Нью-Йорк щыщ таксист гуэрым Фейсбукым щиIэ напэкIуэцIым къритхащ: «ЛэжьапIэм къызэрызжаIам тету, сыздыIухьэн хуей унэм сынэсри, машинэр згъэкIиящ. Дакъикъэ зыбжанэ сежьэри, аргуэру згъэкIиящ. Дакъикъитху сыщыта нэужь, ар иужьрей дэкIыгъуэти, унэм сыкIуэжыну мурад сщIащ. АрщхьэкIэ, сыкъезыджам и Iуэху зыIутыр къасщIэмэ нэхъ сфIэигъуэу, машинэм сыкъикIащ. Бжэм сытеуIуа нэужь: «Зы дакъикъэкIэ…», - къэIуащ бзылъхугъэ ешаифэм и макъ. Унэм зы хьэлъэ гуэр къыщIихыну зэрыхэтри, пэшым къыщIэIукI макъымкIэ къызгурыIуащ. Дакъикъэ зыбжанэ дэкIа нэужь, бжэр къыIуихащ илъэс 90 нэблэгъа бзылъхугъэ IэмэщIалъэмащIэ цIыкIум. Чэсыргей бостейрэ пыIэ хъурей цIыкIурэ щыгът, 1940 гъэхэм траха фильмхэм къыхэкIа фIэкIа умыщIэну. И шумэданыр къыщIигъэувыкIри, сэлам къызихащ.
- Си сумкэр машинэм нэс нысхуумыхьыфыну пIэрэ, - жиIащ бзылъхугъэм щабэ дыдэу.
Шумэданыр машинэм изгъэувэри къэзгъэзэжащ, езым сыдэIэпыкъуурэ къизгъэтIысхьэн папщIэ. Си Iэпэр къиубыдри, машинэмкIэ хуэмурэ дунэтIащ. Сызэрыхуэгуапэм папщIэ фIыщIэ къысхуищIын иухыртэкъым нанэ цIыкIум.
- Абы щхьэкIэ фIыщIи сыхуейкъым, си анэм сызэрыхущытым хуэдэу сфIэфIщ сахущытыну си машинэм къитIысхьэ нанэхэм.
- Сыту ущIалэфI дыдэ, - жиIэри, здэкIуэну унэм и адресыр къызитащ.
- КъалэкумкIэ укIуэцIрыкIыу унэкIуэфыну пIэрэ мыбы? - жери къыдыщIигъужащ.
- Ар гъуэгу кIыхьыIуэ хъунщ, мы унэм нэхъ кIэщIу екIуалIэ гъуэгуи соцIыху сэ, - жысIащ зэкIэлъызгъэпIащIэу.
- Сэ сыпIащIэркъым, си щIалэ цIыкIу, иужьрейуэ скIу гъуэгуанэщ мыр, си гъащIэм щыщу къэнэжар щызгъэкIуэну унэм, жьы хъуахэр щапIыжым, сыкIуэу аращ.
Си пащхьэм фIэлъ гъуджэм сыщиплъам, бзылъхугъэм и нэпсыр къэцIут.
- Си унагъуэр куэд щIащ нэгъуэщI щIыпIэ зэрыIэпхъуэрэ, - къыпищащ абы и макъ щабэмкIэ, - дохутырхэм зэрыжаIэмкIэ, къысхуэнэжа щIагъуэ щыIэкъыми, си закъуэу унэм сыщIэмысмэ нэхъыфIщ.
Къэзжыхьым и кIыхьагъымрэ пэкIуэ ахъшэмрэ къызытридзэ Iэмэпсымэр сыIэбэри згъэункIыфIащ.
- Сыт хуэдэ гъуэгукIэ укIуэмэ нэхъ къапщтэрэ?
СыхьэтитIкIэ дыдэтащ къалэм. Гумахэ хъуа нанэм сигъэлъэгъуащ езыр лифтеру щылажьэу щыта унэ зэтетышхуэр, иужькIэ дигъэкIуащ и щхьэгъусэмрэ езымрэ щызэрышагъащIэм щыпсэуа хьэблэм абы насыпыфIэу илъэс бжыгъэкIэ зэрыщыпсэуар игу къигъэкIыжащ. Иджы унэлъащIэхэр щащэ тыкуэнышхуэм дыIуигъэхьащ, ар нанэр щыхъыджэбз дэсым къэфапIэ унэу щытащ, абы зыщигъэсат езыми. Иныкъуэхэм деж унэ гуэрым е уэрамым деж къэзгъэувыIэну къызэлъэIурти, дакъикъэ зыбжанэкIэ щхьэгъубжэм дэплъу щыму щыст.
- Сезэшащ, накIуэ иджы дыздежьам сынэгъэс, - жиIащ нанэм нэхъри нэхъ щэхуж хъуа и макъымкIэ.
ТIуми зыри жыдмыIэу дынэсащ жьы хъуахэр щапIыж унэм. СанитаритI къыщIэкIри, гуапэу нанэр машинэм ирашащ. Къежьэ къыщIэкIынт. Нанэм и шумэдан цIыкIур щыхущIэсхьэжам, бохъшэр къыдихащ.
- Дапщэ уэстын хуейр? – жиIэри.
- Зыри, - естащ жэуап.
- Уэ узэрыпсэун къэблэжьын хуейщ, - жи нанэм.
- НэгъуэщIхэм къызатынкъэ, - жызоIэ сэри.
Си Iыхьлы дыдэ а унэм къыщIэзнэ хуэдэ, зезгъэзыхри бзылъхугъэ IэмащIэлъэмащIэм IэплIэ хуэсщIащ.
- Фызыжь цIыкIум куэд щIауэ зыхимыщIа насыпкIэ ухуэупсащ ныщхьэбэ, - жиIэри къыпыгуфIыкIащ нанэр, - ФIыщIэ ин пхузощI. И насыпщ уэ пхуэдэ къуэ зиIэм.
И Iэр быдэу субыдри сэлам есхыжащ. Си нэгур хуэзмыгъазэу сыкъыIукIыжащ. Ар си нэгу щIэкIа гъащIэм теухуа зы тхылъти зэгуэспIэжащ. А пщыхьэщхьэм нэгъуэщI къизгъэтIысхьакъым си машинэм. Си нэр здэплъэм сыкIуащ, гупсысэм сиубыдауэ. Си щхьэм щыкIэрахъуэр зыт: си гъащIэм къриубыдэу нэхъыщхьэ дыдэу зэфIэзгъэкIа Iуэхут ар. Сегупсысырт: а нанэм нэгъуэщI таксист къыпэщIэхуарэ хуэгубжьамэ-щэ е сэ машинэр тIэу згъэкIия нэужь, «къыщIэкIкъым» жысIэрэ сежьэжатэмэ?!..
Дэ ди гугъэщ ди гъащIэр IуэхугъуэшхуэхэмкIэ гъэнщIауэ етхьэкIыу, ауэ сыту мащIэIуэ икIи махэIуэ ар зэрызэхэлъ налъэхэр».
