А зауэр зылъэмыIэса хэгъэгум унагъуэ къэгъэнауэ, цIыху исыжкъым, апхуэдизкIэ абы къызэщIигъэна мафIэсым цIыхушхуэм я щхьэр халъхьащи, апхуэдизкIэ куэд игъэгуIащи. ТщыгъупщэнкIэ Iэмал зимыIэ лъэужь къигъэнащ зауэм. Ар пщыгъупщэ щIэмыхъунур гурыIуэгъуэщ – хуэдэ лъыгъажэрэ зэрыукIрэ къэмыгъэхъужын щхьэкIэщ, ЩIы хъурейм лъэпкъыу тетым я зэхуакум зэгурыIуэр дэмыгъэкIынырщ, сыт хуэдэ Iуэхури мамыру зэрызэфIэпхыфынум нэхъапэ зэрыщымыIэр щIэблэм ягурыгъэIуэнырщ. Куэд дэмыкIыу дгъэлъэгъуэну теплъэгъуэхэм зэфIагъэувэжын хуейщ Хэку зауэшхуэм и лъэхъэнэм екIуэкIа зэпэщIэтыныгъэ гуащIэхэм ящыщ зыбжанэ. Дэ къэдгъэсэбэпынущ а илъэсхэм Дзэ Плъыжьым зэрихьа Iэщэ лIэужьыгъуэхэр, зауэлI фащэр. Iэмал зэриIэкIэ дытекIынукъым дэфтэрхэмрэ архив тхылъымпIэхэмрэ къаIуэтэж пэжым. МахуитIым къриубыдэу зэхэтыну Iуэхугъуэм дзэ-тактикэ мыхьэнэ зиIэ джэгукIэ зэмылIэужьыгъуэхэр зэхэтшэнущ, зэIущIэхэр едгъэкIуэкIынущ, сабийхэмрэ щIалэгъуалэмрэ щхьэкIэ анимацие гъэщIэгъуэнхэр дгъэлъэгъуэнущ, концерт едгъэплъынущ, нэгъуэщI хьэлэмэтхэри къыхэтлъхьэнущ. Мыпхуэдэ зэхыхьэхэм ди нэхъыжьхэм къакъуэкIа лIыгъэм и инагъыр зыхуэдэр уи нэгу къыщIагъэувэ, къахьа ТекIуэныгъэм и уасэри зыхыуагъащIэ. Дэ ди щхьэкIэ шэч къытетхьэркъым апхуэдэ пэхуэщIэхэр нэхъыбэIуэ зэрыщIын, цIыху нэхъыби къешэлIэн зэрыхуейм. Тхыдэр зыфIэфI дэтхэнэри ди гуапэу абы къыдогъэблагъэ», – жиIащ Лу Азэмэт.
Гъэлъэгъуэныгъэр къызэзыгъэпэщ къулыкъущIапIэм щIэгъэкъуэн яхуэхъуащ Шэджэм щIыналъэм щIыпIэ унафэр щызехьэнымкIэ и IуэхущIапIэмрэ «Урысейм и тхыдэ къэхъугъэхэр зэфIэгъэувэжынымкIэ Хасэ» урысейпсо жылагъуэ зэщIэхъееныгъэмрэ. Апхуэдэу жэрдэмыр гъэзэщIэнымкIэ дэIэпыкъуэгъу мэхъу Урысейм и псэкупсэхэм я центрымрэ Урысей гвардиемрэ.
Къыхэгъэщын хуейщ, КъБР-м ЩIалэгъуалэм я IуэхухэмкIэ и министерствэм ищIа гукъэкIыр Урысейм щIалэгъуалэм я IуэхухэмкIэ и къулыкъущIапIэм зэхигъэува «ЩIыналъэр щIалэгъуалэм папщIэ» программэм ипкъ иткIэ зэрагъэхьэзырар.
