«Си къалэ. Си щIыналъэ»

Апхуэдэ фIэщыгъэм щIэт гъэ­лъэгъуэныгъэ къыщызэIуахащ СурэтыщI гъуазджэхэмкIэ музейм, Ткаченкэ Андрей и цIэр зезыхьэм. Ар къызэрагъэпэщащ Къэбэрдей-Балъкъэрым и махуэшхуэмрэ Налшык къалэр илъэс 300 зэрырикъумрэ я щIыхькIэ. 

Къэбэрдей-Балъкъэрым и иджы­рей гъуазджэм и лъабжьэр зыгъэтIылъа, XX лIэщIыгъуэм и художник цIэрыIуэхэу Алёхин Митрофан, Ваннах Михаил, Сындыку Анатолэ, Кърым-Щомхъал Хьэмзэт, Црым Руслан, Бгъэжьнокъуэ Заурбэч, КIыщ Мухьэдин, Бакуев Владимир, нэгъуэщIхэ­-ми я лэжьыгъэхэм ухагъэгъуазэ Къэ­­бэрдей-Балъкъэрымрэ Налшык къалэмрэ я тхыдэ дахэм,  XX лIэщIыгъуэм и къэхъугъэ гъэ­щIэгъуэнхэм, цIыхухэм я псэу­кIэм, лъэпкъ хабзэхэм, республикэр дуней псом къикIахэм я зыгъэпсэхупIэ зэрыхъуам. Выставкэм щызэхуэхьэса лэжьыгъэ 90-м къытещ щIыналъэм и щIыуэпс къулейр, гуэлхэр, псы­ежэх­хэр, губгъуэхэр, мэзхэр, бгы уардэхэр, республикэм и зыу­жьыныгъэм хэлъхьэныгъэфI хуэ­зыщIа цIыху цIэрыIуэхэм, лэ­жьа­кIуэ пашэхэм я портретхэр, къагъэсэбэп хьэпшыпхэмрэ Iэмэ­псымэхэмрэ къызэрыщ сурэтхэр щIэщыгъуэщ. Графикэ, скульптурэ, декоративно-прикладной гъуазджэ унэтIыныгъэхэм щыщу музейм и фондым щахъумэ лэ­жьыгъэхэм ящыщу утыку кърахьахэри гъэщIэгъуэнщ. 
Гъэлъэгъуэныгъэм еплъыну ­гукъыдэж зыщIхэм иджыри Iэмал яIэщ. Ар фокIадэм и 8  пщIондэ лэжьэнущ. 

Сурэтыр  Къарей Элинэ  трихащ.