Кавказ Ищхъэрэр зэщIагъэхьэ

«Кавказ Ищхъэрэм ис лъэпкъхэм я зэныбжьэгъугъэ» лъа­къуэрыгъажэ Iуэхум хэтхэр Налшык къэсащ. Ахэр Мейкъуапэ къыщежьащ фокIадэм и 7-м. Зэпеуэм хэтщ Урысеймрэ Белоруссиемрэ я спортсмен лъэрызехьэхэр. 

«зэпеуэр къызэрагъэпэщащ УФ-м СпортымкIэ и министерствэмрэ Урысейм Лъакъуэрыгъажэ спортымкIэ и федерацэмрэ, абыхэм я дэIэпыкъуэгъущ спортсменхэр къыщыувыIэ хэгъэгухэр. 
Мы зэпеуэр 1993 гъэ лъандэрэ ирагъэкIуэкI. Уеблэмэ Урысейм и чемпионат статусыр иIэ хъуащ. Мы гъэм ахэр ирикIуэнущ ­Адыгей - Къэрэшей-Шэрджэс - Къэбэрдей-Балъкъэр - Осетие Ищхъэрэ-Алание щIыналъэхэм пхыкI гъуэгум, фокIадэм и 20-м Шэшэн Республикэм иужьрейуэ къыщыувыIэнущ. Псори зэхэту километр 1509-рэ къакIунущ. 
Къэбэрдей-Балъкъэрым IыхьитIу щекIуэкIынущ зэхьэзэхуэр. ФокIадэм и 14-м - VII Iыхьэр (километри 135,3-рэ) - Налшык - Iуа­щхьэмахуэ, фокIадэм и 15-м - VIII Iыхьэр (километр 65,24-рэ) - Налшык. 
Ди дежкIэ лъакъуэрыгъажэ спортыр епхащ ди хэкуэгъу спорт­смен цIэрыIуэ, 1972 гъэм Мюнхен щекIуэкIа Олимп джэгухэм ­щытекIуа, лъакъуэрыгъажэ спортымкIэ дуней псом чемпион щыхъуа Шыхъуэ Борис и цIэм. 
Иджыпсту Къэбэрдей-Балъкъэрым а спорт лIэужьыгъуэм щыдихьэххэр куэд мэхъу, КъБР-м Лъакъуэрыгъажэ спортымкIэ и федерацэм цIыху миным щIигъу къызэщIеубыдэ. 
Си фIэщ мэхъу мы зэпеуэр екIуу зэрекIуэкIынур, ди республикэм исхэм гукъинэж зэращыхъунур, щIалэгъуалэр нэхъыбэжым зэрытригъэгушхуэнур. 
КъызэгъэпэщакIуэхэм фIыщIэ яхузощI, зэпеуэм хэтхэм ехъу­лIэныгъэ яIэну сохъуэхъу», - щетх КъБР-м и Iэтащхьэ КIуэкIуэ Казбек и телеграм-каналым.