КIуэкIуэ Казбек и къулыкъум пэрохьэ

Къэрал хабзэм къызэригъэувым ипкъ иткIэ, КъБР-м и Iэтащхьэу хаха КIуэкIуэ Казбек и къулыкъум зэрыпэрыувэм теухуа дауэдапщэр КъБР-м и Правительствэм и Унэм щекIуэкIащ. Абы кърихьэлIащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэм и къуэдзэ  Куренной Александр, Адыгэ Республикэм и Iэтащхьэ КъумпIыл Мурат, Дагъыстэн Республикэм и Лъэпкъ Зэхуэсым и УнафэщI Аскендеров Заур, Къэрэшей-Шэрджэс Республикэм и тхьэмадэ Темрезов Рашид, Осетие Ищхъэрэ – Аланием и Iэтащхьэ Меняйло Сергей, Шэшэн Республикэм и Парламентым и тхьэмадэ Жамалдаев Шаид, Ставрополь крайм и губернатор Владимиров Владимир. УФ-м и Президентым и Администрацэм, федеральнэ министерствэхэмрэ ведомствэхэмрэ я лIыкIуэхэр, УФ-м и Къэрал Думэм и депутатхэр, Федеральнэ Зэхуэсым и сенаторхэр, КъБР-м и Конституцэ, Арбитраж судхэм, Суд Нэхъыщхьэм я унафэщIхэр, депутатхэр, министрхэр, нэгъуэщI къулыкъущIэхэр, жылагъуэр.
ЗэIущIэр къыщызэIуихым КъБР-м и Парламентым и УнафэщI Егоровэ Татьянэ къеджащ КIуэкIуэ Казбек Къэбэрдей-Балъкъэр Республикэм и Iэтащхьэу зэрыхахамкIэ  Парламентым и Унафэм.
Абы иужькIэ, КъБР-м и Iэтащхьэм и Iэр КъБР-м и Конституцэ тхылъым трилъхьэри,  тхьэ иIуащ зыпэрагъэува IэнатIэм пэрытыху цIыхум и хуитыныгъэр зэрихъумэнымкIэ, УФ-м, КъБР-м я Конституцэхэм къагъэувхэр зэригъэзэщIэнымкIэ, республикэм и къэралыгъуэр, шынагъуэншагъэр зэрихъумэнымкIэ, Къэбэрдей-Балъкъэр Республикэм и цIыхухэм пэжу зэрахуэлэжьэнымкIэ.
ЗэIущIэм къыщеджащ УФ-м и Федеральнэ Зэхуэсым ФедерацэмкIэ и Советым и УнафэщI Матвиенкэ Валентинэ, УФ-м и Правительствэм и УнафэщI Мишустин Михаил сымэ къагъэхьа телеграммэхэм. Куренной Александр къеджащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Чайкэ Юрий и зэрызыхуигъазэ псалъэм. ХъуэхъукIэ хьэщIэхэм зыхуагъэзащ КIуэкIуэ Казбек.
Езы Iэтащхьэр къыщыпсалъэм псом япэу фыщIэ хуищIащ УФ-м и Президент Путин Владимир дзыхь къыхуищIу и кандидатурэр иджыри зэ къызэригъэлъэгъуам папщIэ, апхуэдэуи депутатхэмрэ Къэбэрдей-Балъкъэрым и цIыхухэмрэ псалъэ гуапэкIэ захуигъэзащ, ахэр къызэрыщыгугъ псори зэфIигъэкIын папщIэ и къаруи, щIэныгъи, зэфIэкIи зэрыщымысхьынур, хуей хъумэ и узыншагъэри хилъхьэну зэрыхьэзырыр жиIащ КIуэкIуэ Казбек.