КъБР-м и Iэтащхьэ КIуэкIуэ Казбек Къэбэрдей-Балъкъэр Республикэм и Къэралыгъуэм и махуэм теухуа и хъуэхъу

Си лъахэгъу лъапIэхэ!
Си гуми си псэми къабгъэдэкIыу Республикэм и махуэмкIэ сынывохъуэхъу!
Мы махуэр и нэщэнэщ Къэбэрдей-Балъкъэрыр Урысейм хэту зэрызэфIэувамрэ къикIуа тхыдэ гъуэгуанэмрэ. Республикэ щхьэхуэ къызэгъэпэщыным мыхьэнэшхуэ иIэт мыбдеж щыпсэу лъэпкъхэм я дежкIэ, апхуэдэуи абы цIыхубэм Iэмал куэд къаритащ зыужьыныгъэм хуэкIуэнымкIэ, лъэпкъ хабзэхэмрэ хъугъуэфIыгъуэхэмрэ хъумэнымкIэ.
Къэбэрдей-Балъкъэр Республикэм и Къэралыгъуэм и махуэм гушхуэныгъэ къытхелъхьэ, ди напщIэ телъщ лIакIуэкIэрэ зэрахьа хахуагъэмрэ нэхъыжьхэм я гуащIэдэкIымрэ. Абы нэхъри дытрегъэгушхуэ дыкъыщалъхуа хэкум и зыужьыныгъэм папщIэ тхузэфIэкI длэжьыным, Хэку иным и Iулыджымрэ къарумрэ нэхъри гъэбыдэным.
Псом хуэмыдэу мы махуэм дарогушхуэ Урысейм ифI зыхэлъхэр яхъумэу хахуэу дзэ Iуэху хэхам хэт ди хэкуэгъу щIалэхэм.
Зэкъуэтыныгъэрщ, зэныбжьэгъугъэрщ, зэгурыIуэныгъэрщ ди къарур зыхэлъыр. Си фIэщ мэхъу а хъугъуэфIыгъуэ уасэншэхэр ди тегъэщIапIэу, Къэбэрдей-Балъкъэрым, ди къэрал лъэщым я къэкIуэнур дахэ хъун папщIэ, къытпэщылъ къалэнхэм дазэрыпэлъэщынур.
Республикэм ис псоми фIыгъуэ, насып, зэIузэпэщыныгъэ фиIэну сынывохъуэхъу!