Джэданэхэ иджыри я зы чемпион

Краснодар крайм и Армавир къалэм иджыблагъэ щекIуэкIуащ ­Урысей Федерацэм и еджакIуэхэм дзюдомкIэ я 7-нэ Гъэмахуэ спартакиадэ. Абы щызэпеуащ къэралым и щIыналъэхэм ящыщу 79-м я цIыхубз ныбжьыщIэу 320-м нэблагъэ, я ныбжькIэ илъэс 18-м щIимыгъуауэ. Ахэр гупийуэ гуэшауэ щытащ.

Къэбэрдей-Балъкъэрым и командэм хэту зэпеуэм зыкъыщигъэ­лъэгъуащ Джэданэ Алинэ. Ар дуней псом дзюдомкIэ щыцIэрыIуэ, УФ-м спортымкIэ щIыхь зиIэ и мастер Джэданэ Алим ипхъущ. Ди гуапэ зэ­рыхъущи, адэм и щIыхьыр иIэту, пщащэ цIыкIум дыщэ медаль зэ­хьэзэхуэм къыщихьащ.
Килограмм 40 зи хьэлъагъхэм я деж, кIэух зэпеуэри хэту, Алинэ зэ­IущIитху щригъэкIуэкIати, абы щыщу плIым щытекIуащ, и IэзагъкIэ и хьэрхуэрэгъухэм фIыуэ ефIэкIыу. Апхуэдэ щIыкIэкIи, хъыджэбз ныбжьыщIэр УФ-м и еджакIуэхэм я Спартакиадэм и чемпион хъуащ.
Къыхэдгъэщынщи, Алинэ и адэ къуэш Залыми спортым зэфIэкIыфI куэд щиIащ, ди къэралми, Европэми, дуней псоми самбэмрэ дзюдомкIэ ехъулIэныгъэфIхэр къыщигъэлъэгъуащ, УФ-м дунейпсо классымкIэ спортым и мастерщ, УФ-м щIыхь зиIэ и тренерщ. Алинэ зыгъасэри аращ.
Ди гуапэщ Джэданэхэ я лъэпкъым иджыри зы чемпион къазэрыхэ­хъуар икIи адыгэр дигъэгуфIэу, Олимп джэгухэм я щыгум Алинэ дэкIыну ­дохъуэхъу.