Бжьыхьэм ирихьэлIэу

Бахъсэн къалэм гъуэгуухуэ лэжьыгъэхэм щыпащэ. Иджыпсту зыхуей хуагъазэ Лениным и цIэр зезыхьэ уэрамым и лъэс зекIуапIэ зы километр зи кIыхьагъ, уэрамдыхьитI зыхиубыдэр.

«ПсэупIэмрэ къалэмрэ» лъэпкъ пэхуэщIэм хиубыдэу икIи Къэбэрдей-Балъкъэрым и Iэтащхьэм и нэIэм щIэту ирагъэкIуэкI лэжьыгъэхэр бжьыхьэм ирихьэлIэу яухыну я мурадщ. Мы махуэхэм гъуэгум асфальт тралъхьэ, лъэс зекIуапIэр плиткэкIэ къращIыкI. ЩIыпIэм тетIысхьэпIэхэр щагъэувынущ, уэздыгъэ дахэхэмкIэ къагъэнэхунущ.
Дыгулыбгъуей Бахъсэным и цIэр зезыхьэ уэрам нэхъыщхьэри хэтщ зэрагъэпэщыжхэм. Километри 3,3-рэ зи кIыхьагъ гъуэгум телъ асфальтыр щIэкIэ яхъуэжынущ, иджырей щапхъэхэм тету къагъэнэхунущ, гъуэгу дамыгъэхэр тращIэнущ. Иджыпсту лэжьакIуэхэм уэшхыпсыр зрикIуэну кIэнауэхэмрэ ар зэрылъэдэну псы зэхуэхьэсыпIэхэмрэ яухуэ, гъуэгур нэхъ бгъуэ ящIынущ, щIадзауэ асфальт тралъхьэ. Гъуэгу лэжьыгъэхэм къадэкIуэу къалэм дэт тетIысхьэпIэхэр ялэ. Бжьыхьэм ирихьэлIэу Iуэхухэр и кIэм нагъэсынущ.
Бахъсэн къалэм хьэзыр щащIащ еджакIуэ 1224-м ЯтещIыхьа курыт школыщIэр. Метр зэбгъузэнатIэ мин 26-рэ хъу ухуэныгъэм «еджапIэ къалэ цIыкIукIэ» уеджэми ущымыуэну, сабийхэм щIэныгъэ лъабжьэ быдэ етыным сыт и лъэныкъуэкIи хуэщIащ. Абы хэтщ цIыхухэр щызэхуэс пэшышхуэ, спортзал, дэнбзэнымрэ IэпщIэлъэпщIэнымрэ щыхурагъаджэ мастерской, компьютер класс, цIыху 450-м тещIыхьа шхапIэ. ЦIыкIухэр щеджэну пэшхэр иджырей унэлъащIэхэмрэ IэмэпсымэхэмкIэ къызэгъэпэщащ.
ЕджапIэм и пщIантIэм щаухуащ футбол, баскетбол джэгупIэхэр, гимнастикэмрэ физкультурэмрэ хуэщIа утыку, еджакIуэ нэхъ цIыкIу дыдэхэм папщIэ джэгупIэ щхьэхуэхэр. А псоми къадэкIуэу школым екIуалIэ гъуэгуитIри зэIузэпэщ ящIащ. ШколыщIэм и бжэр фокIадэм и 1-м зэIуахынущ.