Гъэсэныгъэр и лъабжьэщ

КъБР-м ис муслъымэнхэм я дин IуэхущIапIэм иджыблагъэ «Азимут» хьэщIэщым щригъэкIуэкIащ «Гъэсэныгъэм и лъабжьэр унагъуэм къыщожьэ» зыфIища зэхыхьэр.

Ар къызэрагъэпэщащ КъБР-м Лъэпкъ Iуэхухэмрэ жылагъуэ проектхэмкIэ и министерствэм и дэIэпыкъуэгъукIэ. Зэхыхьэм хэтащ Кавказ Ищхъэрэм и щIыналъэхэмрэ Къалмыкъ Республикэмрэ я къэрал IуэхущIапIэхэм, муслъымэнхэм я дин зэгухьэныгъэхэм я лIыкIуэхэр, КъБР-м и къуажэхэм я Iимамхэр, Iимам Абу Хьэнифэ и цIэр зезыхьэ Кавказ Ищхъэрэ Ислъам университетым и студентхэр.

Къызэхуэсахэм зыхуагъэзащ КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзоррэ КъБР-м ис муслъымэнхэм я дин IуэхущIапIэм и унафэщI Дзасэжь Хьэзрэталийрэ.

 КIурашыным къыхигъэщащ хэкупсэ гъэсэныгъэ Iуэхухэм теухуа зэхыхьэхэм мыхьэнэшхуэ зэрагъэзащIэр икIи апхуэдэхэр нэхъ щIэх-щIэхыурэ къызэгъэпэщынымкIэ унафэщIхэмрэ жылагъуэмрэ зэдэлэжьэн зэрыхуейр.

Дзасэжь Хьэзрэталий къыщыпсалъэм жиIащ къэралым и унафэщIхэм мы зэманым къаруушхуэ зэрырахьэлIэр лъэпкъ хабзэхэр хъума хъунымрэ абыхэм щIэблэр щIэпIыкIынымрэ. Ар тепсэлъыхьащ 2022 гъэм щэкIуэгъуэм и 9-м Урысей Федерацэм и Президентым Iэ зыщIидза унафэм («Урысейм щыхабзэ лъапIэныгъэхэр хъумэным хуэгъэзауэ къэралым и Iуэху бгъэдыхьэкIэм и лъабжьэр») ипкъ иткIэ я пщэ илъ къалэнхэр зыхуэдэм.

- Къэралым и зыужьыныгъэр елъытащ щIалэгъуалэм гупсысэ куурэ хьэлыфIрэ яIэу къызэрыхъум, - жиIащ КъБР-м щIалэгъуалэм я IуэхухэмкIэ и министрым и къуэдзэ Ахъмэт Артур.

Апхуэдэуи зэхыхьэм къыщыпсэлъащ республикэ гъунэгъухэм къикIа дин лэжьакIуэхэри. Налшык къалэм и ЗАГС-м и унафэщI Шэру Валентинэ тепсэлъыхьащ иужьрей илъэс 20-м Къэбэрдей-Балъкъэрым ис унагъуэхэм я гугъуехь нэхъыщхьэхэр зэпхам, абыхэм я хэкIыпIэхэм лъэныкъуэ куэдкIэ зэрегупсысыпхъэм.

Зэхыхьэм хэтахэр къытеувыIащ Кавказ Ищхъэрэм лъэпкъ, дин зэхущытыкIэхэр зэрыщахъумэну, экстремизмэмрэ терроризмэмрэ зэрыщыпэщIэтыну Iэмалхэм.