КъБР-м щыIэ МВД-м къет

ПцIыр къыпщIокIуэж

Налшык къалэм и полицэм и лэжьакIуэхэм къэпщытэныгъэ Iуэхухэр ирагъэкIуэкIыу яубзыхуащ Бахъсэн районым щыщ, илъэс 32-рэ зи ныбжь, пIалъэкIэ Мэзкуу щыпсэу цIыхубзым зэрихьа хьэгъэщагъэр.

 ЕджапIэ нэхъыщхьэм щIэтIысхьэн мурадкIэ абы къигъэсэбэпащ гъунэгъу щIыналъэм курыт медицинэ IэщIагъэ щызригъэгъуэта хуэдэу зэрыт дипломыр.

Шэч зыхуащIым зэрыжиIамкIэ, дипломыр абы къыщищэхуащ Интернет сайтхэм язым, адэкIэ еджапIэ нэхъыщхьэм щIэтIысхьэн мурад иIэу.

Урысей МВД-м и Налшык Управленэм дознаниемкIэ и къудамэм студент мыхъуам теухуа уголовнэ Iуэху къиIэтащ УФ-м и УК-м и 327-нэ статьям и 3-нэ Iыхьэм ипкъ иткIэ.

Мэзкуудэсхэм наркотикхэр къытрах

Урысей МВД-м Налшык къалэм щиIэ управленэм наркотикхэр зэрызэрагъэкIуэкIым кIэлъыплъ и къудамэм и лэжьакIуэхэм ХьэтIохъущокъуэм и уэрамым щаубыдащ зы щIалэрэ  хъыджэбзрэ.

Я тхылъхэр къыщапщытэм, илъэс 19 зи ныбжь мэзкуудэсхэм къыкъуахащ хьэжа пкъыгъуэ зэкIуэцIылъхэр зэрылъ пластик птулъкIэ. Яубыдахэм зэрыжаIамкIэ, ахэр къыщащтащ гъэтIылъыпIэ щэхум, щаубыда щIыпIэм зы километр хуэдэкIэ пэIэщIэм. Ар Налшык къалэм щрагъэкIыну я мурадт.

 КъинэмыщIауэ, полицэм и лэжьакIуэхэм щIалэщIэм къытрахащ хьэжа пкъыгъуэ зэкIуэцIылъ. Нэхъапэм суд зытращIыхьа щIалэм жиIащ, хъуржын цIыкIум наркотик зэрилъыр, езым къигъэсэбэпыну, иригъэкIын мурад имыIэу, ар РСО -Алание Республикэм зэрыщызыIэригъэхьар.

Экспертизэм къызэригъэлъэгъуамкIэ, къытрахахэр грамми 199,37-рэ хъу «метадон», грамм 01-рэ хъу «мефедрон» наркотикхэкIщ.

Налшык УМВД-м и Следственнэ къудамэм шэч зыхуащIхэм ятеухуа уголовнэ Iуэху къиIэтащ УФ-м и УК-м 30-нэ статьям и 3-нэ Iыхьэм, 228.1-нэ статьям и 5-нэ Iыхьэм япкъ иткIэ.

Статьям къызэригъэувымкIэ, ахэр илъэс 15-м къыщыщIэдзауэ 20-м нэскIэ ягъэтIысынкIэ мэхъу.

«Мадинэ» гъэпцIакIуэ

Урысей МВД-м Налшык къалэм щиIэ управленэм зыхуагъэзащ щIыпIэм щыпсэухэу илъэс 21 -  59-рэ ныбжьхэм къриубыдэ цIыхубзиплIым. Щхьэусыгъуэр Мадинэ зи цIэ цIыхубзым къызэригъэпцIарт.

Лей зытехьахэм зэрыжаIамкIэ, 2023 гъэм и щIышылэм щыщIэдзауэ 2024 гъэм и щIышылэм къриубыдэу, шэч зыхуащIым хуаутIыпщащ сом 35 000-м щегъэжьауэ 485 000-м нэс. ЦIыхубзхэм субсидиехэр къаIэрыхьэнымкIэ къадэIэпыкъуну къигъэгугъат абы. БзаджащIэм псори зэхэту Iэрыхьащ сом 815 000-рэ.

Налшык къалэ УМВД-м и Полицэм и къудамэ №1-м уголовнэ къэлъыхъуэныгъэмкIэ и лэжьакIуэхэм шэч зыхуащIыр яубыдащ. Ар нэхъапэми суд зытращIыхьа, илъэс 56-рэ зи ныбжь щIыпIэм щыпсэурщ. Абы илэжьамкIэ зиумысыжащ. ЦIыхубзым жиIащ лей зытехьахэм ящIыгъуу лажьэу икIи абыхэм хьэпшып гуэрхэр е мылъку зыIэрагъэхьэну зэрыхуейм зэрытепсэлъыхьыр зэрызэхихар. Арати, и лэжьэгъухэм яхуигъэлъэгъуащ тхылъхэр гъэхьэзырынымкIэ ядэIэпыкъуну, абыкIэ щIэгъэкъуэн къыхуэхъуну Iыхьлы зэриIэри я фIэщ ищIащ..

 Уголовнэ Iуэху къаIэтащ УФ-м и УК-м и 159-нэ статьям и 3-нэ Iыхьэм ипкъ иткIэ.

Сом мин 45-рэ

Урысей МВД-м Аруан районым щиIэ къудамэм 2024 гъэм щэкIуэгъуэм и 9-м зыхуигъэзащ илъэс 66-рэ зи ныбжь нарткъалэдэс цIыхубзым.

ЗэрыжиIамкIэ, зы махуэ ипэкIэ абы и деж къэпсэлъащ электрокъарурэ газкIэ жылагъуэр къызэзыгъэпэщ IуэхущIапIэм и лэжьакIуэу къыжезыIа цIыхухъур икIи цIыхубзыр тригъэгушхуащ коммунальнэ Iуэхутхьэбзэхэм пэкIуэр зэритын программэ и телефоным трыригъэтхэну. Абы едаIуэри цIыхубзым приложениер интернетым кърихащ икIи телефоным къытридза сурэтым трикъузащ. АдэкIэ и счетым ирахащ сом 45 000-рэ.

Абы теухуа уголовнэ Iуэху къаIэтащ.

Полицэм фигу къегъэкIыж:

ГъэпцIакIуэхэм жаIэфынущ IуэхущIапIэ, компание зэхуэмыдэхэм я лэжьакIуэ хуэдэу. Къэпсалъэ фымыцIыхухэм дзыхь яхуэвмыщI.