ЦIыхубэр зыхуэныкъуэр ягъэнэхъапэ

УФ-м и Правительствэм щIыналъэхэм зегъэужьынымкIэ и комиссэм и президиумым  и зэIущIэм КъБР-м и Iэтащхьэ КIуэкIуэ Казбек хэтащ. Ар иригъэкIуэкIащ Правитель­ствэм и УнафэщIым и къуэдзэ Хуснуллин Марат. 

Къызэхуэсахэр тепсэлъыхьащ лъэпкъ проектхэмрэ къэрал программэхэмрэ зэрылажьэм, щIыналъэхэм я бюджетхэр зэрызекIуэм. 
КIуэкIуэ Казбек зэIущIэм хэтхэр щыгъуазэ ищIащ республикэм и бюджетым щыщу илъэ­сым и япэ Iыхьэм хухэхар гъэзэщIа зэрыхъуам. Республикэм езым и хэхъуэу щIышылэ - бадзэуэгъуэ пIалъэм сом мелард 1,8-рэ иIащ, блэкIа илъэ­сым елъытауэ, ар проценти 118-рэ ­мэхъу. Ахъшэм я нэхъыбэр зытрагъэкIуадэр цIыхубэр зыхуей-зыхуэныкъуэхэрщ. 
Республикэм дызэрыт зэманым школи 9 ­щаухуэ, Кэнжэрэ Звёзднэмрэ амбулаторэхэр ­дащIыхь, Мыл уардэунэ, лышхыр зыпкърытхэм щеIэзэ диспансер, Творческэ щIалэгъуалэм ­папщIэ уардэунэ ящI, Псыхъурей, Эльбрус ­къуажэхэм щэнхабзэмкIэ унэхэр, Щхьэлы­къуэрэ Эльбрусрэ - спорт ухуэныгъэхэр къы­щызэрагъэпэщ. Азау псыхъуэмрэ Эльбрусрэ зэпызыщIэ, псыжапIэ бжьамий гъуэгухэр зэ­рагъэпэщыж, цIыхубэ зэхэзекIуапIэхэмрэ пщIантIэхэмрэ зэIу­зэпэщ ящI, Бахъсэн деж щызэблэкI псы къы­щIэ­шыпIэхэмрэ нэгъуэщI объектхэмрэ йолэжь.