США-м щэкIуэгъуэм и 5-м щекIуэкIыну президент хэхыныгъэм темыпсэлъыхьу дунейм цIыху куэд къытенэжакъым жыпIэныр, дауи, егъэлеящ. Ауэ а Iуэхум теухуа хъыбархэм защыпхъумэну Iэмал щIагъуэ щыIэжкъым. Сыту жыпIэмэ, зэхьэзэхуэр гуащIэщи, дэтхэнэ зыми къыдэщIхэм я бжыгъэм хигъэхъуэн папщIэ, лъэкI къигъанэркъым.
Нобэрей IуэхукIэ президент IумпIэр зыIэщIэлъ демократхэм тралъхьэ абыхэм я ныкъуэкъуэгъу республикэ партым щыщу бжьыпэр зыIыгъ Трамп Дональд бадзэуэгъуэм и 13-м яукIыну зэрыхэтар.
Трамп Дональд илъэс 78-рэ мэхъу. Иджырей тетыгъуэм и унафэр зыIэщIэлъ Байден Джо абы нэхърэ илъэсищкIэ нэхъыжьщ. Ауэ спортым хэпщIа зэпыту къекIуэкIа Трамп нэхъ жыджэрщ, и къарум нэхъ къызэригъэгугъэри нэрылъагъущ. 2017 - 2021 гъэхэм Америкэм и президенту лэжьа политикыр иужьрей хэхыныгъэхэми щытекIуауэ, ауэ Байден и щIыбагъым къыдэтхэм бжыгъэхэр зэхагъэзэрыхьу, цIыхубэр къагъэпцIауэ жызыIи щыIэщ. АрщхьэкIэ унафэ нэхъыщхьэр IэщIэмылъа щхьэкIэ, Трамп политикэм зэи хэкIакъым. Абы и кIэнхэр кIуэ пэтми нэхъыбэ ещI и утыку къихьэгъуэ къэс: «Сэ президенту сыщытамэ, Украинэмрэ Урысеймрэ зэи зэщыIеинутэкъым», - зэрыжиIэми. Демократхэм ар узыхуэсакъыпхъэ ныкъуэкъуэгъуу къалъытэ. Илъэсым и кIыхьагъкIэ суд зыбжанэ тращIыхьащ, щIагъэтIысыну тезырхэр къыхуаулъэпхъэщу. Иужьым яукIыну хэтащ.
Хэт хъуну-тIэ Трамп Дональд къеуа Крукс Мэтью? Ар зыфIэгъэщIэгъуэн цIыхухэр Америкэм щынэхъыбэнщ, дауи, ауэ шэч зыхэмылъыжыр зыщ: и гъащIэм зыгуэр къызэребгъэрыкIуэрэ, Трамп президенту хэха пэлъытэ хъури, и пщIэри дэуеящ. Уеблэмэ Маск Илон и напэкIуэцым мыр щитхащ: «Иужьрейуэ яукIыну хэта американ президентыр Кеннеди Джонщ». УIэгъэ зытехуа и тхьэкIумэм лъыр къыпыжу, ардыдэмкIэ IэштIым щIа и Iэ ижьыр къэIэтауэ, Трамп къызэрыщ сурэтым дуней псор зэлъигъэIэсащ. Зи фочышэр абы тезыгъэпса бзаджащIэр унащхьэм щыдэпщеям, политикыр Пенсильванием щыIэт. Шэ Iэуэлъауэ макъ зэрызэхихари и тхьэкIумэм зыгуэр къызэрытехуари щызыхищIэ тэлай дыдэм Трамп хъумакIуэхэр къытелъэри, езым и псалъэкIэ, «и вакъэхэр нэгъунэ щаудащ». Къеуа щIалэр абы метри 125-рэ хуэдизкIэт зэрыпэжыжьэр. Апхуэдэ жыжьагъым нэс уэф Iэщэр полицэм иумыгъэлъагъуу пIыгъыну ухуиту къыщIэкIащ.
