Iуащхьэмахуэ зыгъэпсэхупIэхэм йофIэкI

ЕхъулIэныгъэ

Дуней псом щыцIэрыIуэ «Iуащхьэмахуэ» лъэрыжэ курортыр Урысейм и бгы зыгъэпсэхупIэ нэхъыфI дыдэу къалъытэри, «Горы Кавказа» саугъэт нэхъыщхьэмкIэ ягъэлъэпIащ. ЗыгъэпсэхупIэ нэхъыфI дыдэр къыхахащ цIыхубэм я IэIэтым тещIыхьауэ. Нэгъабэ а цIэ лъапIэр хуагъэфэщат Кавказ. РФ IуэхущIапIэм иухуа «Архъыз» курортым. 
- Iуащхьэмахуэ курортыр илъэс 55-рэ щрикъум ирихьэлIэу ехъулIэныгъэшхуэ зэдгъэгъуэтащ. Псоми къыдгуроIуэ иджыри лэжьыгъэшхуэ къызэрытпэщылъыр, хьэщIэщхэм я бжыгъэр хэгъэхъуэным къыщыщIэдзауэ, лъэрыжэкIэ къыщажыхь гъуэгухэмрэ ахэр зыхуэныкъуэ псомкIи къызэгъэпэщыным щиухыжу. Ауэ сэ быдэу сощIэ Iуащхьэмахуэ щылажьэхэм ар я IэщIагъэ мыхъуу, гъащIэ псо зэрахуэхъуар, гурэ псэкIэ зэрыхуэпэжыр. ЖаIэ, Iуащхьэмахуэ зэ щыIам и дуней еплъыкIэмрэ гупсысэкIэмрэ зыкъигъазэу, цIыхум езым хузэфIэкIынур абдеж зэрыщигъэунэхур. Ауэ щыхъукIэ, Урысейм щыпсэу дэтхэнэ зыри зэ закъуэ Iуащхьэмахуэ щыIэн хуейуэ къызолъытэ, - жиIащ Кавказ.РФ IуэхущIапIэм и унафэщI Юмшанов Андрей.
Абы и къуэдзэмрэ лэжьакIуэ гупымрэ фIыщIэ яхуищIащ, я лэжьыгъэм хуэпэжу зэрыбгъэдэтым, нэхъри ефIэкIуэным зэрытелажьэм папщIэ. 
Iуащхьэмахуэ курортым иджыри зы саугъэт къихьэхуащ - Урысейм и зыгъэпсэхупIэхэм ящыщу машинэкIэ къызэхакIухьхэм я нэхъ тыншу къалъытащ ар. 
Мы гъэм зэпеуэм хэтащ щIыналъи 8-м щыщу IуэхущIапIэ 379-рэ. Нэхъыбэ къызыбгъэдэкIар Кавказ Ищхъэрэ, Сыбыр Ипщэ федералънэ щIыналъэхэрщ. 
Гу лъытапхъэщ 2027 гъэм ирихьэлIэу Iуащхьэмахуэ курортым лъэрыжэ гъуэгущIэхэр, шхапIэщIэхэр, хьэщIэщхэр къызэрыщызэIуахынуми.