«Хьэцыбанэ» брендым щыщ фэилъхьэгъуэхэр къызэзыгъэпэща, хьэпIацIэщыгъэкIэ екIуу хэзыдыкI IэпщIэлъапщIэ Щоджэн ФатIимэ хэтынущ Москва ДахагъэмкIэ щекIуэкIыну тхьэмахуэм.
ФатIимэ и кIэн къикIащ - Урысейм и щIыналъэ 70-м щыщ IэпщIэлъапщIэ мин бжыгъэхэм а зэхыхьэм хэтыну ягъэхьа лъэIу тхылъхэм щыщу зэпеуэм пхыкIахэм ящыщ хъуащ.
- ДахагъэмкIэ гъэлъэгъуэныгъэхэр Урысейми, хамэ къэралхэми щымащIэкъым. Абыхэм ухэхуэнуи апхуэдэу гугъукъым, мылъку къызэрыралэжьым къыхэкIыу. IуэхущIапIэм и зэфIэкIыр абы пэлъэщмэ, апхуэдэхэм зэпымыууэ ухэтурэ уи Iэзагъэм хэбгъахъуэ хъунущ, - жеIэ ФатIимэ. - Москва щекIуэкIыну зэхыхьэр нэгъуэщIхэм къазэрыщхьэщыкIыр хэтынухэр зэпеуэкIэ къызэрыхахырщ. Аращ абы ущыпхыкIкIэ Iуэхум нэхъри ущIытегушхуэр.
Москва щекIуэкIыну зэхыхьэм щагъэлъэгъуэну фэилъхьэгъуэхэр, дауи, къызэрыгуэкIкъым. Ахэр зыми емыщхьу щIэуэ, гупсысэ ящIэлъу щытын хуейщ. «Хьэцыбанэ» брендыр илъэситху хъуауэ а мардэхэм тету мэлажьэ икIи зэпеуэшхуэхэм я къызэгъэпэщакIуэхэм къыхуагъэув Iуэхугъуэхэм полъэщ. Урысейм и щыхьэрым Щоджэным щигъэлъэгъуэну и мурадщ блэкIамрэ иджыреймрэ я зэпыщIэныгъэхэр щыплъагъу, зэманым пхыкIа, къигъэщIэрэщIэжа фэилъхьэгъуэхэр.
Жэпуэгъуэм и 4-м къыщыщIэдзауэ и 9 пщIондэ выставкэхэр щагъэлъагъуэ «Манеж»-м щекIуэкIынущ. Урысейм и мызакъуэу, хамэ къэралхэм щыщ дизайнерхэм я гъэлъэгъуэныгъэ. IэпэIэсэ цIэрыIуэхэм я IэрыкI гъэщIэгъуэнхэм и мызакъуэу, иджырей фэилъхьэгъуэхэм ятеухуа зэIущIэ, лекцэ, зэпсэлъэныгъэ, мастер-класс щхьэпэхэм хэтынущ Налшык щыщ хъыджэбзыр. Гъэлъэгъуэныгъэм и программэм хыхьэу абы къыщызэрагъэпэщыну, модельер ныбжьыщIэхэм я зэхьэзэхуэхэми и зэфIэкI щеплъыж хъунущ ар.
Щоджэн ФатIимэ и лэжьыгъэхэр щыхьэт тохъуэ IэкIэ гъэхьэзыра фэилъхьэгъуэхэм зэпымыууэ щIэупщIэ зэраIэм. ФатIимэ дехьэх икIи фIыуэ щыгъуазэщ лъэпкъ фащэм къикIуа тхыдэм, абы епха хабзэхэм. Зэпеуэхэмрэ гъэлъэгъуэныгъэхэмрэ къыхэжаныкI пщащэм и цIэ а IэщIагъэм зэрыщигъэIунум шэч хэлъкъым. Зи лэжьыгъэхэм нэгъуэщI лъэпкъхэм щыщхэри, хамэ къэралхэм щыпсэухэри дахьэх IэпщIэлъапщIэм и хъуэпсапIэхэр къехъулIэну ди гуапэщ.