«Президент хъуну зыкъэзыгъэлъагъуэхэм я дебатхэр» махуэ зыбжанэ ипэкIэ екIуэкIа къудейт. Байден узыншагъэ зэримыIэжыр абы наIуэ къыщыхъупа щхьэкIэ, лIыжь лъэрымыхьым и щIыбагъым къыдэтхэм ар хэхыныгъэ зэхьэзэхуэм хагъэкIын ядакъым зыкъомрэ. Апхуэдэ унафэ къыщащтар тхьэмахуэ блэкIам и кIэрщ. Иджы демократ партым къыбгъэдэкIыу президент хэхыныгъэм зыкъыщызыгъэлъагъуэр вице-президенту лажьэ Харрис Камалэщ. Урысей политик Марков Сергей зэрыжиIэмкIэ, Харрис фIыуэ ялъагъуркъым, езыри жьакIуэкъыми, текIуэн гугъэшхуэ щыIэкъым. Трамп зыкъыпишэфыну икIи текIуэфыну демократхэм яхэтыр зы цIыху закъуэщ: Обамэ Барак и щхьэгъусэ Мишель. ЦIыху хэтыкIэ нэгъэса, гъэсэныгъэрэ щIэныгъэрэ зыбгъэдэлъ цIыхубзым и пщIэр апхуэдизкIэ инщи, IумпIэр зыутIыпщыну хуэмей демократхэм ар хагъэзыхь, ауэ зэкIэ къахутегъэхьэркъым. «Ар армырами насыпыфIэщ, цIыхухэр къыхущIэбжьэу ныкъуэкъуэну хуейкъым, пщIэрэ щIыхькIи унагъуэкIи и гур зэгъащ», - жеIэ Марковым.
Трамп текIуэну нэхъ къэзыщтэхэри куэд мэхъу. Абы и щхьэусыгъуэ нэхъыщхьэр, ищхьэкIэ зэрыщыжытIауэ, Украинэм щекIуэкI Iуэхур «сыхьэт тIощIрэ плIым» игъэувыIэну дуней псор къызэрыщыгугъырщ. Куэд щIакъым ар Махачев Ислъам дэщIыну Америкэм кIуа Нурмагомедов Хьэбиб зэрыхуэзэрэ. «Палестинэм щекIуэкI гузэвэгъуэр уэ къэбгъэувыIэну сыпщогугъ», - жиIэри, Хьэбиб Трампым зыхуигъэзауэ щытащ абы щыгъуэ, езыми къигъэгугъащ.
Сыт ипэжыпIэкIэ цIыхубэр политикхэм зэращыгугъыр? Лажьэрэ шхэжу щыпсэуфыну дунейр мамыру щагъэтыну. «Америкэр аргуэру лъэщ тщIыжынущ» къыхуеджэныгъэм щIэтщ Трамп и президент хэхыныгъэм епха дауэдапщэхэр. Абы къыдощI Путин Владимир интервью купщIафIэ къеIызыха журналист Карлсон Такери.
Трамп Дональд сабиитхурэ къуэрылъху-пхъурылъхуу пщIырэ иIэщ. И къуэ нэхъыжьитIым я чэнджэщкIэщ абы иджыблагъэ вице-президент къулыкъум Вэнс Джеймс игъэувыну къызэрыхихар.
Бадзэуэгъуэм и 18-м Милуоки къалэм щекIуэкIащ США-м и республикэ партым и съезд. Абы Трамп Дональд президент хэхыныгъэм «официальнэу» зыкъыщигъэлъэгъуащ. Ар щIытемыкIуэнкIи хъунур зы щхьэусыгъуэ закъуэщ, Карлсон зэрыжиIэмкIэ: демократхэм пцIы яупсу, аргуэру бжыгъэ нэпцIхэр утыку кърахьэмэ. «Ди жагъуэ зэрыхъущи, Америкэм дунейм ехыжа цIыхуи щыхэпхыфынущ президенту, и теплъэр ебгъэщIрэ зыщIыпIэ деж къытебгъэувэмэ, зэфIэкIащ. Ауэ Трамп и гъащIэм къызэребгъэрыкIуэIарэ, ар президент къудейкъым зэрыхъунур, ар иджы лъэпкъым и пашэщ».
ЩэкIуэгъуэм и 5-м къигъэлъэгъуэнщ ар.
