Я мыхьэнэр инщ

Ди адыгэ таурыхъхэм куэдым ухуаущий икIи абыхэм я мыхьэнэр инщ къыдэкIуэтей щIэблэм гъэсэныгъэ тэмэм яхэлъхьэнымкIэ. Абыхэм я дэтхэнэри лъэпкъым къыдекIуэкI IуэхугъуэфIхэм, унагъуэм илъын хуей зэхущытыкIэ дахэхэм я къежьапIэ нэсщ. Арат нэхъапэхэм, пшапэр зэхэуамэ, анэшхуэ-адэшхуэхэм я таурыхъхэм цIыкIухэр пэплъэу щIыщысыр. Нанэхэмрэ дадэхэмри таурыхъыу ящIэм гъунэ иIэтэкъым. Нобэ тыдодзэ абыхэм ящыщ зы - «Дыщэ кIанэ» жыхуиIэр. Ар зэман ипэкIэ итхыжауэ щытащ Джыназ Нурбий.

Зы къуажэ гуэрым зы къулеижьрэ хуэмыщIауэ псэууэ зы унагъуэрэ щызэгъунэгъут. Нэхъ тхьэмыщкIэу псэум и унагъуэм махуэми жэщми дыхьэшх макъ къыщIэIукIырт. «Мыбыхэм яшхын дахэ-дахэу ягъуэтыркъым, жэщми махуэми сыту пIэрэ зыгъэдыхьэшхыр?!» - жиIэу зэгуэпырт къулеижьыр. Зы махуэ гуэрым и гъунэгъу фызыр къыщIэкIауэ къулеижьым щилъагъум, еупщIыну екIуэкIащ:

- Уа, - жиIащ, - мы фи псэукIэмрэ фи дуней тетыкIэмрэ схузэхуэгъэхъуркъым, дауэ фи Iуэхур зэрыщытыр? Жэщми махуэми фыдыхьэшхыну апхуэдэ гурыфIыгъуэ сытым къывитрэ?

Фызыр къыпогуфIыкIри:

- Дэ зы дыщэ кIанэ цIыкIу диIэщи, си щхьэгъусэм сэрэ зэхуэдгъажэурэ абы дегъэдыхьэшх, дегъэгуфIэ, - жиIащ фызым.

ЛIыр унэм къэкIуэжри и фызым жриIэжащ зэхихар.

- Абыхэм зы дыщэ кIанэ цIыкIу яIэмэ, дэ дыщэ пхъуантэшхуэ диIэщ, къикIут мыди къэгъажэ-тIэ, - жиIащ фызым, етIысэхри. Арати, зэлIзэфызыр дыщэм хэтIысхьэри, куэдрэ ириджэгуащ: зэхуагъэжащ, зэхуадзыжащ, ауэ иридыхьэшхын хуэдизу гурыфIыгъуэ лъэпкъ къаритакъым.

- Мы ди гъунэгъухэр делэ хъуауэ арагъэнщ, армыхъумэ сыт мыбы жэщми махуэми узыгъэдыхьэшхыну хэлъыр? – жиIэри гъумэтIымащ къулеижьыр.

ЕтIуанэ махуэм и гъунэгъухэр пщIантIэм дэту щилъагъум, къулеижьыр екIуэкIащ.

- Уэлэхьи, фэ зы дыщэ кIанэ фиIэщи, зэхувогъажэри фродыхьэшх, дэ дыщэ пхъуантэшхуэ диIэрэ пэт дызыгъэдыхьэшхыни дызыгъэгуфIэни фызми сэри къытхуэмыгъуэта, - жиIащ къулеижьым.

Фызыр къыпогуфIыкIри:

- Мы си щхьэгъусэм иIыгъ щIалэ цIыкIур плъагъурэ? Мис аращ ди дыщэ кIанэ цIыкIур. А цIыкIур зекIуагъащIэщи, си щхьэгъусэмрэ сэрэ зэхуэдгъажэурэ абы дегъэдыхьэшх, дегъэгуфIэ. Ар дыщэу щыIэм нэхърэ нэхъ лъапIэщ, - жиIащ фызым.

- Уэлэхьи, дэ апхуэдэ къулеягъ дбгъэдэмылъ-тIэ, - жиIэри, и щхьэр къыфIэхуауэ къулеижьыр екIуэкIыжащ.