ГъэшхэкIым елэжь IэнатIэхэм заужь

2024 гъэм и мази 8-м къриубыдэу Къэбэрдей-Балъкъэрым гъэшхэкIым елэжь и IуэхущIапIэхэм шэ зэфэу къыщIагъэкIам проценти 3,5-кIэ, шатащхьэм - проценти 3-кIэ, кхъуеймрэ кхъуейлъалъэмрэ - проценти 3,8-кIэ хагъэхъуащ, зэпалъытэж пIалъэм къриубыдэу нэгъабэ яхузэфIэкIам нэхърэ.
Апхуэдэуи гъэшым елэжь IуэхущIапIэхэм хэхъуэ къагъэлъэгъуащ тхъуцIынэрэ тхъу гъэвэжауэ къыщIагъэкIам я куэдагъымкIэ. Нэгъабэ и апхуэдэ пIалъэм щыIэ бжыгъэхэм нэхърэ процент 13-кIэ нэхъыбэ къалэжьащ е псори зэхэту тонн мин 1,2-м нэблагъэ, абы щыщу тхъуцIынэу - тонн 290-рэ. 
Урысей Федерацэм Мэкъумэш хозяйствэмкIэ и министерствэм къызэритамкIэ, къэралым и сату щIыпIэхэр тхъуцIынэкIэ ирикъуу къызэгъэпэщащ икIи ар зэпэубыда хъункIэ шынагъуэ нобэкIэ щыIэкъым. Псалъэм папщIэ, дызэрыт илъэсым и щIышылэ-шыщхьэIу мазэхэм къриубыдэу тхъуцIынэу къыщIагъэкIащ тонн мин 221,2-рэ. Нэгъабэ щыIэ бжыгъэхэм ар къыкIэрыхуркъым. Шэ къашым и куэдагъым зэрыхэхъуэр къэбгъэлъагъуэмэ, тхъуцIынэу къыщIагъэкIым и куэдагъым иджыри къыхэхъуэнущ. 
Зэрыщыту къапщтэмэ, Урысей Федерацэм и ерыскъыхэкI промышленностыр шэщIауэ мэлэжьа, къэралым щыщыIэ щытыкIэм емылъытауэ зеужь, ди цIыхухэр фIагъ лъагэ зиIэ шхыныгъуэхэмкIэ ирикъуу къызэрагъэпэщ.